Imanle miyeeri mithanu nammoha Yohani Mpatisi onnapacerya olaleerya, Yesu, yoowo vano orino iyaakha 30 sa oyariwa, onnarwa wa Yohani o Muhice Yortano. Ni nthowa taani? Tahi wi onaya opaka osekurya woonthamwene. Naari tahi wi Yesu onachuna woona oya vahoolo wa muteko wa Yohani. Pahiru, Yesu onarwa wi amveke Yohani wi ampatise.

Mwawooneya, Yohani onnakhooca: “Miyano kinaphwanela opatisiwa ti weyano, vano weyo onarwa wa miyo?” (Mateu 3:14) Yohani oosuwela wi Yesu mwaana ookhweleyasa a Muluku. Muupuwele wi elukuluku Yohani aarupaliweiye, owo aahitannyeya nuuhakalala vaavaa Mariya, amurupanle Yesu, aamusekunryeiye Isapeli, mai a Yohani. Hiwaavovo minikwa wi amamaawe yaahimutharihela vooloca sa yeeyo. Navetho oosuwela vooloca sa munkeelo yoowo aalokonhe oyariwa wa Yesu ni vooloca sa waaphiyerya wawe akukhula mu ohiyu Yesu aayariweiye.

Yohani onniiwexexa wi opatiso onapakeiye ti wa yaale anarukunusa murima ntakhara soocheka saya. Nyenya Yesu haanono yoocheka. Moohipwacha okhooca wa Yohani, Yesu onnatitelela oloca: ‘Vano nihiye ekhale hiha, wona wi ninnaphwanela okhwaniha wokolola wothene.’—Mateu 3:15.

Ntakhara heeni eryaaya yoophwanelela wi Yesu apatisiwe? Yesu haapatisiwe ntoko eneneeryo ya orukunusa murima ntakhara soocheka. Opatiso awe onooniherya wi ohiiveleela wi apake yookhwela ya Tiithi awe. (Ahebri 10:5-7) Yesu aari karpintero, nyenya vano yoophiya elukuluku yawi apacerye muteko yoowo Tiithi awe awirimu omurumihenleiye veelaponi yavathi wi akhwaanihe. Apwanne munuupuwela wi Yohani onnawehererya weereya echu yootikhiniha vaavaa oneereiye ampatise Yesu?

Phaameene, ohoolo waya Yohani onnalokoha: “Nto yole okirumme opatisa ni mahi t’okilènle: ‘Yole onerawe omone Munepa omukhuruwelaka ni olekelaka wa yowo, ti yowo onapatisa mwa Munepa Wawela.’” (Yohani 1:33) Mwawiihiiha Yohani onnaweherya Munepa waweela omukhuruwela muchu aahaaleiye ompatisa. Mwawiihiiha, elukuluku Yesu onakhumeiye mmaahini, Yohani hatikhinihen’ye woona “Munepa wa Muluku ntoko ekakaiya, omukhuruwelaka Yesu.”—Mateu 3:16.

Nyenya sincipale soheereya mu opatisiwa wa  Yesu. “Wirimu wàhuleyawo” wa yoowo. Eyo enataphulela eheeni? Mwawooneya eyo enataphulela wi mu elukuluku ya opatisiwa wa Yesu, waahimurweela muupuwelo wa okumi aareiyeno ahaakumve orwa veelaponi yavathi. Mwawiihiiha, Yesu vano onnuupuwela okumi awe ntoko yoopatusiwa yoomunepani ya Yehova, ophitaanyerya iparipari seiyo Muluku aamuhusinheiye wirimu ahaakumve orwa veelaponi yavathi.

Mwawaaceererya, mu opatisiwa wa Yesu ninniiweya nsu noorweela wirimu nlocaka: “Ola ti mwanaka òkhweleyasa, kinaphwanyakamo nihakalaliho naka.” (Mateu 3:17) Nsu nlo ti nawani? Tahi nsu na Yesu; owo ori vaavale ni Yohani. Nlo nsu na Muluku. Mweeparipari, Yesu ti mwaana a Muluku. Owo tahi Muluku.

Enakhala yawooneya wi naamwi ari veelaponi, Yesu mwaana a Muluku, hiiha ntoko aareiye mulopwana oopacerya Atamu. Oohuserya Luka, amanle othariha opatisiwa wa Yesu, oorepa: “Yesu apatxeryaka muteko awe àrino etxhu ya miyakha makhumi mararu. Àri mwana a Yosefe, mwana a Heli, . . . mwana a Davide, . . . a Abraau, . . . mwana a Noowe, . . . mwana a Adau, mwana a Muluku.”—Luka 3:23-38.

Hiiha ntoko Atamu aareiye “mwana a Muluku,” ti hiiha wa Yesu tho. Vaavaa Yesu opatisiweiye, ohiiwexexa wi mwaana a Muluku yoowo onahaala okhala muchu oomunepani wirimu. Mwawiihiiha, Yesu toophwanelela ohusiha eparipari yawirimu ni wooniherya ephiro ya okumi. Yesu oopaceryiha muteko yoowo onahaala ohoolela oveleela okumi awe ntoko woopola ntakhara achu oocheka.