Soqta killa jinañan bautizaq Juanqa predicasharan. Jinan Jesusqa payman riran Jordán mayupi kashaqtin. Chaypaqqa 30 watanpiñan Jesusqa kasharan. Payqa manan waturikunanpaqchu riran, nitaq imaynatachus Juan llank’asharan chayta qhawarinanpaqchu, aswanpas bautizachikunanpaqmi riran.

Juanmi ichaqa mana munaranchu bautizayta. “¿Noqata bautizawanayki kashaqtinchu noqaman jamuwashanki?” nispan niran (Mateo 3:14). Juanqa yacharanmi Jesusqa Diospa wawanpuni kasqanta. Paymanqa maman Elisabetchá willaran imaynas payqa wijsallanpiraq kashaspa Jesusrayku kusisqa kuyuykacharan chayta. Chaymantapas Juanqa yacharanchá Mariaman ángel Gabrielpa willasqanmanta, Jesuspa nacesqan tutapi michiqkunaman angelkunaq rijurisqanmantapas.

Chhaynaqa mana juchayoqmi Jesusqa karan, chaymi Juanqa mana bautizayta munaranchu. Jesusmi ichaqa niran: “Ama jark’awaychu, jinatapunin ruwananchis tukuy allin kaqta junt’anapaqqa”, nispa (Mateo 3:15).

¿Imanaqtintaq Jesusri mana juchayoq kashaspa bautizakunan karan? Chaywanyá payqa Yayanman presentakunan karan munayninta ruwananpaq (Hebreos 10:5-7). Chay p’unchaymantapachan Jesusqa imapaqchus Yayan kay pachaman kachamuran chay llank’ayta ruwanan karan. ¿Iman pasaran Jesús bautizakushaqtin? ¿Yacharanchu Juan chay pasananta?

Paymi khaynata willakuran: “Unupi bautizanaypaq kachamuwaqniymi [...] niwaran: ‘Pimanchus santo espíritu uraykamuspa pay patapi tiyaykuqta rikunki, chaymi santo espirituwan bautizaqqa kanqa’”, nispa (Juan 1:33). Arí, Juanmi rikunan karan juj bautizasqan runaman santo espíritu uraykamushaqta. Chhaynaqa manapaschá Juanqa admirakuranchu Jesús unumanta lloqsimushaqtin ‘Diospa espiritun paloma jina pay pataman uraykamushaqtinqa’ (Mateo 3:16).

Chaymantapas Bibliaq nisqanman jinaqa, Jesús bautizakushaqtinqa ‘cielon kicharikamuran’. Yaqapaschá chay rato Jesusqa yuyariran manaraq kay pachaman jamushaspa pichus  pay karan chayta, chay ninantan Bibliaqa nishanman ‘cielon kicharikamuran’ nisqanwan. Chhayna kaqtinqa Jesusqa yuyariranchá janaq pachapi Yayan Jehová Diospa tukuy ima yachachisqantapas.

Chaymantapas Jesús bautizakushaqtinqa juj kunkan cielomanta nimuran: “Kaymi Churiyqa, paytan munakuni, payqa sonqoypaq jinan”, nispa (Mateo 3:17). ¿Piqpa kunkanmi chay karan? ¿Kikin Jesuspa kunkanchu kanman karan? Manan ¿riki? Chay kunkaqa Diospan karan. Chhaynaqa manan Jesusqa Dioschu karan, aswanpas paypa wawanmi karan.

Jesusqa Adán jinan Diospa wawan karan. Chaymi Lucaspas niran: ‘Jesusqa kinsa chunka watanpin kasharan yachachiyta qallarishaspa, Josepa wawanmi payqa karan. Joseqa Elipa wawanmi karan, Elitaq Davidpa wawan karan, Davidtaq Abrahanpa wawan karan, Abrahantaq Noepa wawan karan, Noetaq Adanpa wawan karan, Adantaq Diospa wawan karan’, nispa (Lucas 3:23-38).

Chhaynaqa manaraq bautizakushaspaqa Adán jinallan Jesusqa karan. Bautizakuspan ichaqa Diospa especial wawan kapuran, chaypin payqa entienderan qhepaman cielopi juj espíritu kapunanta. Chaymi payqa preparasqa kasharan Diosmanta cheqaq kaqta yachachispa runakunata kausayman apananpaq. Arí, bautizakusqanmantapachan Jesusqa juj llank’ayta aparinan karan llapa runarayku wañunankama.