Pidamala Yezu kubatizwa na Juwau, iye aendeswa na nzimu wa Mulungu ku thando ya Yudeya. Iye akhali na pizinji toera kunyerezera. Mu ndzidzi ukhabatizwa iye, ‘kudzulu kwafunguka.’ (Mateu 3:16) Natenepa iye mbadakwanisa kukumbuka pinthu pidapfundza iye na pidacita iye kudzulu. Mwandimomwene iye akhali na pizinji toera kunyerezera.

Yezu amala ntsiku 40 na masiku 40 n’thando. Mu ndzidzi unoyu, iye nee adya cinthu. Nakuti akhali na njala, Sathani Dyabo anfendedzera toera kumuyesera, mbalonga: ‘Khala iwe ndiwe mwana wa Mulungu, panga miyala iyi toera isanduke kudza mikate.’ (Mateu 4:3) Yezu akhadziwa kuti si pyakuthema tayu kuphatisira mphambvu yace yakucita pirengo toera kukwanirisa pifuno pyace, natenepa iye akhonda mayesero anewa.

Dyabo nee abwerera nduli, iye amuyesera munjira inango. Iye apanga Yezu toera anumphe kubulukira padzulu pa mpanda wa templo. Mbwenye Yezu akhonda mayesero anewa akupangizika kuti iye ali na mphambvu. Iye aphatisira malemba toera kupangiza kuti ndi pyakuipa kuyesera Mulungu munjira ineyi.

Pa mayesero acitatu, Dyabo apangiza Yezu ‘mautongi onsene a dziko yapantsi na upfumi wawo’ mbalonga: ‘Ndinakupasa pyonsene ipi ungandigodamira mbundilambira kabodzi basi.’ Yezu akhonda pontho kucita pidaphemba Sathani, mbalonga: ‘Coka Sathani.’ (Mateu 4:8-10) Yezu akhonda mayesero onsene thangwi akhadziwa kuti anafunika kulambirwa ndi Yahova basi. Mwandimomwene iye akhadatonga toera kukhala wakukhulupirika kwa Mulungu.

Tisapfundzanji kubulukira ku mayesero adathimbana na Yezu? Tisapfundza kuti Dyabo alipodi, pontho pidacita iye pisapangiza kuti iye si cidzindikiro ca uipi basi tayu ninga munanyerezera anthu anango. Iye ndi munthu wandimomwene, mbwenye nkhabe oneka. Cakucitika ceneci cisapangizambo kuti mautongi a dziko ndi a Dyabo, pontho asatsogolerwa na iye. Mphapo thangwi yanji tisalonga kuti kupaswa mautongi kukhali mayesero kwa Kristu?

Kusiyapo pyenepi, Dyabo alonga kuti Yezu mbadamulambira iye mbadampasa mautongi onsene a dziko. Dyabo anakwanisambo kutiyesera munjira ibodzi ene, mbatipasa mwai wakukhala na mpfuma, cidzo peno mbiri n’dziko ino. Tinakhala a ndzeru tingatowezera citsandzo ca Yezu cakupitiriza kukhala akukhulupirika kwa Mulungu mwakukhonda tsalakana ntundu wa mayesero. Kumbukani kuti Dyabo aenda pyace, ‘mbadikhira ndzidzi unango wakuthema.’ (Luka 4:13) Pyenepi pinakwanisambo kucitika kwa ife, natenepa tisafunika kukhala akucenjera.