Despué de guyuunisa Jesús, yené espíritu stiʼ Dios laa lu desiertu stiʼ Judea. Nánnanu caníʼ íquebe stale cosa purtiʼ ora guyuunísabe que «bixeleʼ guibáʼ» (Mateo 3:16). Yanna, maʼ zanda guietenaláʼdxibe guiráʼ ni biziidibe ne ni bíʼnibe guibáʼ. Nga runi, caquiiñeʼ guiníʼ ique chaahuibe ca cosa riʼ.

Cuarenta dxi ne cuarenta gueelaʼ guyuu Jesús lu desiertu que. Ne caʼruʼ gobe gastiʼ, nga runi guizáʼ maʼ candaanabe. Ne cumu nanna Binidxabaʼ candaanabe la? biʼniʼ tentar laabe. Ná rabi laabe: «Pa xiiñiʼ Dios lii la? gudxi ca guié riʼ gácacaʼ pan» (Mateo 4:3). Nanna Jesús cadi jneza diʼ iquiiñeʼ poder ni napa para guni ni racalaʼdxiʼ, nga runi qué ñábabe lu tentación que.

Peru qué niree Binidxabaʼ gana ne biyubi sti modo guni tentar laabe. Gúdxibe Jesús chuʼ bi dede ra jma nasoo de ique templu que para gueeda ca ángel ne gulá laa. Peru laaca qué ñaba diʼ Jesús lu tentación que para si nuluíʼ naca tuuxa risaca, sínuque gúdxibe Binidxabaʼ cá lu Stiidxaʼ Dios cadi jneza gutiidiʼ binni Dios prueba.

Biʼniʼ tentar Binidxabaʼ Jesús guionna biaje. Ne biluíʼ Binidxabaʼ laabe «guiráʼ guidxi nuu lu guidxilayú ne guiráʼ cosa risaca stícani» ne ná rabi laabe: «Zudieeʼ lii guiráʼ cosa riʼ pa guzuxíbiluʼ xañeeʼ ti biaje si ne guni adorarluʼ naa». Peru qué lica niná Jesús ne gudxi laabe: «¡Biree de ra nuaaʼ, Binidxabaʼ!» (Mateo 4:8-10). Qué ñaba diʼ Jesús lu tentación que purtiʼ nánnabe Jehová si nga naquiiñeʼ gaca adorar ne qué zucheenebe laa.

¿Xi rizíʼdinu de ca tentación ni biquiiñeʼ Binidxabaʼ ne modo bicaanáʼ Jesús ca tentación ca? Rusiidiʼ relatu riʼ laanu dxandíʼ guca ca tentación riʼ purtiʼ dxandíʼ nuu Binidxabaʼ neca qué ridúʼyanu laa. Laaca rizíʼdinu stibe guiráʼ gobiernu nuu lu Guidxilayú riʼ ne laabe cayuni contrólarbe laacaʼ. Pa ñaca cadi stibe ni la? qué niquiiñebe ni para ñuni tentarbe Jesús.

Laaca gúdxibe Jesús zudiibe laa guiráʼ guidxi nuu lu Guidxilayú pa guzuxibi xañeebe ti biaje si. Zanda guni tentar Binidxabaʼ laanu casi biʼniʼ tentar Jesús, zándaca gápanu xiixa oportunidad para gápanu stale bueltu, autoridad o gácanu tuuxa risaca nezalú binni. Intiica tentación guidxaagalunu, galán chinándanu ejemplu stiʼ Jesús ne cadi guchéʼnenu Dios. Peru guietenaláʼdxinu bisaana Binidxabaʼ Jesús «dede ora maʼ zanda guni tentar laabe sti biaje» ne zándaca zacaca guni Binidxabaʼ laanu (Lucas 4:13). Nga runi, naquiiñeʼ gatananu.