Nuuvira myeeri 6 Yohani Mbatiza olaleeryaka, Yesu yoowo aarina iyaakha 30, aahirowa wa Yohani, oMuro Yordani. Mwaha wa xeeni? Khahiyo wira aarowa opasiyari paahi aahiiso omuxukurya mpatthani awe. Nave khaaronwe oweha moota eetta aya muteko wa Yohani. Masi, Yesu aaphavela obatiziwa.

Vano Yohani aahikhootta ohimyaka wira: “Ti miyo kiphwanenle obatiziwa ni nyuwo: vano nyuwo munkirwela miyo?” (Matheyo 3:14) Yohani aahisuwela wira Yesu, Mwaana a vameekhaaya a Muluku. Muupuweleke wira Maria omurupanle ene Yesu, aahirowa omuxukurya Elizabeti, nto Yohani aahitannyeya ni otteeliwa murima mmirimani mwa Elizabeti. Moohaaniherya, Elizabeti aahimuleela Yohani etthu eyo. Woonasa wene, Yohani aahisuwela itthu malaikha yaahimmye aya sa oyariwa wa Yesu. Nave aahisuwela wira malaikha makina yaahaakhumelela amakampusi ohiyu ole Yesu aayariwe awe.

Yohani aanisuwela wira aabatiza atthu yaale yaattharunwe itampi saya. Masi Yesu khaarina etampi. Hata Yohani aakhoottale, Yesu aahimukhanyererya oriki: “Muhikhotté vano: ti siso sinrerelaya wettela sothene sintthunawe Muluku”.​—Matheyo 3:15.

Xeeni vaatthuneya aya Yesu obatiziwa? Khahiyo wira Yesu aabatiziwa mwaha woottharuwa soottheka sawe. Masi obatizo awe waathoonyerya wiivahererya wira opakeke yootthuna ya Tiithi awe. (aHéberi 10:5-7) Yesu aari kalapintero. Masi vano, waahiphiya okathi wira opacerye muteko woolaleerya, aarummwale awe ni Tiithi awe a wiirimu. Niireke Yohani aanoona wira yaamukhumelela etthu yootikiniha okathi ambatiza awe Yesu?

Muhoolo mwaya, Yohani aahimmye wira: “Nto Ole okirumme obatiza ni màsi t’ukilènle wira: ‘Nyuwo munimona eroho [munepa] emukhuruwelaka mutthu, yemelaka vasulu vawe. Mutth’uwo t’ule onrowa obatiza’” ni munepa wootteela. (Yohani 1:33) Tivonto, Yohani aaniwehererya wira munepa wa Muluku wammukhuruwela ole aarowa awe ombatiza. Vaavo Yesu aakhuma awe mmaasini, Yohani khaatikhinne okathi aaweha awe munepa wa Muluku ‘okhuruwaka ntoko epomba, emurwelaka [Yesu]’.​—Matheyo 3:16.

Nave, okathi Yesu aabatiziwa awe yaahikhumelela etthu ekina. “Wirimu wahitthukuwa”.  “Eyo yaataphulela exeeni? Yaataphulela wira okathi Yesu aabatiziwa awe, muupuwelelo aarina awe ohinatthi orwa valaponi waahimutthikela. Vano Yesu aanuupuwela okumi awe womunepani, ohela muhina ikeekhai Muluku aamwiixuttinhe awe ohinatthi orwa valaponi.

Nave-tho, obatizo wa Yesu naahikhuma nsu wiirimu nihimyaka wira: “Ola Mwan’aka onimphentexaka: miyo kosiveliwa ni yowo”. (Matheyo 3:17) Nsu nne naari nawani? Khahiyo naari nsu na Yesu; maana okathi ole Yesu aari ni Yohani. Masi nsu nlo naari na Muluku. Mwekeekhai, Yesu ti Mwaana a Muluku, ohiya Muluku.

Tthiri ntoko pinaatamu, Yesu aari mwaana a Muluku, siisaale Adamu aari awe mwaana a Muluku. Olavulaka obatizo wa Yesu, murummwa Luka, olempe so: “Okathi Yesu aapacenrya’awe miteko s’awe, aarina iyaakha wattamela miloko miraru. Aari mwaana a Yosefe ntoko suupuweliw’aya. Yosefe mwaana a Heli, . . . mwaana a Taviti, . . . Mwaana a Aparahaamu, . . . mwaana a Noowe, . . . mwaana a Atamu, Atamu mwaana a Muluku”.—Luka 3:23-38. Waataana wa Naanaano.

Ntoko siisaale Adamu aari awe “mwaana a Muluku”, nave Yesu mwaana a Muluku. Okathi Yesu aabatiziwa awe, aahitthikela wataana ni Muluku, khukhala Mwaana oomunepani a Muluku. Tivonto, ookhalana ehakhi ya wiixuttiha ekeekhai ya Muluku ni owooniherya atthu ephiro eniphwanyiha okumi. Okathi ole, Yesu aahiivahererya wira opakeke otthuna wa Muluku. Nave, wanikisa waya anvaha okumi awe wira owoopole apinaatamu otheene.