Ke ndondo oro John enịmde Jesus baptism ama, spirit Abasi ada enye aka wilderness ke Judea. Enye enyene ediwak n̄kpọ nditie n̄kere. Ke ini enye akanade baptism, ‘enyọn̄ ama eberede.’ (Matthew 3:16) Oro ama anam enye eti mme n̄kpọ oro enye ekekpepde ye se enye ekesinamde ke heaven. Ke akpanikọ, enye enyene ediwak n̄kpọ nditie n̄kere.

Jesus odu ke wilderness ke okoneyo 40 ye uwemeyo 40. Enye idiaha n̄kpọ ndomokiet ke ini emi. Ke ini biọn̄ enen̄erede ọdọn̄ enye, Satan kpa Devil aka okodomo enye ete: “Edieke afo edide eyen Abasi, dọhọ mme itiat emi ẹkabade mme ebok uyo.” (Matthew 4:3) Jesus ọfiọk ke ifọnke imọ ida utịbe utịbe odudu oro Abasi ọnọde imọ inam n̄kpọ ke ufọn idem imọ, ntre enye imaha ndinam se Satan ọdọhọde enye anam.

Devil itreke do. Enye odomo Jesus ke usụn̄ en̄wen. Enye ọdọhọ Jesus osio idemesie ke enyọn̄ temple ọduọk ke isọn̄. Edi Jesus idehedei inam utọ n̄kpọ oro. Jesus ada N̄wed Abasi owụt enye ke ifọnke ndidomo Abasi ke utọ usụn̄ emi.

Ọyọhọ idomo ita emi Devil odomode Jesus edi ndimen enye n̄kowụt “kpukpru mme obio ubọn̄ ererimbot ye ubọn̄ mmọ,” nnyụn̄ ndọhọ enye ete: “Nyọnọ fi kpukpru n̄kpọ emi edieke afo ọduọde ke isọn̄ atuak ibuot ọnọ mi.” Isan̄ emi n̄ko, Jesus esịn enọ emi onyụn̄ ọdọhọ enye ete: “Daha mi, Satan!” (Matthew 4:8-10) Jesus inyịmeke ndinam idiọkn̄kpọ, enye ọfiọk ke Jehovah kpọt ke inyene ndinam edisana utom nnọ. Ke akpanikọ, Jesus ebiere ndika iso nnam n̄kpọ Abasi.

Imekeme ndikpep n̄kpọ nto mme idomo emi ye nte Jesus anamde n̄kpọ ke ini idomo emi. Emi ekedi ata idomo. Oro owụt ke Satan idịghe idiọkn̄kpọ emi esịnede owo ke esịt nte ndusụk owo ẹdọhọde. Enye edi ata owo, edi nnyịn ikemeke ndikụt enye. Mbụk emi ekpep nnyịn n̄ko ke Devil enyene ukara ererimbot emi, enye ada mme andikara ererimbot emi usụn̄. Mîkpedịghe ntre, owo ikpọdọhọke ke enye ndikoyom ndiyak mmọ nnọ Christ ekedi idomo.

Devil ọkọdọhọ n̄ko ete ke imọ iyọnọ Jesus n̄kpọ edieke enye ọduọde ke isọn̄ atuak ibuot ọnọ imọ ini kiet kpọt. Enye ama akam ọn̄wọn̄ọ ndinọ Jesus kpukpru mme obio ubọn̄ ererimbot. Devil ekeme ndida utọ usụn̄ emi ndomo nnyịn, enye ekeme ndinam inyene ererimbot emi, odudu, m̀mê uwọrọiso, ọdọn̄ nnyịn. Ọfọn ikpebe uwụtn̄kpọ Jesus emi ọkọsọn̄ọde ada ye Abasi ke ini idomo. Ti ete ke Devil ama adaha ọkpọn̄ Jesus “tutu ifet afiak eberede.” (Luke 4:13) Ukem n̄kpọ emi ekeme nditịbe nnọ nnyịn, ntre ana ika iso idu ke ukpeme.