Bautizakoq Juanqa joqta killakunanönam willakurnin këkarqan, tsëmanmi 30 watayoqna këkarnin Juanta ashir Jordan mayuman Jesus chärirqan. Manam watukaqtsu ni Diospita willakurnin imanö këkanqanta tapoqtsu ëwarqan. Rasumpa kaqchöqa, bautizanampaq mañaqmi ëwarqan.

Juanqa manam Jesusta bauticëta munarqantsu, tsëmi, “noqam bautizamänëkitaqa wanä, ¿imanöpataq noqaqa qamta bautizashqëki?” nirqan (Mateu 3:14). Pëqa musyarqanmi Jesusqa Diospa Tsurin kanqanta. Jesusta Marïa qeshyaq këkar Elisabetpa wayinman yëkuriptin pachanllachöraq këkarnin kushikur kuyushqa kanqantaqa, Elisabetqa Juanta willashqachi karqan. Jina, Jesus yurinampaq kaqta willarnin Marïata juk angel yuripushqa kanqanta, y yurinqan paqas mitsikoqkunata angelkuna yuripushqa kayanqantaqa musyarqanchi.

Jutsallakuyanqampita arrepentikushqa kayaptinmi, Juanqa nunakunata bautizaq, peru Jesusqa manam ima jutsatapis rurashqatsu karqan. Juan mana munaptimpis Jesusqa kënömi nirqan: “Kananlla tsënö karinanta jaqi, porqui tsënö ruranqantsikmi alli kanqa Diospa llapan munënin rurakänampaq” (Mateu 3:15).

¿Imanirtaq Jesus bautizakunan precisarqan? Tsëtaqa rurarqan manam jutsayoq kanqanta rikätsikunampaqtsu, sinöqa Diospa munëninta ruranampaq decidinqanta rikätsikunampaqmi (Hebrëus 10:5-7). Tsë witsankunayaqqa Jesusqa carpintërunömi trabajashqa karqan, peru tsëpita patsëqa, ciëluchö Teytan mandanqan rurëtam Patsachö rurarnin qallëkunan karqan.

Jesusta bautizariptin, ¿imapis espantëpaq pasakunampaq kaqtatsuraq Juanqa shuyararqan? Awmi, Juanmi kënö willakurqan: “Yakuchö bautizanäpaq kachamaqnï Kaqllam kënö nimarqan: ‘Santu espïritu urämoqta y pimampis rataqta rikanqëki kaqmi, santu espïrituwan bautizaq kaqqa’” (Juan 1:33). Tsëmi Juanqa bauticëkanqankunapita pï kaqmampis Diospa santu espïritun uränanta shuyarëkarqan. Tsëchi yakupita yarqaramuptin ‘Diospa santu espïritun paluma niraq’ Jesuspa jananman shamïkaqta rikarqa, mana espantakurqantsu (Mateu 3:16).

Peru manam tsëllatsu pasakurqan: ciëlum kichakärirqan.  ¿Ima ninantaq tsëqa? Itsapis tsëqa karqan Patsata manaraq shamurnin, Diospa tsurinnö ciëluchö kawanqanta y Dios llapan yachatsinqanta tsë höra yarpärinqan.

Jina bautizakunqan höram ciëlupita kënö neq wiyakarqan: “Këmi Tsurï, kuyë Tsurï, pëpitam alläpa kushikü” (Mateu 3:17). ¿Pipa voznintaq karqan? Manam Jesuspatsu karqan, porqui tsë höraqa Juanwanmi pëqa këkarqan. Tsëqa Diospa vozninmi karqan, tsëmi cläru rikätsikurqan Jesusqa Dios mana kanqanta, sinöqa Diospa Tsurin kanqanta.

Patsachö kanqanyaqqa, Jesusqa Adannöllam Diospa tsurin karqan. Jesus imanö bautizakunqanta willakurirmi, Lücas kënö willakurqan: “Ruranampaq kaqta Jesus qallarqa kima chunka (30) watayoqnömi karqan”, y ‘nunakuna niyanqannöpis, pëqa Josëpa tsurinmi karqan, Josënam Helïpa tsurin, Helïnam Davidpa tsurin, Davidnam Abrahanpa tsurin, Abrahannam Noëpa tsurin, Noënam Adanpa tsurin y Adannam, Diospa tsurin karqan’ (Lücas 3:23-38).

Patsachö këkarqa, Adannöllam Jesusqa Diospa tsurin karqan. Peru bautizakunqan höram Diospa akrashqa tsurin kanampaq kaqta y ciëluta kutir juk espïritunö kawanampaq kaqta entiendirqan. Tsëpita patsëmi Jesusqa Diospa rasumpa kaq yachatsikïninkunata y mana wanushpa kawëta nunakuna imanö tariyänampaq kaqta yachatsikunampaq listu këkarqan. Jina bautizakurirqa nunakunapa jutsankunarëkur wanunqanyaq ruranampaq kaq rurëtam qallëkurqan.