Yesu wati wabatizika ŵaka, mzimu waku Chiuta ungumulongozge ku chipululu cha Yudeya. Iyu wenga ndi vinthu vinandi vakuti waviŵanaŵaniyi. Yesu wachibatizika “kuchanya kungujulika.” (Mateyu 3:16) Venivi vinguchitisa kuti wakumbuki vo wangusambira kweniso vo wachitanga we kuchanya. Penga nadi vinthu vinandi vakuti iyu waviŵanaŵaniyi.

Yesu wanguja mazuŵa 40 muchipululu, msana ndi usiku. Pa nyengu yosi iyi, waryanga chechosi cha. Yesu wati wavwa nja, Satana Dyaboli wanguza kuti wamuyesi. Ndipu wangumukambiya kuti: “Asani ndimwi mwana waku Chiuta, kambiyani mya iyi kuti yisambuki viŵandi.” (Mateyu 4:3) Yesu wanguziŵa kuti nkhunanga kugwiriskiya ntchitu nthazi zaki mwambula kwenere kuti wafiski vo wakhumbanga. Mwaviyo, wangukana kuchita vo Satana wangumukambiya.

Dyaboli wangulutirizga kuyesa Yesu. Iyu wangukambiya Yesu kuti wajiponyi pasi kutuwa pachanya pampanda wa pa nyumba yakusopiyamu. Kweni Yesu wangukana kuchita vo Satana wangumukambiya. Yesu wangumuka Satana mwakugwiriskiya ntchitu Malemba kuti nkhunanga kuyesa Chiuta munthowa yeniyi.

Satana wangumuyesa so kachitatu. Ndipu wangumulongo “maufumu ngosi nga mucharu ndi vinthu vawu vakuzirwa.” Pavuli paki wanguti: “Vosi ivi ndikupaskeningi asani mungandigwadiya ndi kundisopa kamoza pe.” Yapa napu, Yesu wangukana ndipu wangukamba kuti: “Tuwapu yapa, Satana!” (Mateyu 4:8-10) Iyu wanguzomereza cha kuchita chinthu chechosi chiheni chifukwa waziŵanga kuti ndi Yehova pe yo wakhumbika kumuteŵete. Mwaviyo, iyu wangusankha kuja wakugomezgeka kwaku Chiuta.

Kumbi tisambiranji pa vo vinguchitikiya Yesu kweniso vo iyu wanguchita wati wayeseka? Yanga ngenga mayeseru chayingu. Ndipu ivi vilongo kuti Dyaboli waliku nadi. Iyu ndi vinthu viheni ŵaka cha nge po ŵanthu anyaki aŵanaŵaniya, kweni waliku nadi chinanga kuti isi tingamuwona cha. Ivi vilongo so kuti maulamuliru ngosi nga pacharu chapasi nge mumanja mwaku Dyaboli. Kumbi ndi vinthu wuli vinyaki vo vilongo kuti kupaska Khristu maulamuliru ngenanga kwenga kumuyesa nadi?

Kweniso, Dyaboli wangukambiya Yesu kuti asani wangamugwadiya, wamupaskengi maufumu ngosi nga pacharu chapasi. Nasi Dyaboli wangatiyesa mwakutipaska mwaŵi wakuti tisaniyi vinthu va mucharu ichi nge chuma, mazaza pamwenga udindu. Kaya tingakumana ndi mayeseru nga mtundu wuli, tingalongo kuti tichita vinthu mwazeru asani tichita vo Yesu wanguchita mwa kulutirizga kuja akugomezgeka kwaku Chiuta. Kweni mutenere kukumbuka kuti Dyaboli wangumuleka Yesu “mpaka pa nyengu yinyaki yamampha.” (Luka 4:13) Venivi ndivu Dyaboli wangachita so ndi isi. Mwaviyo, tikhumbika kuja masu nyengu zosi.