Mvuse melu 40 Yésus a te lôte fé été, a ôsusua na a ke Galilée, Yésus a bulane be Jean, nnye a nga du nye. Nté Yésus a zu nye bébé, Jean a liti nye ônyui a jô’ô bôte be ne nye fefele na: “Mi lô, Mone Ntômba Zambe a va mam abé ya si nyô! Nyina a ne môt me nga jô mia ajô dé na, Môt a zu tôñe ma mvus a ne me ôsu: amu a nga to me ôsu.” (Jean 1:29, 30) Jean a ne nya môtô a dañe Yésus, ve a yeme na Yésus a nga taté nyiñ ôsusua na a bialé ane nsisim e yôp été.

Bone besôndô mvus, éyoñe Yésus a nga zu na a duban, Jean a nji be a kôme’e yeme nge Yésus nnye a ye bo Messie. Jean a yemelane na, “Me nji yeme nye; ve amu me aye liti bôt ya Israël be yeme nye, ajô te nde me nga zu baptizô bôt a mendim.”​—Jean 1:31.

Jean a ke ôsu a kañete bôte ba vô’ôlô nye mam me nga boban éyoñ a nga du Yésus a jô’ô na: “Me nga yen nsisim ô so’o yôp ô sisik, aval ane zum; ô za’a tabe be nye. Me nji yeme nye: ve môt a nga lôme ma me baptizô bôt a mendim, nnye a nga jô me na, Môt wo aye yen nsisim ô sisik, ô tabe’ be nye, nnye a ne môt a ye baptizô bôt a mbamba nsisim. Me maneya yen, ane me nga kate mia na, nyina a ne Mone Zambe.”​—Jean 1:32-34.

Môse wo tôé valé, éyoñ Yésus a beta so, Jean ba beyé’é bé bebaé be ne nsamba. Jean a jô na: “Mi lô, Mone Ntômba Zambe!” (Jean 1:36) Éyoñ éte, beyé’é be Jean Baptiste bete bebaé ba tôñe Yésus. Wua ya été a ne jôé na André. Ékô éziñ nyu mbok a ne môt a nga tili nkañete wu, a ne jôé na Jean. É ne ve ane Jean bia jôô nye nyi a ne évuvumane Yésus, mone Salomé. Salomé a yiane bo monyañe Marie, a nnôme wé a ne jôé na Zébédée.

Éyoñ a fombô mvus a yene na André ba Jean ba tôñe nye, Yésus a sili be na: “Mi ajeñe jé?”

Ane ba jô nye na: ‘A Rabbi, ô to vé?’

Yésus nye na: “Za’an, mi aye yen.”​—Jean 1:37-39.

Bi nga ke bebé mewolo menyin ya mame ngô’é, a André ba Jean ba tabe a Yésus akekui alu. André a ne angôndô ya mevak aval e ne na, a ke yene monyañe wé Simon, nyi ba loone fe na Pierre a jô’ô nye na: “Bi yeneya Messie.” (Jean 1:41) André a ke Pierre be Yésus. Nkañete wo liti na, mvuse ya valé Jean fe a ke tôbane monyañe wé Jacques a ke nye be Yésus; ve Jean a nji tili mone jam ate éyoñ émien a kañete nlañe wu.

Môse wo tôé valé, Yésus a koone Philippe, môte ya Bethsaïda. Tison éte é ne fefele Mañ ya Galilée, a vôm ate nye André ba Pierre be  nga yaé. Yésus a bañete Philippe a jô’ô nye na: “Tôñe’ ma.”​—Jean 1:43.

Mvuse ya valé Philippe a koone Nathanaël nyi ba loone fe na Barthélemie, a jô nye na: “Bi yeneya môt Moïse a nga tili kalate metiñe me Zambe, a bekulu mejô be nga tili ajô dé na, Jésus ya Nazareth, mone Joseph.” Nathanaël a bo bisô a jô’ô Philippe na: “Ye jôm é ne mvaé é ne ngule ya so Nazareth?”

Philippe nye na, “Za’a yen.” Yésus a yene Nathanaël a za’ak, ane a jô na: “Tama yenan, a ne fo’o môte ya Israël, a nji bo medu’an.”

Nathanaël nye na: “Wo ayeme me aya?”

Yésus a yalan a jô’ô na: “Te yen Philippe a za lo’ene wo, éyoñ ô nga to élé ya figuier si, me nga yene wo.”

Nathanaël a kam, a jô na: “A Rabbi, ô ne Mone Zambe; ô ne Njô bôte ya Israël.”

Yésus nye na: “Amu me ate jô wo na, Me nga yene wo élé ya figuier si, [nde] wo abuni? Wo aye yene mam me adañe mam ma.” Nde Yésus a ka’ale na: “Me abele fo’o ane me ajô mia na, Mi aye yene yôp e kanda’an, a beange be Zambe be [betek], be [sisik], a [ke] be Mone môt.”​—Jean 1:45-51.

Mvuse ya valé, nde Yésus ba mimfefé beyé’é bé ba kôlô mbi’ili ya Jourdain a ke Galilée.