Oti e 40 na siga ena vanua talasiga, ni bera tale ga ni lesu i Kalili, a gole tale o Jisu vei Joni a papitaisotaki koya. Ni raici Jisu o Joni, e dusi koya vei ira na tiko voli e kea qai kaya: “Raica na Lami ni Kalou ena kauta tani na nodra ivalavala ca na kai vuravura! O koya ga qo au a vakaibalebaletaka tiko niu kaya: ‘O koya e muri au mai e uasivi au ni a bula e liu vei au.’” (Joni 1:29, 30) E qase vei Jisu o Joni, ia e kila ni a bula e liu vua o Jisu ni se dua tu na kabula vakayalo mai lomalagi.

Ena vica na macawa yani e liu ni mai papitaiso o Jisu, a sega ni vakadeitaka sara o Joni ni o Jisu ena Mesaia. E kaya o Joni: “Au sega mada ga ni kilai koya, ia au veipapitaisotaki ena wai mera kilai koya kina na Isireli.”​—Joni 1:31.

Sa qai vakamacalataka o Joni vei ira na vakarorogo na veika a yaco ni papitaisotaki Jisu: “Au raica ni lako sobu mai lomalagi na yalo tabu me vaka na ruve, e mai toka vua. Au sega mada ga ni kilai koya, ia e kaya vei au o koya e talai au mai meu veipapitaisotaki ena wai: ‘O koya ga o raica ni lako sobu vua na yalo tabu qai lai toka vua, o koya qo ena veipapitaisotaki ena yalo tabu.’ Au raica sara ga, au vakadinadinataka tale ga ni o koya ga qo na Luve ni Kalou.”​—Joni 1:32-34.

E duri tu o Joni kei na rua nona tisaipeli ena siga tarava ni gole tale yani o Jisu. E kaya o Joni: “Raica, na Lami ni Kalou!” (Joni 1:36) Erau muri Jisu sara na tisaipeli i Joni na Dauveipapitaisotaki. E dua vei rau o Adriu, na kena ikarua o koya sara ga e volatukutukutaka na veika qo, na yacana tale ga o Joni. De dua o Joni qo erau veitatacini kei Jisu, na luvedrau o Sepeti kei Salome na taci Meri.

Ni raica o Jisu ni rau muri koya tiko o Adriu kei Joni, e taroga: “Na cava drau vaqara?”

“Rapai,” erau tarogi koya, “oni vakaitikotiko i vei?”

E sauma o Jisu: “Drau lako mai, drau na qai raica.”​—Joni 1:37-39.

Sa rairai va toka na kaloko ena yakavi, rau qai tiko vata kei Jisu o Adriu kei Joni ena vo ni siga qori. Dua na ka nona marau o Adriu, e vaqarai tacina sara o Saimoni, e dau kilai tale ga me o Pita qai kaya vua: “Keirau sa kunea na Mesaia.” (Joni 1:41) Sa qai kauti Pita vei Jisu o Adriu. O Joni tale ga e vaqarai Jemesa na tacina qai kauti koya vei Jisu; e sega ni okata o Joni na itukutuku qo ena veika e vola.

Ena siga tarava, e raici Filipi e dua na kai Peciseita o Jisu. Na koro ya e toka ena vualiku ni baravi ena Wasa o Kalili, e nodrau koro tale ga o Adriu kei Pita. E sureti Filipi o Jisu: “Muri au mai.”​—Joni 1:43.

Erau sota o Filipi kei Nacanieli, e kilai tale ga  me o Pacolomiu, qai tukuna vua: “Keitou sa kunei Jisu na luvei Josefa mai Nasareci, o koya e vola o Mosese ena Lawa kei ira tale ga na Parofita.” E vakatitiqa o Nacanieli qai tukuna vei Filipi: “Ena bau kune e dua na ka vinaka mai Nasareci?”

E uqeti koya o Filipi: “Lako mai mo raica.” Ni raici Nacanieli o Jisu, e kaya sara: “Raica, e dua na kai Isireli dina, e sega ni dau lawaki!”

“Oni kilai au vakacava?” e taroga o Nacanieli.

E sauma o Jisu: “Au a raici iko ni o tiko ena ruku ni vunilolo ni bera ni kacivi iko o Filipi.”

E kurabuitaka qori o Nacanieli qai kaya: “Rapai, o kemuni ga na Luve ni Kalou, oni Tui Isireli.”

E taroga sara o Jisu: “O vakabauta ena vuku wale ga ni noqu tukuna niu raici iko ena ruku ni vunilolo?” “O na raica e levu tale na ka e uasivia qori.” Sa qai yalataka o Jisu: “Au tukuna vakadodonu vei kemudou, dou na raica ni tadola na lomalagi, dou na raici ira na agilosi ni Kalou nira lako cake ra lako sobu tale ga vua na Luve ni tamata.”​—Joni 1:45-51.

Oti ga qori e biubiu o Jisu kei ratou na isevu ni nona tisaipeli mai na Buca kei Joritani ratou gole i Kalili.