Liwa-liwa etyi Sesusi ambatisalwa na Suau, ononkhono mba Huku ambumutuala moluhandya lwo Sundeya. Ankho una ovipuka ovinyingi ena okusokolola. Pu etyi Sesusi ambatisalwa “eulu aliikuka.” (Mateusi 3:16) Ahinangela ovipuka alongesilwe, nevi alingile keulu. Ngotyo ankho una ovipuka ovinyingi ena okusokolola nawa!

Sesusi akala ovitenya 40 novinthiki 40 moluhandya. Mokueenda kuomuvo oo, kalile natyike. Konyima, etyi Sesusi aliwa unene nondyala, Satanasi Eliapu aliya, alimuhongiliya okuti: “Inkha umona wa Huku, popila omamanya aa opo akale onombolo.” (Mateusi 4:3) Mokonda ankho utyii okuti okuundapesa epondolo liokulinga omahuviso, opo alinge etyi muene ahanda tyapenga, Sesusi ehetavela ehongiliyo olio.

Eliapu alihemuyeke. Alihetekela vali onkhalelo onkhuavo. Alimuhongiliya opo ahomboke keulu liondyuo ya Huku. Mahi, Sesusi kayekele ehongiliyo olio liokulilekesa limuyondye. Apopi Ovihonekwa opo alekese okuti tyapenga okulola Huku, monkhalelo oyo.

Motyikando tya tatu, Eliapu alilekesa Sesusi monkhalelo imwe, “omauhamba aeho omouye nomunkhima wao.” Iya alimupopila okuti: “Ovipuka evi aviho mandyikupe-vio inkha wiikila konongolo ofende ku ame.” Sesusi ehetavela, ati: “Pita Satanasi!” (Mateusi 4:8-10) Sesusi watuaileko okuanya omahongiliyo omavi, mokonda ankho utyii okuti ufendwa vala o Siovaa. Ngotyo, Sesusi waholovonene okutualako noukuatyili ku Huku.

Onthue tupondola okulilongesila komahongiliyo oo, no konkhalelo Sesusi ehetavelele. Omahongiliyo oo otyotyili, tyilekesa okuti Eliapu nalio halusoke vala luokulinga ovivi, ngetyi ovanthu vamwe valongesa. Satanasi omunthu wotyotyili. Ehipululo eli tupu, litulekesa okuti omautumini omouye auho, o a Satanasi; oe wehongolela. Inkha omautumini oo ha Satanasi, okuti ñgeno weavela Kilisitu?

Tupu, Eliapu liapopia okuti inkha Sesusi ufenda kulio, ankho lipondola okumuavela omauhamba aeho omouye. Nonthue Eliapu lipondola okutuhongiliya monkhalelo ngoyo, hamwe mokutuavela omphitilo yokukala nomalumono omouye, nepondolo, ine outumini. Putyina tulandula ongeleka ya Sesusi mokutualako noukuatyili ku Huku, matulekesa okuti tuvanongo! Mahi hinangela okuti Eliapu liayekele vala Sesusi, ‘alo livasa omphitilo onkhuavo ikahi nawa.’ (Luka 4:13) No onthue lipondola okutulinga ngotyo, moluotyo tuhayekei-po okukala tyalunguka.