Yesu wau kavubilu kwa Yoane, oneto kwa mwand’a Nzambi muna makanga ma Yuda. Mayingi kena mau mu yindula. Muna luvubu lwa Yesu, “e zulu diziukidi.” (Matai 3:16) Owau osungamene mana kalongoka yo vanga kuna zulu. Kieleka, mayingi kena mau mu yindula.

Yesu oviokese lumbu 40 ye fuku 40 muna makanga. Mu kolo kiaki, kadidi má ko. Wau kamwene nzala, Satana wa Nkadi ampemba wizidi kuntonta. Umvovese vo: “Avo ngeye u mwan’a Nzambi, vovesa matadi mama makituka se mbolo.” (Matai 4:3) Wau kazeye wo vo ke diambote ko mu sadila nkum’a Nzambi mu lungisa zolela ya yandi kibeni, Yesu katambulwidi ko.

Nkadi ampemba kasila vana ko. Okwamanene kuntonta muna mambu mankaka. Otombwele Yesu vana nludi a tempelo yo kumvovesa vo kayituba ova ntoto. Kansi, Yesu katambulwidi vanga diambu diadi ko. Yesu osadidi e Sono muna songa vo diambi kikilu mu tonta Nzambi mu mpila yayi.

I bosi, muna ntonta yantatu, Nkadi ampemba osongele Yesu “yintinu yawonso ya nza ye nkembo au” yo vova vo: “Yawonso yayi ikuvana yo, avo ofukamene yo kunkunda.” Kansi Yesu umvovese diaka ye sikididi kiawonso vo: “Katuka, e Satana!” (Matai 4:8-10) Kabwidi mu ntonta za Satana ko mu vanga edi diambi, kadi ozeye wo vo Yave kaka ofwene sambilwa. Kieleka, Yesu otatididi e kwikizi kiandi muna Nzambi.

Tulenda longoka diambu muna ntonta zazi ye muna mvutu za Yesu. E ntonta zazi zakieleka, ediadi disongele vo Nkadi ampemba, ke mbi ina muna wantu ko nze una bevovanga ankaka. Nkadi ampemba una kikilu, kansi ke monekanga ko. O lusansu lwalu lusonganga vo o tuyalu twa nza yayi twa Nkadi ampemba; yandi otuminanga to. Avo ke wau ko, aweyi e ntonta za vana tuyalu kwa Kristu zadi kadila zakieleka?

Vana ntandu, Nkadi ampemba wavova nkutu kwa Yesu vo okumvana yintinu yawonso ya nza avo umfukamene yo kunkunda. Nkadi ampemba olenda mpe kututonta mu mpila yayi, nanga olenda kutuvana e lau dia kala mvuama, kala ye wisa yovo tunda. Kieleka, tusonga vo tu akwa ngangu avo tutanginini Yesu yo tatidila e kwikizi muna konso ntonta zikutubwila. Sungamena dio vo Nkadi ampemba okatukidi vana vena Yesu “yavana kevua diaka ntangwa yambote.” (Luka 4:13) Ediadi dilenda kutubwila mpe, muna kuma kiaki, tufwete yingilanga, ke tuyoyi ko.