Bihain tasol long Jon i baptaisim Jisas, holi spirit bilong God i stiaim Jisas i go long ples nating bilong Judia. I gat planti samting em i mas tingim. Taim Jisas i kisim baptais, “heven i op.” (Matyu 3:16, futnot) Na em inap tingim ol samting em i bin lainim na mekim long taim em i stap long heven. Tru tumas, i gat planti samting Jisas i mas tingim tingim long bel!

Jisas i stap 40 de na 40 nait long ples nating. Insait long dispela haptaim em i no kaikai. Na taim em i hangre tru, Satan i kam bilong traim em. Em i tok: “Sapos yu pikinini bilong God, orait tokim ol dispela ston long tanim i kamap bret.” (Matyu 4:3) Jisas i save olsem i no stret long yusim strong bilong em long wokim ol mirakel bilong inapim laik bilong em, olsem na em i sakim dispela traim.

Tasol Satan i no lusim em. Em i traim Jisas long narapela taim. Em i tokim Jisas long sanap antap long banis bilong tempel na kalap i go daun. Tasol Jisas i no mekim olsem bilong soim strong bilong em. Em i kamapim ol tok bilong Baibel, na i tok, i no stret long traim God long dispela rot.

Long namba 3 traim, Satan i soim Jisas “olgeta kingdom bilong graun wantaim ol nambawan gutpela samting bilong ol.” Na em i tok: “Mi bai givim yu olgeta dispela samting sapos nau yu brukim skru na lotu long mi.” Tasol Jisas i tok: “Satan, yu klia!” (Matyu 4:8-10) Em i sanap strong na i sakim dispela traim, long wanem, em i save olsem yumi mas lotuim Jehova wanpela tasol. I klia tru olsem Jisas i laik i stap gut long God.

Yumi inap kisim skul long ol dispela traim i painim Jisas na pasin bilong em long sakim ol traim. Ol dispela traim em ol samting i kamap tru, na dispela i soim olsem maski yumi no inap lukim Satan, em man i stap tru. Satan i no makim ol pasin nogut olsem planti man i ting, nogat. Na tu, dispela i soim olsem Satan i kontrolim ol gavman bilong dispela graun, long wanem, ol i stap aninit long em. Sapos nogat, em i no inap yusim ol dispela samting long traim Krais.

Satan i tok em bai givim olgeta kingdom bilong graun long Jisas sapos Jisas i brukim skru na lotuim em. Ating Satan inap traim yumi long wankain pasin, ating rot i op long yumi inap kisim planti mani kago, biknem, o namba bilong dispela graun. Em gutpela tingting long bihainim eksampel bilong Jisas long stap gut long God maski wanem wanem traim i painim yumi! Tasol yumi mas tingim olsem Satan i lusim Jisas na i “wetim narapela taim.” (Luk 4:13) Wankain samting inap painim yumi, olsem na oltaim yumi mas was i stap.