Iesu ia bapatiso murinai, Dirava ena lauma helaga ese Iudea ena taunimanima lasi gabuna ai ia hakaua lao. Unuseniai gau momo ia laloa diba. Ia bapatiso neganai, “guba ia kehoa.” (Mataio 3:16) Unai amo guba ai ia dibaia bona karaia gaudia ia laloa lou diba. Oibe, Iesu ese do ia laloa dobu gaudia be momo!

Iesu be dina 40 bona hanuaboi 40 taunimanima lasi gabuna ai ia noho neganai, ia aniani lasi. Vadaeni, Iesu be ia hitolo bada neganai, Satani Diabolo ese ia tohoa, ia gwau: “Bema oi be Dirava ena natuna, inai nadi oi hamaoroa paraoa ai do idia lao.” (Mataio 4:3) Iesu ia diba iena siahu be sibona ena ura totona do ia gaukaralaia be maoro lasi, unai dainai unai hahetoho ia dadaraia.

To Diabolo be Iesu ia rakatania lasi. Dala ma ta amo ia tohoa lou. Iesu ia hamaoroa dubu helaga ena atai amo do ia roho diho. To Iesu ia ura lasi hekokoroku dalanai iena siahu do ia hahedinaraia. Ia ese Toretore Helagadia amo ia hahedinaraia Dirava ia tohoa be maoro lasi.

Hahetoho ihatoina ai, Diabolo ese Iesu dekenai “tanobada ena basileia ibounai bona edia hairai ia hahedinaraia,” bona ia gwau: “Inai gaudia ibounai be oi do lau henia, bema oi tui diho bona nega tamona sibona lau oi tomadiho henia.” Iesu be mai lalogoada ida ia gwau: “Satani, oi siri!” (Mataio 4:8-10) Ia be unai hahetoho dekenai ia moru lasi, badina ia diba hesiai gaukara helagana be Iehova sibona dekenai ia henia be maoro. Oibe, Iesu be ena lalona ia hadaia Dirava do ia badinaia noho.

Unai hahetoho toi bona Iesu ena haere amo gau momo ita dibaia. Unai hahetoho be idia vara momokani, unai ese ia hahedinaraia Diabolo be kara dika ta sibona lasi, taunimanima haida ese idia laloa bamona. Ia be ia noho momokani bona ita itaia diba lasi. Danu unai sivarai ese idia hamomokania, tanobada ena gavamani ibounai be Diabolo ena; ia ese ia biagudia. Edena dala ma ta ai Keriso dekenai unai gaudia ia henia karana amo ia hahedinaraia Iesu ia tohoa?

Diabolo ia gwau, bema Iesu ese ia be nega tamona sibona ia tomadiho henia, ia be mai ura ida Iesu dekenai tanobada ena basileia ibounai do ia henia. Unai bamona dala amo Diabolo ese ita do ia tohoa danu, reana dala idauidau amo iseda lalona ia veria, kohu momo, siahu o dagi bada ita abia totona. Aonega dalana be inai: Herevana dahaka hahetoho ita davaria, to Iesu ena haheitalai ita tohotohoa bona Dirava ita badinaia noho be namo! To laloatao, Diabolo ese Iesu “ia rakatania ela bona ma nega namona ta.” (Luka 4:13) Ita dekenai unai bamona ia karaia diba, unai dainai ita gima noho be namo!