Nuumala Yohani ombatiza Yesu, munepa wa Muluku waahimuroiha Yesu moothakoni wa oYudeya. Nto sookhala itthu sinceene Yesu aatthuneya awe wuupuwelela. Okathi Yesu aabatiziwa awe “wirimu wahitthukuwa”. (Matheyo 3:16) Vano aanuupuwelela itthu siixuntte awe ni aapanke awe wiirimu. Tthiri Yesu aahikhalana itthu sinceene wira uupuweleleke!

Yesu aahiviriha mahiku 40 othana ni ohiyu ori ene moothakoni. Okathi owo, Yesu khaalya etthu. Nto ovoliwe ene vanceene, Satana Diabo aahimwaattamela wira omweehererye ohimyaka so: “Nyuwo, mwàri Mwana a Muluku, murume maluku ala othatuwa, ekhalé ephau”. (Matheyo 4:3) Okhala wira Yesu aanisuwela wira ti voohiloka orumeela owerya Muluku aavahiwe awe wira iihakalalihe paahi, Yesu aahikhootta.

Masi Diabo khaahiyale omweehererya. Nto aahirumeela enamuna ekina. Diabo aahimurowana Yesu nipuro noorakamexa na empa ya Muluku omuleela wira otuphele vathi. Masi Yesu aahikhootta opaka eyo. Oromolaka Soolempwa, Yesu aahimmye wira ti voohiloka omweehererya Muluku.

Nuumala-vo, Diabo aahimweehererya Yesu ekwaha ya neeraru, omooniheryaka “omwene wothene wa mulaponi n’uvuwa waya” oriki: “Kinimovahani itthu iye sothene, mwakikokhorelaru”. Olipiheryaka, Yesu aahimwaakhula wira: “Khuma va, Satana!” (Matheyo 4:8-10) Yesu aahipaka eyo, maana aanisuwela wira, Yehova paahi toniphwanela okokhoreliwa. Tthiri, Yesu aahithanla ovikaniha ororomeleya wa Muluku.

Tivonto weehereriwa ni waakhula wa Yesu onniniixuttiha etthu. Ninniixutta wira Diabo ookhala tthiri. Nave, owo khahiyo otakhala oniiraneya mulaponi ntoko atthu akina anihimya aya. Tivonto, Diabo nlaikha nikhanle. Nave yowiiraneya ela, enooniherya wira Diabo tonilamulela olumwenku ola wootakhala. Xeeni yoovaha ya Diabo enooniherya aya wira aahimweehererya tthiri Kristu?

Moone wira Diabo aahimmye wira akhala wira Yesu ammukokhorela, ammutthuvela onvahaka omwene wotheene wa mulaponi. Nave Diabo pooti oneehererya mwa enamuna emosaru, woonasa wene oniirihaka ophavelasa okhalana musurukhu munceene, owerya aahiiso okhala mukhulupale. Tthiri ti vamiruku otthara ntakiheryo na Yesu, nivikanihaka ororomeleya wa Muluku hata neehereriwaka! Masi, muupuweleke wira Diabo aahimuhiya Yesu “khurowa mpakha okathi wophwanelela”. (Luka 4:13) Okhala wira eyo pooti oniiranela, nihaana ovikaniha okhala oowehaweha.