Pagkatapos mabawtismuhan ni Juan si Jesus, gintuytuyan sang espiritu sang Dios si Jesus pakadto sa kamingawan sang Judea. Madamo sia sing dapat hunahunaon. Sang ginbawtismuhan si Jesus, “ang langit nabuksan.” (Mateo 3:16) Gani nadumduman niya ang iya mga natun-an kag ginhimo sa langit. Amo nga madamo gid sia sang pamalandungan!

Naghinguyang si Jesus sing 40 ka adlaw kag 40 ka gab-i sa kamingawan. Sa sina nga tion, wala sia nagkaon. Sang gutom na gid si Jesus, ginsulay sia ni Satanas nga Yawa nga nagasiling: “Kon ikaw anak sang Dios, sugua ining mga bato nga mangin mga tinapay.” (Mateo 4:3) Nahibaluan ni Jesus nga sala nga gamiton ang iya gahom para sa personal nga handum, gani wala sia magpadala sa pagsulay.

Pero wala sia ginluatan sang Yawa. Lain naman nga paagi ang gingamit niya. Ginhangkat niya si Jesus nga maglumpat halin sa pader sang templo. Pero wala magpatentar si Jesus para magpadayawdayaw. Nagkutlo sia sa Kasulatan para ipakita nga sala nga tilawan ang Dios sa sina nga paagi.

Dayon, sa ikatlo nga pagsulay, ginpakita sang Yawa kay Jesus “ang tanan nga ginharian sang kalibutan kag ang gahom kag manggad sini” kag nagsiling: “Ini tanan ihatag ko sa imo kon magyaub ka kag maghimo sing isa ka buhat sang pagsimba sa akon.” Sa liwat, namatok si Jesus nga nagasiling: “Palayo ka, Satanas!” (Mateo 4:8-10) Wala sia magpadala sa pagsulay nga maghimo sang sala kay nahibaluan niya nga si Jehova lamang ang dapat hatagan sing sagrado nga pag-alagad. Nagpabilin sia nga matutom sa Dios.

May matun-an kita sa sini nga mga pagsulay kag sa reaksion ni Jesus. Matuod ang mga pagsulay, gani ang Yawa indi lang isa ka malain nga kinaiya subong sang ginasiling sang pila. Matuod sia nga persona nga indi makita. Ini nga rekord nagapakita man nga ang mga gobierno sang kalibutan iya sang Yawa; sia ang nagakontrol sini. Kay kon indi, paano mangin matuod nga pagsulay ang ginhimo niya sa Cristo?

Isa pa, nagsiling ang Yawa nga kon magsimba si Jesus sa iya bisan sing makaisa lang, ihatag niya kay Jesus bilang padya ang tanan nga ginharian sang kalibutan. Mahimo man kita sulayon sang Yawa sa sini nga paagi, ayhan tanyagan kita sang makagalanyat nga kahigayunan para mangin manggaranon, gamhanan, ukon bantog sa kalibutan. Maalamon gid kita kon sundon naton ang halimbawa ni Jesus nga magpabilin nga matutom sa Dios bisan ano pa ang pagsulay! Pero dumduma nga ginbiyaan sang Yawa si Jesus “kag naghulat sang isa pa ka maayo nga kahigayunan.” (Lucas 4:13) Basi amo man sini ang matabo sa aton, gani dapat kita pirme magbantay.