Omu Yesu valingile hivanamumbapachisa lyehi kuli Yowano, shipilitu yaKalunga yamutwalile mupambo yakuYuleya. Apwile navyuma vyavivulu vyakushinganyeka. Halwola vamumbapachishile, “mwilu mwasokolokele.” (Mateu 3:16) Anukile vyuma alinangwile nakulinga mwilu. Pundu vene, Yesu apwile navyuma vyavivulu vyakushinganyeka.

Yesu apwile mupambo makumbi 40, musana naufuku. Atwamine chakuzeneka kusuma numba hamwe. Jino omu Yesu evwile zala chikuma, Satana Liyavolo ejile nakumweseka ngwenyi: “Kachi nge umwanaKalunga, amba malolwa awa alumuke kupwa mbolo.” (Mateu 4:3) Oloze Yesu ejivile ngwenyi chapwile chakuhenga kuzachisa ngolo jenyi jakulinga vyuma vyakukomwesa mangana alisuulwise ivene. Ngocho akanyine kulinga chuma amulwezele Satana.

Liyavolo kakuminyinyine ahako. Amwesekele nawa mujila yeka. Alwezele Yesu alimbile hamavu kufuma helu lyatembele. Oloze Yesu akanyine, kasakile kukomwesa vatu mujila kaneyiko. Yesu azachishile Visoneka nakulumbununa hatoma ngwenyi chapwile chakuhenga kweseka Kalunga mujila kaneyi.

Mucheseko chamuchitatu, Liyavolo alwekesele Yesu “mawangana osena akaye naupahu wawo” nakumulweza ngwenyi: “Nangukuhana vyosena evi nge naungufukamina nakulifukula kuli ami.” Chochimwe Yesu akanyine hatoma ngwenyi: “Fumaha, ove Satana!” (Mateu 4:8-10) Yesu akanyine kulinga vyuma vyakuhenga, mwomwo atachikijile ngwenyi Yehova ikiye kaha vatela kulemesa nakuzachila mulimo wajila. Enga, ashishikile lika kuli Kalunga.

Tunahase kulinangula vyuma vimwe kuli evi vyeseko, nomu Yesu akwileko. Yesu vamwesekele chikupu, kahechi chasolola nge Liyavolo kapwa upi uze watwama mumuchima wamutu, nge muze vashinganyeka vatu vamweko, nduma. Apwa mutu chikupu uze katweshi kumona namesoko. Ou mujimbu kana wasolola nawa nge jifulumende jamukaye josena japwa jaLiyavolo, ikiye eji kujiyulanga. Nge kajapwile chikupu jenyiko, kutala kachi chapwile cheseko kuli Kulishitu hakumuhanajo nyi?

Cheka nawa, Liyavolo ambile ngwenyi alisuwile kufweta Yesu hakumuhana mawangana osena akaye nge mwalifukula kuli ikiye. Liyavolo nahase kutweseka nayetu nawa mujila yoyimwe. Nahase kutuhana luheto, chipwe ngolo jakuyula, chipwe chihela. Oloze nachiwaha chikuma nge natukavangiza chakutalilaho chaYesu, nakupwa lika vakushishika kuli Kalunga numba vatweseka tuhu ngachilihi. Oloze anukenu ngwenu Liyavolo amusezele Yesu “nakuvandamina lwola lweka lwamwaza.” (Luka 4:13) Omu mukiko chinahase kupwa nakuli etu, ngocho twatela kuvanguluka lwola lwosena.