Pati pajumpha myezi 6 kutuliya po Yohane Mubatizi wangwambiya kupharazga, Yesu yo pa nyengu iyi wenga ndi vyaka pafufupi 30, wanguza kwaku iyu ku Msinji wa Yorodani. Kumbi iyu wachichitanganji? Iyu wanguluta kuti wakachezi ndi Yohane cha pamwenga kuchiwona waka mo wabatiziyanga ŵanthu. Kweni Yesu wanguluta kuti Yohane wakamubatizi.

Pakwamba Yohane wangukana kubatiza Yesu ndipu venivi vakuvwika. Iyu wangukamba kuti: “Ini ndini nditenere kubatizika ndi yimwi, sonu yimwi mutuza wuli kwaku ini?” (Mateyu 3:14) Yohane waziŵanga kuti Yesu wenga Mwana wapade waku Chiuta. Kumbukani kuti pa nyengu yo Mariya wanguluta kunyumba yaku Elizabeti, Yohane wanguvuluvunthuka ndi likondwa pa nyengu yo wenga mumoyu mwa anyina. Elizabeti watenere kuti wangumukambiya Yohane nkhani yeniyi. Panyaki Yohane wanguziŵa so vo mungelu wangukamba vakukwaskana ndi kuwa kwaku Yesu kweniso kuti angelu anguwoneke kwa aliska usiku wo Yesu wanguwiya.

Yohane wanguziŵa kuti wabatizanga ŵanthu wo alapa maubudi ngawu. Kweni Yesu wengavi ubudi wewosi. Chinanga kuti Yohane wangukana, Yesu wangumukambiya kuti: “Sonu pe, zomereza chifukwa nkhwakwenere kuti isi tifiski urunji wosi mu nthowa yeniyi.”—Mateyu 3:15.

Ntchifukwa wuli Yesu wakhumbikanga kubatizika? Yesu wangubatizika kuti walongo kulapa cha, kweni wangubatizika kuti walongo kuti watijipereka kuti wachiti khumbu la Awisi. (Aheberi 10:5-7) Kuvuli kosi uku, Yesu wagwiranga ntchitu ya ukalipentala. Kweni sonu nyengu yingukwana kuti wayambi kugwira ntchitu yo Awisi akuchanya angumutuma kuti wazichiti pacharu chapasi. Kumbi Yohane waziŵanga kuti pachitikengi chinthu chinyaki chakuziziswa pa nyengu yo wabatizanga Yesu?

Pati pajumpha nyengu, Yohane wangulemba kuti: “Yo wakundituma kuti ndibatizengi mumaji ndiyu wangundikambiya kuti: ‘Munthu yo wakumuwona kuti mzimu utimusikiya ndi kuja paku iyu, mweniyo ndiyu wabatiza ndi mzimu wakupaturika.’” (Yohane 1:33) Mwaviyo, Yohane walindizanga kuti mzimu waku Chiuta uzengi pa munthu munyaki yo iyu wamubatizengi. Mphakuvwika kuti Yesu wachizuwuka mumaji, Yohane wanguzizwa cha wati wawona “mzimu waku Chiuta uchisika nge nkhunda ndi kuza paku Yesu.”—Mateyu 3:16.

Kweni ndi vinthu venivi pe cha vo vinguchitika pa nyengu yo Yesu wabatizikanga. ‘Kuchanya kungumujulikiya.’ Kumbi ivi ving’anamuwanji? Venivi ving’anamuwa kuti pa nyengu yo Yesu wabatizikanga, wangwamba  kukumbuka vinthu vo vachitikanga kuchanya. Yesu wakumbukanga umoyu waki nge mwana wauzimu waku Yehova kweniso fundu za uneneska zo Chiuta wamusambizanga pa nyengu yo wenga kuchanya.

Kusazgiyapu yapa, pa nyengu yo Yesu wabatizikanga, kuchanya kunguvwika mazu ngakuti: “Uyu ndi Mwana wangu, mweniyo nditanja, yo watindikondwesa.” (Mateyu 3:17) Kumbi ndiyani yo wangukamba mazu ngenanga? Ndi Yesu cha yo wangukamba mazu yanga chifukwa iyu wenga ndi Yohane pa nyengu iyi. Mazu yanga ngenga ngaku Chiuta. Ivi vilongore limu kuti Yesu ndi Mwana waku Chiuta. Iyu ndi Chiuta cha.

Yapa viwoneke limu kuti Yesu wenga mwana waku Chiuta yo wangubalika kuja munthu nge po Adamu wenge. Luka wati wakonkhosa vinthu vo vinguchitika pa nyengu yo Yesu wabatizikanga, iyu wangulemba kuti: “Yesu wangwamba ntchitu yaki we ndi vyaka pafufupi 30. Ŵanthu akambanga kuti wenga mwana waku Yosefi, mwana waku Heli, . . . mwana waku Davidi, . . . mwana waku Abrahamu, . . . mwana waku Nowa, . . . mwana waku Adamu, mwana waku Chiuta.”—Luka 3:23-38.

Mwakuyanana ndi Adamu, Yesu wenga munthu kweniso “mwana waku Chiuta.” Yesu wati wabatizika, wanguja pa ubwezi wasonu ndi Chiuta ndipu wanguja Mwana wauzimu waku Chiuta. Mwaviyo, Yesu wangwamba kusambiza uneneska waku Chiuta kweniso kulongo nthowa yakuluta ku umoyu. Sonu, Yesu wangwamba ntchitu yo yatingi yichitisengi kuti wapereki umoyu waki wa umunthu nge sembi kuti wawombo ŵanthu ku maubudi ngawu.