Imwin 40 te bong n te rereua ao imwain okirani Kariraia iroun Iesu, ao e a nako ni kawara Ioane are e a tia ni bwabetitoia. Ngke e a kawaraki Ioane iroun Iesu ao e a taekinna Ioane nakoia ake a mena ikekei ni kangai: “Noria! ao aei ana Tiibutetei te Atua, ae kamaunai aia bure kaain te aonnaba! Teuaei are I kangai ngkoa ibukina: ‘E roko imwiu teuare kakannato riki nakoiu, bwa boni kaman iai ngaia imwaiu.’” (Ioane 1:29, 30) E ngae ngke e ikawai riki teutana Ioane nakon Iesu, ma e ataia bwa e a kamani maiu Iesu i karawa bwa te aomata ae te taamnei.

Tabeua te wiki imwaina ngke e roko Iesu bwa e na bwabetitoaki iroun Ioane, ao e taraa n aki kakoauaa teuaei ae e na riki Iesu bwa te Mesia. E kaotia Ioane ni kangai: “I aki naba ngai kinaa, ma bukin rokou ni bwabetito n te ran, bwa e aonga ni kaotaki teuaei nakoia tibun Iteraera.”​—Ioane 1:31.

E reitaanako karakinan te baere riki Ioane ngke e bwabetitoa Iesu, nakoia taan ongora ni kangai: “I nora te taamnei bwa e ruo n ai aron te taobe mai karawa, ao e tiku i aon teuaei. I aki naba kinaa ma e taku nakoiu Teuare kanakomaiai bwa N na bwabetito n te ran: ‘Ane ko noria bwa e ruonna te taamnei ma n tiku i aona, ao boni ngaia are e bwabwabetito n te taamnei ae raoiroi.’ Ao I bon noria, ao I anga au kaotioti bwa teuaei bon Natin te Atua.”​—Ioane 1:32-34.

E mena Ioane i rarikia ana reirei aika uoman n te bong are imwina ngke e a manga roko Iesu ni kawaria, ao e taku Ioane: “Noria, ao aei ana Tiibutetei te Atua!” (Ioane 1:36) Ibukin aei ao a ira Iesu taan rimwin Ioane te tia Bwabetito aika uoman aikai. Aran are temanna Anterea. E iangoaki are temanna bwa ngaia ae e korea taekan te bae riki aei, ae arana naba Ioane. E taraa n ae Ioane aei ai tarin Iesu bwa natin Tarome are buun Tebetaio ae tao tarini Maria.

Ngke e rairaki Iesu ao e noriia Anterea ao Ioane ake a rimwina ao e titiraki ni kangai: “Tera ae kam tangiria?”

A titirakinna ni kangai: “Rabi, ko maeka ia?”

E kaekaia Iesu ni kangai: “Nakomai bwa kam na noria.”​—Ioane 1:37-39.

A a bon tiku naba Anterea ao Ioane i rarikin Iesu tao man te aoa aua n te bwakantaai, ni kabongnga. E rangi ni kukurei Anterea ngke e nora tarina are Timon are aranaki naba bwa Betero ao e kangai nakoina: “E a reke iroura te Mesia.” (Ioane 1:41) E kairaki Betero iroun Anterea nakon Iesu. E taekinaki n rongorongo ake imwina bwa ai aron naba Ioane ngke e kunea tarina are Iakobo, ao e kairia nakon Iesu ma e aki korea taekan aei Ioane n rongorongoni baike a riki.

N te bong are imwina, e a kaitiboo Iesu ma Biribo ae kaaini Betetaita ae uakaan ma meangin Namani Kariraia are aia kaawa naba Anterea ao Betero. E taku nakoni Biribo: “Ko na riki bwa te tia rimwiu.”​—Ioane 1:43.

 Ao Biribo e nora Natanaera are aranaki naba bwa Baretoromaio ao e taku nakoina: “E a reke iroura teuare koreaki taekana n te Tua irouni Mote ao irouia Burabeti: are Iesu are natin Ioteba mai Natareta.” E nanououa Natanaera ao e taku nakoni Biribo: “E kona n nako te bae raoiroi mai Natareta?”

E kaumakia Biribo ao e taku nakoina: “Nakomai noria.” Ao Iesu e nora Natanaera ngke e kawaria ao e taekinna ni kangai: “Ao bon taraa tibun Iteraera ni koaua ae akea te babakanikawai irouna.”

E titiraki Natanaera ni kangai: “Ko a kangaa naba ni kinaai?”

E kaeka Iesu ni kangai: “Imwain ae e weteiko Biribo, ao I noriko bwa ko mena i aan te aroka ae te biiku.”

E mimi Natanaera ao e kaeka ni kangai: “Rabi, boni ngkoe Natin te Atua, boni ngkoe Uean Iteraera.”

E titiraki Iesu ni kangai: “Ko kakoauaai ibukina bwa I tuangko ae I noriko i aan te aroka ae te biiku? Ane ko na nori baika kamimi riki nakon aikai.” E berita ngkanne Iesu ni kangai: “Bon te koaua raoi ae I tuangingkami, ane kam na nora karawa bwa e kaukaki, ao ana anera te Atua aika a ruo nakon Natin te aomata ao a waerake.”​—Ioane 1:45-51.

N te tai ae rangi ni waekoa imwina, ao e a kitana Ioretan Iesu ma taan rimwina ake a a reke irouna ake a boou ao a mwananga nako Kariraia.