Panyima pa matuku 40 avua Yezu muenze mu tshipela, kumpala kua kupinganaye mu Galela, wakanji kuya kudi Yone uvua mumubatize. Pavua Yezu wenda usemena, Yone wakamufunkuna wambila bavua muaba au ne: “Monayi, Muana wa mukoko wa Nzambi udi umbusha mpekatu wa ba pa buloba! Yeye ke umvua muambe bua bualu buende ne: ‘Panyima panyi padi palua muntu udi mupite kumpala kuanyi, bualu uvuaku kumpala kuanyi.’” (Yone 1:29, 30) Nansha muvua Yone muntu mukole ndambu kudi Yezu, uvua mumanye ne: Yezu uvuaku kumpala kuende bu muntu wa mu nyuma mu diulu.

Mbingu mikese kumpala, pavua Yezu mulue bua bamubatize, Yone kavua umueneka bu mutuishibue ne: Yezu ke uvua ne bua kuikala Masiya to. Yone wakamba ne: “Nansha meme tshivua mumumanye to, kadi bualu bumvua muluile mbatizangana mu mâyi buvua bua ne: amone mua kumueneshibua patoke kudi Isalele.”​—Yone 1:31.

Yone wakatungunuka ne kulondela bantu bavua bamuteleja tshivua tshipitakane pavuaye ubatiza Yezu, wamba ne: “Mvua mumone nyuma upueka mu diulu bu nyunyi wa nkutshi, kushalaye pa mutu pende. Nansha meme tshivua mumumanye to, kadi Eu muine uvua muntume bua kubatizangana mu mâyi wakangambila ne: ‘Muntu uudi umona nyuma umupuekela, ushala pa mutu pende, yeye au ke udi ubatizangana mu nyuma muimpe.’ Ndi mumone bualu ebu, ne ndi mumanyishe ne: yeye eu udi Muana wa Nzambi.”​—Yone 1:32-34.

Pavua Yezu mulue kabidi kudi Yone dituku diakalonda, wakamupeta ne bayidi bende babidi. Yone udi wamba ne: “Tangilayi, Muana wa mukoko wa Nzambi!” (Yone 1:36) Bua bualu ebu, bayidi babidi ba Yone Mubatiji abu badi balonda Yezu. Umue wa kudibu diende ng’Andele. Pamuapa muyidi muibidi au nyeye muine uvua mufunde malu aa, diende pende n’Yone. Bidi bimueneka ne: Yone eu mmuanabu ne Yezu wa mua mamuende mukuabu, Salome. Pamuapa Salome mmuanabu ne Mariya, dia bayende n’Zebedayi.

Pavua Yezu mukudimuke ne mumone Andele ne Yone benda bamulonda, wakabebeja ne: “Nudi nukeba tshinyi?”

Bakamukonka ne: “Labi, udi musombele penyi?”

Yezu wakabandamuna ne: “Luayi, nenumone.”​—Yone 1:37-39.

Tukavua bu ku dîba dia 16, Andele ne Yone bakashala ne Yezu mêba avua mashale. Andele uvua ne disanka dipite bungi, bienza bua ne: musangu kampanda uvuabu bapetangana ne muanabu Simona, udibu babikila kabidi ne: Petelo, udi umuambila ne: “Tudi bapete Masiya.” (Yone 1:41) Andele udi uya ne Petelo kudi Yezu. Malu akalua kuenzeka adi aleja ne: Yone pende wakapetangana ne muanabu Yakobo, kuyaye pende nende kudi Yezu; kadi Yone muine ki mmumvuije bualu buvua bumutangile ebu mu ende malu avuaye mufunde to.

Dituku diakalonda, Yezu wakapetangana ne Filipo wa ku Betesaida. Betesaida uvua pabuipi ne ku  muelelu wa ku nord wa Mbuu wa Galela, ne ke tshimenga tshia ba Andele ne Petelo. Yezu wakabikila Filipo wamba ne: “Ndonda.”​—Yone 1:43.

Pashishe Filipo wakapetangana ne Natanaele, uvuabu babikila kabidi ne: Batolomayo, udi umuambila ne: “Tudi bapete muntu uvua Mose mufunde mu Mikenji ne Baprofete bafunde: Yezu wa ku Nazaleta, muana wa Jozefe.” Natanaele wakela mpata wambila Filipo ne: “Tshintu tshimpe tshidiku mua kupatukila mu Nazaleta anyi?”

Filipo wakasuminyina wamba ne: “Luaku umone.” Pavua Yezu mumone Natanaele wenda ulua, udi wamba ne: “Monayi, yeye udi bulelela muena Isalele udi kayi ne dishima munda muende.”

Natanaele udi umukonka ne: “Udi mummanye munyi?”

Yezu kumuandamuna ne: “Kumpala kua Filipo kukubikila, pauvua muinshi mua mutshi wa mfigi, mvua mukumone.”

Natanaele kukema wamba ne: “Labi, udi Muana wa Nzambi, udi Mukalenge wa Isalele.”

Yezu kumuebeja ne: “Udi witabuja bualu ndi mukuambile ne: Mvua mukumone muinshi mua mutshi wa mfigi anyi? Neumone malu manene kupita aa.” Pashishe Yezu wakalaya ne: “Bulelela, bulelela, ndi nnuambila ne: nenumone diulu dibululuke ne banjelu ba Nzambi babanda bapueka kudi Muana wa muntu.”​—Yone 1:45-51.

Katupa kakese panyima pa bualu ebu, Yezu pamue ne bayidi bende bapiabapia badiye mupete bavua bumbuka mu Tshibandabanda tshia Yadene baya batangile ku Galela.