Katapos gud la bawtismohan ni Juan, hi Jesus gin-giyahan han espiritu han Dios ngadto ha kamingawan han Judea. Damu an iya angay hunahunaon. Durante han iya bawtismo, “naabrihan an langit.” (Mateo 3:16) Salit nahinumdoman niya an mga butang nga iya hinbaroan ngan ginhimo ha langit. Oo, damu gud an iya kinahanglan pamalandungon!

Hi Jesus nagpabilin ha kamingawan ha sulod hin 40 ka adlaw ngan 40 ka gab-i. Durante hito nga panahon, waray hiya kaon-kaon. Han gutom na hiya hinduro, ginsulay hiya ni Satanas nga Yawa, nga nagsiring: “Kon anak ka han Dios, himoa nga tinapay ini nga mga bato.” (Mateo 4:3) Tungod kay maaram hi Jesus nga sayop an paghimo hin milagro basi la matagbaw an iya hingyap, waray hiya magpasulay.

Kondi waray umundang an Yawa. Ginamit hiya hin iba nga paagi. Gin-ayat niya hi Jesus nga lumayog tikang ha pader han templo. Pero waray masulay hi Jesus nga magpasikat. Ginkotar ni Jesus an Kasuratan basi ipakita nga sayop nga sarihan an Dios ha sugad nga paagi.

Katapos, ha ikatulo nga pagsulay, iginpakita han Yawa kan Jesus an “ngatanan nga ginhadian han kalibotan ngan an himaya hito” ngan sumiring: “Ini ngatanan ihahatag ko ha imo kon lumuhod ka ngan magsingba ha akon bisan makausa la.” Pero nagdumiri gud hi Jesus, hiya nagsiring: “Iwas Satanas!” (Mateo 4:8-10) Waray hiya masulay ha pagbuhat hin sayop kay maaram hiya nga an sagrado nga pag-alagad sadang gud la ihatag kan Jehova. Oo, ginpili niya nga magpabilin nga matinumanon ha Dios.

May mahibabaroan kita hini nga mga pagsulay kan Jesus ngan ha iya paagi ha pag-atubang hito. Tinuod an mga pagsulay, nga nagpapakita nga an Yawa diri la kay maraot nga kinaiya sugad han ginsisiring han iba. Tinuod hiya nga diri nakikita nga persona. Iginpapakita liwat hini nga asoy nga an mga gobyerno han kalibotan panag-iya han Yawa ngan kontrolado niya ito. Paonan-o magigin makakombinse an pagsulay han Yawa ha Kristo kon diri iya ini nga mga butang?

Dugang pa, an Yawa nagsiring nga andam hiya nga balosan hi Jesus kon magsisingba ha iya bisan makausa la. Andam hiya nga ihatag kan Jesus bisan an ngatanan nga ginhadian han kalibotan. Posible liwat sulayon kita han Yawa ha pariho nga paagi, bangin itanyag niya an nakakaengganyo nga mga oportunidad nga magkaada hin karikohan, awtoridad, o katungdanan. Maaramon gud kita kon susubaron naton hi Jesus pinaagi ha pagpabilin nga matinumanon ha Dios ha bisan ano nga pagsari! Pero hinumdumi nga ginbayaan han Yawa hi Jesus “tubtob nga magkaada iba nga higayon.” (Lucas 4:13) Ito liwat an bangin buhaton niya ha aton, salit kinahanglan pirme kita magbantay.