Omu mwahichile tukweji kafwe 6 kufuma haze Yowano Muka-kumbapachisa aputukile kwambulula, Yesu uze apwile jino namyaka yakusemuka kafwe 30, ejile kuli ikiye kuKalwiji Yotau. Uno ejile nakulinga ika? Kakatukilile kushikamako, nduma. Kaha nawa Yesu kakatukilile kaha akamone omu mulimo waYowano wapwile nakuzovolokako, nduma. Yesu ejile kuli Yowano mangana amumbapachise.

Yowano akanyine ngwenyi: “Ami yami nguli nakusakiwa kungumbapachisa kuli ove, nyi ove nawa wizenga kuli ami?” (Mateu 3:14) Yowano ejivile ngwenyi Yesu apwile MwanaKalunga wakulipwila. Anukenu ngwenu, omu Yowano apwile mujimo lyanaye Elizaveta, alyungunwine nakulisamba omu avatambukilile Maliya uze apwile nalijimo lyaYesu. Yowano atela vamulwezele vyosenevi kuli naye Elizaveta. Pamo vamulwezele nawa omu kangelo ejile nakuvilika kusemuka chaYesu, nomu nawa vangelo vasolokele kuli tufunga haufuku asemukile Yesu.

Yowano ejivile ngwenyi apwile nakumbapachisa vatu vaze vapwile nakupihilila nakwalumuka kujishili javo. Oloze Yesu kapwile nashiliko. Numba tuhu Yowano akanyine, oloze Yesu amulwezele ngwenyi: “Echa chipwenga vene ngocho, mwomwo omu mukiko twatela kulinga mangana tutesemo vyuma vyosena vyakwoloka.”—Mateu 3:15.

Mwomwo ika chapwilile chakwoloka Yesu kumumbapachisa? Yesu kavamumbapachishile mangana asolole ngwenyi apihililile nakwalumuka kujishili jenyiko. Vamumbapachishile mangana asolole hatoma ngwenyi alisuwile alinge mwaya muchima waIse. (WavaHepeleu 10:5-7) Yesu apwilenga muka-kusonga maliva, oloze lwola lwahetele jino lwakuzata mulimo uze Ise wamwilu amutumine hano hamavu. Uno munashinganyeka ngwenu Yowano apwile nakufwelela ngwenyi nakusoloka chuma chakulipwila omu mwambapachisa Yesu nyi?

Yowano ambile ngwenyi: “Ou angutumine ngwenyi ngumbapachisenga vatu mumeya ambile kuli ami ngwenyi: ‘Weshowo mukamona shipilitu nayifuma mwilu nakwiza nakutwama hali ikiye, ou ikiye vene mwakambapachisa nashipilitu yajila.’” (Yowano 1:33) Enga, Yowano afwelelele ngwenyi shipilitu yaKalunga nayiza hali mutu umwe mwambapachisa. Ngocho omu Yesu afumine mumeya, Yowano kalikomokeleleko hakumona “shipilitu yaKalunga nayifuma mwilu nge liyembe nakuwila hali [Yesu].”—Mateu 3:16.

 Oloze kwapwile vyuma vyeka nawa vyasolokele omu Yesu vamumbapachishile. “Mwilu mwasokolokele.” Uno echi chatalikishile mulihi? Echi chalumbunwine nge shimbu vapwile nakumumbapachisa, Yesu anukile chiyoyelo chenyi chamwilu. Enga, Yesu anukile chiyoyelo apwile nakuyoya mwilu omu apwilenga mwanaYehova wakushipilitu, namuchano uze amunangwile Kalunga mwilu shimbu kanda ezenga nakusemukila hano hamavu.

Kaha nawa halwola vapwile nakumumbapachisa, mwilu mwafumine lizu ngwalyo: “Ou ikiye Mwanami, ou ngwazanga, ou ngwevwila kuwaha.” (Mateu 3:17) Uno eli lizu lyapwile lyeya? Eli lizu kalyapwile lyaYesuko mwomwo Yesu apwile hamwe naYowano hahaze vene. Lyapwile lizu lyaKalunga. Pundu vene, Yesu apwa MwanaKalunga, keshi nge Kalunga iveneko.

Yesu apwile jino mwanaKalunga wahano hamavu, nge muze apwile mutu watete, Alama. Omu kambaji Luka akumishile kulumbununa lumbapachiso lwaYesu, asonekele ngwenyi: “Omu Yesu aputukile kuzata mulimo wenyi, apwile namyaka yakusemuka 30, kaha vatu vamumwenenga ngwavo apwile mwanaYosefwe, Yosefwe mwanaHeli, . . . mwanaNdavichi, . . . mwanaApalahama, . . . mwanaNowa, . . . mwanaAlama, Alama mwanaKalunga.”—Luka 3:23-38.

Nganomu Alama apwile “mwanaKalunga” wahano hamavu, naYesu apwile vene ngocho. Omu vamumbapachishile, Yesu atungile usoko wauhya naKalunga, apwile jino MwanaKalunga wakushipilitu. Ngocho Yesu alizangile jino kunangula vatu muchano waKalunga nakuvalweza jila yakuya kukuyoya. Aputukile mulimo uze wamulingishile echenga kuyoya chenyi chahano hamavu mwachimuna wakuvatula hali vaka-shili.