ជំពូកទី១៣
ចូររៀនពីរបៀបដែលលោកយេស៊ូតបឆ្លើយចំពោះការល្បួង
ម៉ាថាយ ៤:១-១១ ម៉ាកុស ១:១២, ១៣ លូកា ៤:១-១៣
-
សាថានល្បួងលោកយេស៊ូ
ក្រោយពីលោកយេស៊ូបានទទួលការជ្រមុជទឹកពីយ៉ូហាន ភ្លាមនោះសកម្មពលរបស់ព្រះនាំលោកទៅតំបន់ស្ងាត់ជ្រងំក្នុងស្រុកយូឌា។ លោកមានរឿងជាច្រើនដែលត្រូវគិត។ ហេតុអ្វី? ពីព្រោះពេលលោកយេស៊ូទទួលការជ្រមុជទឹក «មេឃបានបើកចំហ»។ (ម៉ាថាយ ៣:១៦) ដូច្នេះ លោកអាចនឹកចាំនូវអ្វីដែលលោកបានរៀននិងបានធ្វើនៅស្ថានសួគ៌។ លោកពិតជាមានរឿងជាច្រើនដែលលោកត្រូវពិចារណាមែន!
លោកយេស៊ូនៅតំបន់ស្ងាត់ជ្រងំអស់៤០ថ្ងៃនិង៤០យប់។ ក្នុងអំឡុងពេលនោះ លោកមិនបានបរិភោគអ្វីឡើយ។ បន្ទាប់មក ពេលលោកយេស៊ូឃ្លានយ៉ាងខ្លាំង នោះសាថានដែលជាមេកំណាចចូលទៅល្បួងលោក ដោយនិយាយថា៖ «ប្រសិនបើអ្នកជាកូនរបស់ព្រះមែន ចូរបង្គាប់ឲ្យដុំថ្មទាំងនេះក្លាយជានំប៉័ងទៅ»។ (ម៉ាថាយ ៤:៣) ប៉ុន្តែ លោកយេស៊ូជ្រាបថាការប្រើឫទ្ធានុភាពធ្វើអព្ភូតហេតុ ដើម្បីបំពេញសេចក្ដីត្រូវការខាងរូបកាយគឺជាការខុស ដូច្នេះលោកមិនធ្វើតាមការល្បួងរបស់សាថានទេ។
មេកំណាចមិនបានឈប់ត្រឹមនេះទេ។ វាប្រើវិធីមួយទៀត ដោយល្បួងលោកយេស៊ូឲ្យលោតចុះពីកំពែងវិហារ។ ប៉ុន្តែ លោកយេស៊ូមិនបានធ្វើតាមការល្បួង ដែលឲ្យបង្ហាញឫទ្ធានុភាពរបស់លោកនោះឡើយ។ ដោយលើកឡើងបទគម្ពីរ លោកយេស៊ូបញ្ជាក់ថាគឺជាការខុសដែលយើងល្បងលព្រះតាមរបៀបនេះ។
បន្ទាប់មក មេកំណាចល្បួងលោកយេស៊ូជាលើកទី៣ ដោយបង្ហាញលោកនូវ«រាជាណាចក្រទាំងឡាយក្នុងពិភពលោកនិងភាពរុងរឿងរបស់រាជាណាចក្រទាំងនោះ» រួចនិយាយថា៖ «អ្វីៗទាំងនេះខ្ញុំនឹងឲ្យដល់អ្នក ប្រសិនបើអ្នកក្រាបប្រណិប័តន៍ខ្ញុំម្ដង»។ ម្ដងទៀត លោកយេស៊ូបដិសេធភ្លាម ដោយមានប្រសាសន៍ថា៖ «នែ! សាថាន! ចូរទៅឆ្ងាយពីខ្ញុំទៅ!»។ (ម៉ាថាយ ៤:៨-១០) លោកមិនបានទោរទន់ទៅតាមការល្បួងរបស់សាថានទេ ពីព្រោះលោកដឹងថាគឺសម្រាប់តែព្រះយេហូវ៉ាប៉ុណ្ណោះដែលយើងត្រូវបំពេញកិច្ចបម្រើពិសិដ្ឋ។ លោកយេស៊ូបានសម្រេចចិត្តរក្សាភាពស្មោះត្រង់ចំពោះព្រះ។
យើងអាចទាញមេរៀនពីការល្បួងទាំងនេះ និងពីរបៀបដែលលោកយេស៊ូតបឆ្លើយចំពោះការល្បួងទាំងនេះ។ ដោយសារការល្បួងទាំងនោះគឺពិតជាបានកើតឡើងមែន នោះបញ្ជាក់ថាមេកំណាចជាបុគ្គលពិតដែលមនុស្សមិនអាចមើលឃើញ មិនមែនជាទំនោរចិត្តអាក្រក់ដែលមានក្នុងមនុស្ស ដូចអ្នកខ្លះបានអះអាងនោះទេ។ បន្ថែមទៅទៀត កំណត់ហេតុនេះបង្ហាញថា ស្ថាប័ននយោបាយទាំងអស់ក្នុងពិភពលោកគឺជារបស់មេកំណាច ហើយវាជាអ្នកគ្រប់គ្រងស្ថាប័ននយោបាយទាំងនោះ។ ដូច្នេះ វាអាចប្រើរបស់ទាំងនោះដើម្បីល្បួងលោកយេស៊ូ មែនទេ?
បន្ថែមទៅទៀត មេកំណាចនិយាយថាវានឹងឲ្យរង្វាន់លោកយេស៊ូ បើលោកគោរពប្រណិប័តន៍វាម្ដង ហើយវាក៏ហ៊ានរហូតដល់ឲ្យរាជាណាចក្រទាំងឡាយក្នុងពិភពលោកទៅលោកទៀតផង។ មេកំណាចអាចព្យាយាមល្បួងយើងតាមរបៀបស្រដៀងគ្នា។ ឧទាហរណ៍ វាប្រហែលជាបើកឱកាសឲ្យយើងចង់បានទ្រព្យសម្បត្ដិ អំណាច ឬឋានៈជាដើម។ បើយើងធ្វើតាមគំរូរបស់លោកយេស៊ូដោយរក្សាភាពស្មោះត្រង់ចំពោះព្រះ ទោះបីជាយើងជួបនឹងការល្បួងណាក៏ដោយ នោះបង្ហាញថាយើងពិតជាមនុស្សដែលប្រកបទៅដោយប្រាជ្ញាមែន! ប៉ុន្តែ សូមចាំថាពេលមេកំណាចចេញពីលោកយេស៊ូ វារង់ចាំ«រហូតដល់មានឱកាសល្អមួយទៀត»។ (លូកា ៤:១៣) វាក៏ប្រហែលជាធ្វើដូចគ្នាចំពោះយើងដែរ ដូច្នេះសូមឲ្យយើងប្រុងប្រយ័ត្នជានិច្ច។