Be ni Yohane baptisi Yesu lɛ sɛɛ nɔŋŋ lɛ, Nyɔŋmɔ mumɔ lɛ kpala Yesu kɛtee Yudea ŋa lɛ nɔ. Yesu yɛ nibii babaoo ni esa akɛ esusu he. Be ni abaptisi Yesu lɛ, “ŋwɛi naa gbele.” (Mateo 3:16) Enɛ baanyɛ ehã ekai nibii ni ekase kɛ nibii ni efee be ni eyɔɔ ŋwɛi lɛ. Hɛɛ, nibii babaoo yɛ ni esa akɛ Yesu ajwɛŋ nɔ!

Yesu ye shwaneshwane kɛ nyɔɔŋnyɔɔŋ gbii 40 yɛ ŋa lɛ nɔ. Yɛ nakai be lɛ mli lɛ, eyeee nɔ ko nɔ ko. Kɛkɛ ni be ni hɔmɔ miiye Yesu waa lɛ, Satan Abonsam ba eŋɔɔ ebaka lɛ ekɛɛ: “Kɛ́ Nyɔŋmɔ bi ji bo lɛ, kɛɛmɔ tɛi nɛɛ koni amɛtsɔmɔ aboloi.” (Mateo 4:3) Akɛni Yesu le akɛ ejaaa akɛ ekɛ hewalɛ ni eyɔɔ lɛ baatsu nibii ni lɛ diɛŋtsɛ eshweɔ lɛ ahe nii hewɔ lɛ, ekpoo nakai efɔŋ he kaa lɛ.

Abonsam kɛwaaa jɛmɛ. Eka gbɛ kroko ekwɛ. Etswa Yesu mpoa akɛ etu kɛjɛ sɔlemɔwe lɛ yiteŋ afabaŋ lɛ nɔ kɛyi shi. Shi Yesu ekpɛlɛɛɛ akɛ ebaafee naakpɛɛ nii ni tamɔ nɛkɛ etsɔɔ. Yesu tsɛ ŋmalɛi ayisɛɛ kɛtsɔɔ akɛ, ejaaa akɛ abaaka Nyɔŋmɔ yɛ nɛkɛ gbɛ nɔ.

Agbɛnɛ, yɛ kaa ni ji etɛ lɛ mli lɛ, Abonsam kɛ “jeŋ maŋtsɛyelii lɛ fɛɛ kɛ amɛnunyam lɛ” tsɔɔ Yesu yɛ gbɛ ko nɔ, ni ekɛɛ lɛ akɛ: “Maŋɔ enɛɛmɛi fɛɛ mahã bo kɛ́ okula shi ojá mi shi kome pɛ.” Shi kome ekoŋŋ lɛ, Yesu kpoo enɛ kwraa, ekɛɛ akɛ: “Jee mihiɛ, Satan!” (Mateo 4:8-10) Eŋmɛɛɛ ehe ehãaa kaa lɛ koni efee efɔŋ, ejaakɛ ele akɛ esa akɛ aŋɔ sɔɔmɔ krɔŋŋ ahã Yehowa pɛ. Hɛɛ, ehala akɛ ebaaya nɔ eye Nyɔŋmɔ anɔkwa.

Wɔbaanyɛ wɔkase nii kɛjɛ efɔŋ he kai nɛɛ kɛ bɔ ni Yesu kpee naa ehã lɛ mli. Kai lɛ ji nɔ ni ba diɛŋtsɛ, ni no tsɔɔ akɛ Abonsam jeee su fɔŋ ko kɛkɛ, taakɛ mɛi komɛi kɛɔ lɛ. Eji mɔ ko ni yɔɔ diɛŋtsɛ ni anaaa lɛ. Amaniɛbɔɔ nɛɛ hu tsɔɔ akɛ, je lɛŋ nɔyelii lɛ ji Abonsam nɔ lɛɛlɛŋ; lɛ ekudɔɔ amɛ. Kɛjeee nakai kulɛ, te aaafee tɛŋŋ ni ekɛ nɔyelii nɛɛ aaahã Kristo ni ekɛka lɛ ni efee efɔŋ lɛ?

Kɛfata he lɛ, Abonsam kɛɛ kɛ́ Yesu já lɛ shi kome pɛ lɛ, ebaajuro lɛ aahu po akɛ, ebaaŋɔ jeŋ maŋtsɛyelii lɛ fɛɛ ehã Yesu. Abonsam baabɔ mɔdɛŋ ni eka wɔ yɛ gbɛ ni tamɔ nakai nɔŋŋ nɔ, ekolɛ ekɛ hegbɛi ni asusuɔ akɛ eyɛ nyam ni baahã wɔtsɔmɔ niiatsɛmɛi, wɔná gbɛnaa, loo hegbɛ yɛ je lɛ mli lɛ baashwie wɔhiɛ. Kɛ́ wɔnyiɛ Yesu nɔkwɛmɔnɔ lɛ sɛɛ ni wɔtee nɔ wɔye Nyɔŋmɔ anɔkwa, ekɔɔɔ he eko efɔŋ he kaa ni wɔkɛbaakpe lɛ, no tsɔɔ akɛ nilelɔi ji wɔ! Shi kaimɔ akɛ, Abonsam shi Yesu dã “kɛyashi be kroko ni sa.” (Luka 4:13) Ebaanyɛ eba lɛ nakai yɛ wɔ hu wɔgbɛfaŋ, no hewɔ lɛ esaaa akɛ wɔŋmɛɔ wɔhiɛ he.