Maʼ ziné Juan Bautista xhoopaʼ beeu de cayuni predicar, ne yeyubi Jesús laa ra guiiguʼ Jordán, para tiempu riʼ maʼ napa Jesús biaʼ 30 iza. Peru cadi yeyubi Jesús laabe para ganna ximodo nuube o para ganna ximodo zeʼ dxiiñaʼ ni cayúnibe que, sínuque guyé Jesús para guinabaʼ cúʼnisa Juan laa.

Nánnanu qué ninagá Juan ñúnini, ngue runi guníʼ: «Lii nga naquiiñeʼ cúʼnisaluʼ naa, yanna, ¿lii zeedaluʼ ra nuaaʼ la?» (Mateo 3:14). Nánnabe Xiiñiʼ Dios Jesús. Nuunu seguru gudxi Elisabet Juan, xi bizaaca dxi nacaxiiñiʼ laabe, de tantu cayéchebe dede guchésabe ndaaniʼ Elisabet ora yeganna María laa, dxi nacaxiiñiʼ Jesús. Zándaca despué gunna Juan guníʼ ti ángel zale Jesús ne gueelaʼ gule Jesús bihuinni caadxi ángel nezalú caadxi pastor.

Nanna Juan ca binni ni maʼ guca arrepentir de ca pecadu stiʼ nga naquiiñeʼ chúʼnisa, peru Jesús qué huayuu dxi guchee. Neca qué naʼ Juan cúʼnisa Jesús, peru gúdxibe laa: «Cadi gucueezaluʼ naa, purtiʼ sicaríʼ nga zanda gúninu guiráʼ ni jneza» (Mateo 3:15).

¿Xiñee caquiiñeʼ chúʼnisa Jesús? Cadi cayúnibe ni para gusihuínnibe maʼ guca arrepentirbe de ca pecadu stibe, sínuque para guluiʼbe Bixhózebe ni nuu guibáʼ zúnibe ni ná (Hebreos 10:5-7). Biʼniʼ Jesús dxiiñaʼ de carpinteru, peru yanna maʼ chiguni dxiiñaʼ ni bidii Bixhoze laa guni lu Guidxilayú. ¿Ñee cabeza Juan guizaaca xiixa cosa risaca ora cúʼnisa Jesús la?

Juan guníʼ despué: «Peru ni biseendaʼ naa guneʼ bautizar ndaaniʼ nisa gudxi naa: “Ni gúʼyaluʼ guiete ne guiaana espíritu luguiáʼ, ngue nga ni runi bautizar né espíritu santu”» (Juan 1:33). Cabeza Juan guiete espíritu stiʼ Dios luguiáʼ tuuxa ni cúʼnisa. Nga runi, zándaca qué nidxagayaa Juan ora biʼyaʼ «zedayete espíritu stiʼ Dios casi ti paloma luguiáʼ Jesús» biree si de ndaaniʼ nisa que (Mateo 3:16).

Peru bizaaca sti cosa: bixeleʼ guibáʼ. ¿Xi riníʼ ndiʼ yaʼ? Zándaca riniʼni ora guyuunisa Jesús,  bietenalaʼdxiʼ modo bibani guibáʼ casi Xiiñiʼ Jehová né ti cuerpu de espíritu, ne laaca bietenaláʼdxibe guiráʼ ni bisiidiʼ Dios laabe ante gueedabe lu Guidxilayú.

Ne ora guyuunísabe que, gucuá ti ridxi de guibáʼ, ná: «Ndiʼ nga Xiiñeʼ ni nadxieeʼ; ni rusiecheʼ naa» (Mateo 3:17). ¿Tu stidxi ngue yaʼ? Cadi stiʼ diʼ Jesús ni purtiʼ nuube ra nuu Juan. Stidxi Dios ni, nga rusihuinni cadi Jesús diʼ nga Dios, sínuque Xiiñiʼ Dios laa.

Laaca guca Jesús Xiiñiʼ Dios dxi guyuu lu Guidxilayú cásica guca Adán. Despué de bizeeteʼ Lucas xi bizaaca ora guyuunisa Jesús, guníʼ: «Napa Jesús biaʼ 30 iza dxi bizulú cayuni dxiiñaʼ stiʼ. Ne casi ná binni, laabe nga xiiñiʼ José, xiiñiʼ Helí, [...] xiiñiʼ David, [...] xiiñiʼ Abrahán, [...] xiiñiʼ Noé, [...] xiiñiʼ Adán, xiiñiʼ Dios» (Lucas 3:23-38).

Naca Jesús Xiiñiʼ Dios cásica guca Adán. Peru ora guyuunísabe que gúnnabe zácabe Xiiñiʼ Dios de espíritu guibáʼ. Nga runi, dede dxi que guyuube tobi si né Dios. Yanna, maʼ zanda gusiidibe ni dxandíʼ de Dios ne guluiʼbe binni neza para guicaa guendanabani. Ra guyuunísabe que, bisihuínnibe maʼ zanda gudiibe xquendanabánibe pur binni Guidxilayú.