Pakupita miyezi mitanthatu bulukira padatoma Juwau M’batizi kumwaza mphangwa, Yezu wakuti akhali na pyaka 30 aenda ku Nkulo wa Yordani kukhali Juwau. Toera kacitanji? Iye nee aenda basi ene toera kadziwako, peno toera kuona kuthambaruka kwa basa ya Juwau. Mbwenye Yezu aenda toera akabatizwe na Juwau.

Mbwenye Juwau nee atawira pyenepi, iye alonga: ‘Ine ndisafunika kubatizwa na imwe, mphapo thangwi yanji imwe mwabwera kuna ine?’ (Mateu 3:14) Juwau akhadziwa kuti Yezu ndi Mwana wakupambulika wa Mulungu. Kumbukani kuti Juwau apfukunyuka pikhali iye m’mimba mwa mai wace mu ndzidzi udabwera Mariya dzaona Elizabheti mai wa Juwau. Mwakukhonda penula, mukupita kwa ndzidzi Elizabheti ampanga pyenepi. Pontho iye panango abva pya cidziwiso cidacita anju ca kubalwa kwa Yezu na aanju adaonekera kuna akumbizi namasiku a ntsiku idabalwa Yezu.

Juwau akhadziwa kuti iye akhabatiza anthu adatcunyuka madawo awo. Mbwenye Yezu nee akhali na madawo. Ngakhale Juwau akhakhonda, Yezu apitiriza kumpanga: ‘Leka kundipingiza, thangwi mphyakuthema kuti picitike tenepo mwakubverana na pyonsene pinafuna Mulungu.’—Mateu 3:15.

Thangwi yanji Yezu akhafunika kubatizwa? Yezu nee abatizwa toera kupangiza kuti atcunyuka ku madawo ace, mbwenye toera kupangiza kuti asafuna kucita cifuniro ca Babace. (Ahebere 10:5-7) Yezu akhacita basa yakupala matabwa, mbwenye cincino ukhadafika ndzidzi wakucita basa idatumwa iye na Babace wakudzulu toera kudzaicita pa dziko yapantsi. Kodi Juwau akhadziwa kuti ciripo cikhafuna kucitika mu ndzidzi ukhabatiza iye Yezu?

Onani pidalonga Juwau patsogolo pace: “Ule adandituma toera kubatiza anthu m’madzi, andipanga: ‘Ungaona nzimu wakucena mbutcita pana munthu mbupitiriza kukhala pana iye, unoyu ndiye anabatiza na nzimu wakucena.’” (Juwau 1:33) Natenepa Juwau akhadikhira kuti nzimu wa Mulungu unatcita pana munthu akhabatiza iye. Na thangwi ineyi, ndzidzi udabuluka Yezu m’madzi, Juwau panango nee adzumatirwa pidaona iye ‘nzimu wa Mulungu mbutcita ninga nkhangaiwa mbudza kuna Yezu.’—Mateu 3:16.

Kusiyapo pyenepi, mu ndzidzi ukhabatizwa Yezu, ‘kudzulu kwafunguka.’ Pyenepi pikhabvekanji?  Pikhabveka kuti pikhabatizwa iye, akhakumbuka pinthu pyonsene pikhacita iye mbali kudzulu. Yezu akhakumbuka umaso wace pikhali iye kudzulu ninga mwana wauzimu wa Yahova, kuphatanizambo undimomwene udapfundziswa iye na Mulungu mbadzati kubwera pa dziko yapantsi.

Pontho mu ndzidzi udabatizwa Yezu, fala yabuluka kudzulu mbilonga: ‘Uyu ndi mwananga wakufunika anakomerwa na ine.’ (Mateu 3:17) Ikhali fala ya ani? Nee ikhali ya Yezu, thangwi iye akhali penepo na Juwau. Ikhali fala ya Mulungu. Mwandimomwene, Yezu ndi Mwana wa Mulungu, tayu Mulungu ene.

Undimomwene ndi wakuti Yezu ndi mwana wa Mulungu, ninga munthu wakutoma, Adhamu. Pakumala kulonga pya ubatizo wa Yezu, nyakupfundza Luka alemba: ‘Pidatoma Yezu basa yace, iye akhali cifupi na pyaka 30 pyakubalwa. Iye akhali mwana wa Zuze, mwana wa Eli, mwana wa Dhavidhi, mwana wa Abhrahamu, mwana wa Nowa, mwana wa Adhamu, mwana wa Mulungu.’—Luka 3:23-38.

Tenepa ninga Adhamu akhacemerwa ‘mwana wa Mulungu,’ Yezu ndi mwanambo wa Mulungu. Pikhabatizwa Yezu, iye akhatoma uxamwali upswa na Mulungu, mbakhala Mwana wauzimu wa Mulungu. Natenepa Yezu atoma kupfundzisa undimomwene wa Mulungu na kupangiza anthu njira yakuenda ku umaso wakukhonda mala. Buluka penepo pyacitika pinthu pidakulumiza Yezu kupereka umaso wace waunyama ninga ntsembe toera kupulumusa anthu akudawa.