Syatu baka di Yohanes dopu Yesus, Gado yeye e tyari Yesus go na a sabana fu Yudea. A abi furu fu prakseri. Di Yesus dopu, „hemel opo” (Mateyus 3:16). Sobun, a kan memre den sani di a leri èn di a du na hemel. Iya, a abi ten fanowdu fu prakseri ala den sani disi!

Yesus e tan 40 dei èn 40 neti na ini a sabana. A heri pisi ten dati a no e nyan noti. Ma te Yesus de nanga bigi angri, dan Satan Didibri e kon tesi en. A taigi Yesus: „Efu yu na wan manpikin fu Gado, dan taigi den ston disi fu tron brede” (Mateyus 4:3). Ma Yesus sabi taki a fowtu fu gebroiki a makti di Gado gi en fu du wondru gi ensrefi. Dati meki a e kakafutu gi a tesi disi.

Ma Didibri no kaba ete. A e pruberi ete wan leisi. A e taki: „Efu yu na wan manpikin fu Gado, dan fringi yusrefi go na gron.” Ma Yesus e kakafutu gi a tesi disi tu. Na presi fu du so wan kefalek sani, a e sori nanga yepi fu den Buku fu Bijbel taki a fowtu fu tesi Gado na so wan fasi.

Baka dati Didibri e tesi Yesus a di fu dri leisi. Na wan noso tra fasi a e sori Yesus „ala den kownukondre fu grontapu nanga a moi fu den”, dan a e taki: „Mi o gi yu ala den sani disi efu yu boigi èn anbegi mi wán leisi nomo.” Yesus no wani arki Satan kwetikweti èn a e taki: „Gowe fu dya, Satan!” (Mateyus 4:8-10) A no e meki Satan kori en, fu di a sabi taki na Yehovah wawan wi musu anbegi. Iya, a e bosroiti fu tan dini Gado.

San wi kan leri fu den tesi disi èn fu a fasi fa Yesus kakafutu gi den? Den tesi ben de sani di pasa trutru. Disi e sori taki Didibri no de na ogri na ini libisma soleki fa son sma e taki. A de wan trutru sma di wi no man si nanga wi ai. A tori disi e sori tu taki den tirimakti fu grontapu na fu Didibri. Na en e tiri den. Efu den no ben de fu en, dan fa a ben o man pramisi Krestes den? Efu den no ben de fu en, dan a no ben o man gebroiki den leki wan tesi gi Yesus, a no so?

Didibri ben sori Yesus taki a ben de klariklari fu gi en wani sani efu Yesus ben o anbegi en, awinsi na wán leisi nomo. A taki dati a ben o gi Yesus ala den kownukondre fu grontapu srefi. Didibri kan tesi wi na a fasi disi tu fu di a e gi wi moi okasi fu meki en na ini a grontapu disi. Kande wi e kisi na okasi fu kon gudu, fu abi makti, noso fu abi wan hei posisi. A de wan koni sani fu teki na eksempre fu Yesus èn fu tan dini Gado awinsi sortu tesi kon! Ma hori na prakseri taki baka den tesi disi, Didibri gowe libi Yesus, soso fu „kon baka na wan moro bun ten” (Lukas 4:13). Na so a kan du nanga wi tu. Sobun, tan na ai.