Etyi palamba onohanyi epandu tunde etyi Suau Batisita ahimbika okuivisa, Sesusi pahe ankho una omanima 30, eya ku Suau Pondongi yo Solondau. Ankho weya okulinga-tyi? Keile vala okutalelapo Suau. Tupu, keile vala opo atale oñgeni ovilinga vya Suau ankho vikahi nokueenda. Mahi, Sesusi weya okuita opo Suau emumbatisale.

Suau ehetavela, apulu okuti: “Hame ñgeno ndyimbatisalwa no ove, ove uya ku ame?” (Mateusi 3:14) Suau ankho utyii okuti Sesusi Omona wa Huku wakolela. Hinangela okuti etyi Suau ankho ekahi meimo, wahombokele nehambu etyi eiva Maliya, omulemi wa Sesusi, weya okutalelapo Elisabete, me yae. Tuna onthumbi yokuti, tyipondola me ya Suau wemupopilile-tyo. Iya Suau tupu ankho weiva etyi oandyu yapopia konthele yokutyitwa kwa Sesusi, nonoandyu mbamonekelele ovanthita motyinthiki Sesusi atyitwa.

Suau ankho utyii okuti ovanthu vambatisalwa, ovo vana velivela ononkhali mbavo. Mahi Sesusi utupu onkhali. Namphila Suau ehetavelele okumumbatisala, Sesusi emupopila okuti: “Yeka tyilingwe vala ngotyo pehepano, mokonda okulinga ngotyo, tufuisapo atyiho Huku ahanda.” — Mateusi 3:15.

Ombatisimu ya Sesusi ifuisapo atyiho Huku ahanda mokonda yatyi? Sesusi kambatisalelwe ngotyilekeso tyokulivela ononkhali. Ombatisimu yae, ilekesa elipakulo liokulinga ehando lya Tate yae. (Ova Hebeleu 10:5-7) Sesusi ankho okalupindelu, mahi pahe omuvo wehika-po wokuhimbika ovilinga Tate yae keulu emutuma okulinga pano pohi. Ove usoka okuti Suau ankho utyii okuti pombatisimu ya Sesusi mapamoneka tyimwe tyihuvisa?

Suau konyima wapopile okuti: “Ou wanthuma okumbatisala nomaande, wamphopila okuti: ‘Ou wamamono walaukilua nononkhono mba Huku ambukala kwe, oo umbatisala nononkhono mba Huku.’” (Suau 1:33) Suau ankho ukahi nokukevela okuti ononkhono mba Huku mambulaukila komunthu umwe mambatisala. Moluotyo, etyi Sesusi ayauka momaande, Suau katyemuhuvisile etyi amona “ononkhono mba Huku mbulaukila Sesusi ngopomba.” — Mateusi 3:16.

Mahi pena vali otyipuka otyikuavo tyamonekele pombatisimu ya Sesusi. Ombimbiliya yati: “Eulu aliikuka.” Oityi otyo tyilekesa? Tyafuile, otyo tyilekesa okuti pombatisimu yae, Sesusi wahimbika okuhinangela omuenyo wae wo keulu etyi eheneye pano pohi. Ngotyo, Sesusi pahe wahinangela omuenyo wae etyi ankho oandyu ya Siovaa, notyili alongesilwe na Huku etyi ankho ekahi keulu.

Tyihe-otyo vala, etyi Sesusi ambatisalwa akuivala ondaka keulu yati: “Ou Omona wange ndyihole, una ame napanda.” (Mateusi 3:17) Ondaka oyo ankho oyalie? Ankho kaipondola okukala ondaka ya Sesusi, mokonda Sesusi ankho ukahi na Suau. Oyo ankho ondaka ya Huku. Tyayandyuluka nawa okuti Sesusi omona wa Huku. Ngotyo, Sesusi hae-ko Huku.

Tyimoneka nawa okuti Sesusi ankho omona wa Huku wolutu luohitu nga Andau, omunthu wo tete. Omulongwa Luka etyi apopia ombatisimu ya Sesusi, wahoneka okuti: “Etyi Sesusi ahimbika ovilinga viae, ankho una omanima ehungi po 30. Ngetyi ovanthu vapopia ankho omona wa Suse, Suse omona wa Heli, . . . omona wa Daviti, . . . omona wa Ambalaiau, . . . omona wa Noe, . . . omona wa Andau, Andau omona wa Huku.” — Luka 3:23-38.

Ngetyi Andau ankho omunthu, mahi “omona wa Huku,” na Sesusi ongotyo ankho ekahi. Etyi Sesusi ambatisalwa, wakala noupanga omupe na Huku, mokonda ankho makakala vali oandyu keulu. Ngotyo, Sesusi ankho wafuapo opo alongese otyili konthele ya Huku nokulekesa onkhalelo ikahi nawa yokutyinda omuenyo. Sesusi ahimbika onkhalelo yomuenyo maimutuala kononkhia mbomuenyo wae pano pohi opo ayovole ovanthu ovakuankhali.