KAPITE 12
Te Papitema ʼo Sesu
MATEO 3:13-17 MALEKO 1:9-11 LUKA 3:21, 22 SOANE 1:32-34
-
ʼE PAPITEMA IA SESU PEA ʼE FAKANOFO ʼAKI TE LAUMALIE MAʼONIʼONI
-
ʼE TALA E SEHOVA KO SESU ʼE KO TONA ʼALO
Hili teitei mahina ʼe ono ki te kamata faifakamafola ʼa Soane Patita, pea fakaovi leva Sesu ki te Vai Tafe ʼo Solotane, ko tona teitei taʼu 30 ʼaia. Kotea tona tupuʼaga? Neʼe mole haʼu pe ʼo fakasiosio ia Soane pea mo te tuputupu ʼo tana gaue. Kaʼe neʼe haʼu Sesu ʼo kole kia Soane ke ina papitemaʼi ia ia.
ʼE mahino ia neʼe mole loto ia Soane ki ai, ʼo ina ui fenei: “Ko koe ʼae ʼe tonu ke ke papitemaʼi au, kaʼe he koʼe ʼe ke haʼu koe kia au?” (Mateo 3:14) Neʼe iloʼi e Soane ko Sesu ʼe ko te ʼAlo ʼo te ʼAtua. ʼE ke manatuʼi ʼi te temi ʼae neʼe kei nofo ai ia Soane ʼi te fatu ʼo Elisapeta tana faʼe, neʼe hopohopo fakafiafia ʼi te temi ʼae neʼe haʼu ai Malia ʼo fakasiosio tana faʼe. Neʼe kua fuafatuʼi e Malia ia Sesu. ʼE mahino ia neʼe fakamatala age e Elisapeta kia Soane te faʼahi ʼaia. Pea neʼe ina toe iloʼi foki neʼe fakaha age e te ʼaselo ko Kapeliele kia Malia te tupu ʼa Sesu, pea mo te ha ʼa te ʼu ʼaselo ki te kau tauhi ovi ʼi te po ʼae neʼe tupu ai Sesu.
Neʼe mahino kia Soane, ko natou ʼae neʼe ina papitemaʼi neʼe natou fakahemala ki ʼanatou agahala. Kaʼe neʼe mole he agahala ʼa Sesu. Logo la te mole loto ʼa Soane ki ai, kaʼe neʼe ui fenei age e Sesu: “Tuku ke hoko te meʼa ʼaeni, he ʼe tuha ke ta fakahoko feia te ʼu meʼa fuli ʼae ʼe totonu.”—Mateo 3:15.
He koʼe neʼe tonu ke papitema ia Sesu? Neʼe mole fakaʼuhiga te papitema ʼo Sesu ki te fakahemala mai te ʼu agahala. Kaʼe neʼe ina fakaha ʼi tana papitema tana fai leva te finegalo ʼo tana Tamai. (Hepeleo 10:5-7) Ki muʼa atu, ko tana gaue neʼe ko te tufuga ʼakau. Kaʼe ʼi te temi leva ʼaeni kua tonu ke ina kamata fakahoko tona minisitelio ʼae neʼe tupu ai tona fekauʼi mai ki te kele e tana Tamai ʼae ʼi selo. ʼI tau manatu la, neʼe ʼamanaki koa ia Soane ʼe hoko he aluʼaga makehe ʼi te temi ʼae neʼe ina papitemaʼi ai Sesu?
Neʼe fakamatala fenei e Soane ki muli age: “Ko Ia ʼae neʼe ina fekauʼi mai au ke au faipapitema ʼaki te vai, neʼe ina ui fenei mai: ‘Ko ia ʼae ka ke sio ʼe hifo ifo anai ki ai te laumalie maʼoniʼoni pea mo nofo ai, ʼe ko ia ʼae ʼe faipapitema ʼaki te laumalie.’ ” (Soane 1:33) Koia neʼe ʼamanaki ia Soane ʼe hifo ifo anai ia te laumalie ʼo te ʼAtua ki he tahi ka ina papitemaʼi. ʼI te hake ake ʼa Sesu mai te vai, neʼe lagi mole punamaʼuli ia Soane ʼi tana sio “ki te laumalie ʼo te ʼAtua ʼe hifo ifo kia [Sesu] ohage ko he lupe.”—Mateo 3:16.
Kaʼe neʼe ʼi ai te tahi age ʼu meʼa neʼe hoko ʼi te papitema ʼa Sesu: “Neʼe ava leva te lagi.” Kotea tona fakaʼuhiga? Ko tona fakaʼuhiga, ʼi te papitema ʼa Sesu, neʼe lagi ina manatuʼi ai tona maʼuli ʼae ʼi selo, ʼi muʼa ʼo tana haʼu ki te kele. Neʼe ina toe manatuʼi ai tona ʼuhiga foha fakalaumalie ʼo Sehova, ʼo feia mo te ʼu moʼoni ʼae neʼe akoʼi age ki ai e te ʼAtua ʼi selo.
Pea ʼi te papitema ʼa Sesu, neʼe ui fenei e te leʼo mai te lagi: “Ko toku ʼAlo ʼaeni, toku ʼofaina, ʼae ʼe au fiafia ai.” (Mateo 3:17) Neʼe ko te leʼo ʼaia ʼo ai? Neʼe mole ko te leʼo ʼo Sesu he neʼe tutuʼu ia mo Soane. Neʼe ko te leʼo ia ʼo te ʼAtua. ʼE tou mahino ai, ko Sesu ʼe ko te ʼAlo ʼo te ʼAtua, kaʼe ʼe mole ko ia te ʼAtua.
ʼE lelei hatatou fakatokagaʼi ko Sesu neʼe ko te foha ʼo te ʼAtua ʼi te temi ʼae neʼe maʼuli ai ʼi te kele ohage ko he tagata, ohage pe ko Atama, te ʼuluaki tagata. ʼI tana ʼosi fakamatala te papitema ʼo Sesu, neʼe tohi fenei e te tisipulo ko Luka: “ ʼI te kamata e Sesu tana gaue, neʼe kua teitei taʼu 30. Pea ki te manatu ʼa te hahaʼi neʼe ko te foha ʼo Sosefo, foha ʼo Eli, . . . foha ʼo Tavite, . . . foha ʼo Apalahamo, . . . foha ʼo Noe, . . . foha ʼo Atama, foha ʼo te ʼAtua.”—Luka 3:23-38.
Ohage pe ko Atama ʼae neʼe ko te “foha ʼo te ʼAtua,” neʼe toe feia pe mo Sesu ʼi tana ʼi te kele. ʼI tana papitema, neʼe mahino ai ia Sesu ko ia ko te ʼAlo ʼo te ʼAtua pea ʼe liliu anai ko he laumalie ʼi selo. Koia neʼe feala ai leva kia Sesu ke ina akoʼi te ʼu moʼoni ʼo ʼuhiga mo te ʼAtua pea mo ina fakaha te ala ʼae ʼe ina taki ki te maʼuli. Neʼe kamata ai leva e Sesu tana gaue, ʼae ka iku anai ki tana foaki ia tona maʼuli ko he sakilifisio maʼa te malama agahala.