Kenca Jesus iperidiken Johanes, minter ibabai kesah si badia Dibata ia ku taneh mesawang i Judea. Melala kel si man ukurenna. Sanga Jesus iperidiken, “terbuka langit.” (Matius 3:​16) Emaka gundari, banci iinget Jesus mulihi kerina si pernah ilakokenna bage pe si ipelajarina sanga ia i surga. Pasti melala kel si man ukurenna!

Lit 40 wari 40 berngi dekahna Jesus i taneh mesawang. Paksa si e, kai pe la ipanna. Sanga melihe kel Jesus, reh Setan si Iblis ncubai ia, nina, “Adi anak Dibata kin kam, suruh dage batu-batu enda jadi roti.” (Matius 4:3) Iteh Jesus maka salah adi ipakena kuasana guna kepentingenna sendiri. Emaka la ia nggit ngelakokenca.

Aminna pe bage Iblis la nyerah. Icubakenna cara si deban. Isuruhna Jesus ndabuhken bana arah ingan si meganjangna i rumah pertoton. Tapi, la nggit Jesus ngelakokenca sebap si e bali bagi pejago-jagoken. Alu melasken ayat i bas Kitap si Badia nari, ikataken Jesus maka la banci sicubai Dibata.

I bas percuban si peteluken, icidahken Iblis man Jesus “kerina kerajan doni enda ras kemulianna” janah nina, “Kerina enda banci kubereken man bandu adi erjimpuh kam janah nembah sekali saja man bangku.” Sekali nari, itulak Jesus ka ia, janah nina, “Laweslah Setan!” (Matius 4:​8-​10) La ia nyerah man percuban e sebap itehna maka pelayanen si badia arus ibereken man Jahwe saja ngenca. Ipilih Jesus tetap setia man Dibata.

Lit pelajaren si banci sidatken arah piga-piga percuban si iadapi Jesus, bage pe arah cara Jesus mereken jawapen. Siteh maka Iblis enda mahluk roh si tuhu-tuhu lit. Adi kin Iblis enda sipat jahat bagi si ikataken piga-piga kalak, la mungkin banci icubaina Jesus. Siteh ka maka kerina pemerentahen doni enda situhuna jang Iblis, janah doni enda lit i bas kuasana, adi lang, ngkai maka banci iberekenna atena si e kerina man Jesus?

Kenca si e, ikataken Iblis maka adi nggit Jesus nembah ia sekali saja, ibereken Iblis man Jesus hadiah, eme kerina kerajan doni enda. Banci saja Iblis pe make cara si seri guna ncubai kita. Misalna, iberekenna kesempaten gelah jadi kalak bayak, erkuasa, ntah pe jadi kalak penting. Tapi la soal percuban kai pe si lit i bas kita, usihlah Jesus si tetap setia man Dibata! Ingetlah, iulihi Setan ka ncubai Jesus adi “lit kesempaten si cocok.” (Lukas 4:​13) Enda pe banci saja terjadi man banta, emaka kita arus terus erjaga-jaga.