Juan Bautista Jesusta bautizasqantawan, Diospa atiynenqa Judeaj chʼin lugaresninman Jesusta pusarqa. Ichapis chaypi kashaspa, Jesusqa cielopi kausasqanmanta yuyarikusqanpi tʼukurerqa. Yachakorqanchej jina, Jesús bautizakushajtenqa ‘cielo kicharikorqa’ (Mateo 3:16). Jesustaj ichá imastachus cielopi ruwasqanta, yachakusqanta ima yuyarikorqa.

Payqa 40 pʼunchayta 40 tutatawan chay chʼin lugarpi karqa. Chay tukuynin diaspitaj ni imata mikhorqachu. Supaytajrí Jesús yarqhasqa kasqanta yachaspa, juchaman urmachiyta munarqa. Chayrayku Jesusman nerqa: “Diospa wawanchus kanki chayqa, niy kay rumista tʼantaman tukunankuta”, nispa (Mateo 4:3). Jesustajrí mana Supayta kasorqachu. Imaraykuchus payqa yacharqa, atiyninta mana munayninta ruwananpajchu apaykachanan kasqanta.

Jinapis Supayqa Jesusta ujtawan tentarqa. Chaypajtaj Jesusta Jerusalenman pusarqa, temploj perqa patanmantaj sayaykucherqa. Chantá nerqa: ‘Diospa wawanchus kanki chayqa, uraman wijchʼuykukuy. Payqa angelesninwan salvallasonqa’, nispa. Jinapis Jesusqa mana chayta ruwayta munarqachu. Astawanpis Supayman nerqa: “Qhelqasqallataj kashan: ‘Jehová Diosniykitaqa ama pruebaman churankichu’, nispa” (Mateo 4:7).

Chantá Supayqa Jesusta urmachiytapuni munaspa, jallpʼantinmanta llajtasta, qhapaj kayninkutawan rikucherqa, nerqataj: “Sichus qonqoriykukuspa yupaychawanki chayqa, kay tukuy imasta qopusqayki”, nispa. Jesustaj mana iskayrayaspa nerqa: “¡Riy kaymanta Satanás!”, nispa (Mateo 4:8-10). Jesusqa yacharqa Jehová Diosllata yupaychana kasqanta, chaytataj ruwayta munarqa.

Rikunchej jina, Supayqa imaymanamanta Jesusta tentarqa, Jesustajrí mana urmarqachu. ¿Imatá chaymanta yachakunchej? Yachakunchej Supayqa kasqantapuni, payta mana rikuyta atinchejchu chaypis. Chantapis yachakullanchejtaj, kay mundomanta gobiernosqa Supaypa makinpi kasqankuta. Manachus jina kanman chayqa, Supayqa mana chay llajtasta Jesusman qoyta munanmanchu karqa.

Chantapis Supayqa Jesusman nerqa: ‘Sichus qonqoriykukuspa yupaychawanki chayqa, jallpʼantinmanta llajtasta qopusqayki’, nispa. Kunanpis Diabloqa kikillantataj juchaman urmachiyta munawasunman. Chaypajtaj ichá qhapaj kayta, atiyniyoj kayta chayri sumajpaj qhawasqa kayta munapayachiwasunman. Supay imata qoyta munawajtinchejpis, ama payta kasunachu, Jesús jina Diosta tukuy imapi kasukuna. Bibliaqa willallawanchejtaj: “Kuraj Supayqa Jesusta mana urmachiyta atispa uj tiempota riporqa”, nispa (Lucas 4:13). Ichá kunanpis chayllatataj ruwanman. Chayrayku wakichisqapuni kananchej tiyan.