Mga unom ka bulan na nga nagsisinangyaw hi Juan nga Parabaptis han hi Jesus, nga mga 30 anyos na, kinadto ha iya ha Salog Jordan. Kay ano? Diri la basi bumisita hin sangkay. Diri la liwat basi hibaroan an pag-uswag han buruhaton ni Juan. Lugod naghangyo hi Jesus nga bawtismohan hiya ni Juan.

Natural la nga bumaribad hi Juan: “Ako an kinahanglan mo bawtismohan, pero ikaw an napakanhi ha akon?” (Mateo 3:14) Maaram hi Juan nga hi Jesus an espesyal nga Anak han Dios. Hinumdumi nga han iginbuburod hi Juan han iya nanay nga hi Elizabeth, nagkiwa hiya tungod ha kalipay han binisita hi Maria nga burod kan Jesus. Sigurado nga ginsumatan hiya han iya nanay mahitungod hini. Ngan hinbaroan liwat niya an mahitungod han pagpahibaro han anghel han katawo ni Jesus ngan han pagpakita han mga anghel ha mga paraataman hin karnero ha gab-i nga natawo hi Jesus.

Maaram hi Juan nga an bawtismo nga iya ginhihimo para hadton nagbabasol han ira mga sala. Pero hi Jesus waray sala. Bisan kon binaribad hi Juan, hi Jesus nag-insister: “Ayaw ako pagpugngi, kay hini nga paagi kinahanglan buhaton naton an ngatanan nga matadong.”—Mateo 3:15.

Kay ano nga angayan la nga bawtismohan hi Jesus? An iya bawtismo diri nagsisimbolo ha pagbasol han mga sala. Iginpapakita hito nga iya iginpipresentar an iya kalugaringon ha pagbuhat han kaburut-on han iya Amay. (Hebreo 10:5-7) Panday hi Jesus, pero panahon na basi tikangan niya an ministeryo nga iginpapabuhat han iya langitnon nga Amay nga nagsugo ha iya nganhi ha tuna. Ha imo hunahuna, naglalaom ba hi Juan nga may urusahon nga mahitatabo kon bawtismohan niya hi Jesus?

Ini an siring ni Juan: “An Dios nga nagsugo ha akon nga magbawtismo ha tubig nagsiring ha akon, ‘Kon makita mo an espiritu nga nalusad ngan nagpapabilin ha iya, ini hiya an nagbabawtismo pinaagi han baraan nga espiritu.’ ” (Juan 1:33) Salit naglalaom hi Juan nga malusad an espiritu han Dios ha usa nga iya babawtismohan. Kon sugad posible nga waray na hiya mahipausa han nakita niya an “espiritu han Dios nga sugad hin sarapati nga nalusad ngada kan Jesus” han hinaw-as hi Jesus ha tubig.—Mateo 3:16.

Kondi labaw pa hito an nahitabo durante han bawtismo ni Jesus. An Kasuratan nasiring: “Naabrihan an langit” ngada ha iya. Ano an iginpapasabot hini? Posible nga nagpapasabot ini nga han ginbabawtismohan hiya, nahibalik ha iya hunahuna an iya kinabuhi ha langit. Salit, nahinumdoman niya an iya kinabuhi sugad nga espiritu nga anak ni Jehova, pati an mga kamatuoran nga igintutdo ha iya han Dios didto ha langit antes hiya kumanhi ha tuna.

Dugang pa, han ginbawtismohan hi Jesus, may tingog ha langit nga nagsiring: “Ini an akon Anak nga hinigugma, nga akon nalilipayan.” (Mateo 3:17) Kan kanay ito tingog? Diri ito kan Jesus tungod kay kaupod hiya ni Juan. Tingog ito han Dios. Matin-aw, hi Jesus an Anak han Dios. Diri hiya an Dios.

Makatirigamnan nga han nakanhi hi Jesus ha tuna, tawo hiya nga anak han Dios, sugad la han siyahan nga tawo nga hi Adan. Katapos isaysay han disipulo nga hi Lucas an bawtismo ni Jesus, hiya nagsurat: “Han nagtikang hi Jesus ha iya buruhaton, 30 anyos na hiya. Sumala han ginhuhunahuna han mga tawo, hiya an anak ni Jose, nga anak ni Heli, . . . nga anak ni David, . . . nga anak ni Abraham, . . . nga anak ni Noe, . . . nga anak ni Adan, nga anak han Dios.”—Lucas 3:23-38.

Hi Adan tawo nga “anak han Dios,” sugad man hi Jesus. Han ginbawtismohan hi Jesus, nagkaada hiya bag-o nga relasyon ha Dios, nagin espirituwal nga Anak hiya han Dios. Salit, maitututdo ni Jesus an kamatuoran mahitungod ha Dios ngan maipapakita niya an dalan ngadto ha kinabuhi. Gintikangan niya an buruhaton nga magriresulta ha paghalad han iya tawhanon nga kinabuhi para ha makasasala nga katawohan.