Konyima yononthiki 40 akala moluhandya, tyina eheneende ko Ngalileya, Sesusi akondoka ku Suau, una wemumbatisalele. Pu etyi Sesusi ankho ekahi nokuya, Suau umuyulika, apopila vana ekahi navo okuti: “Talei Ondyona ya Huku, ipola onkhali mouye! Ou oyouna napopile okuti: ‘Konyima yange makuya omulume umwe omunene vali tyipona ame, mokonda oe watetekela okuya kouye ku ame.’” (Suau 1:29, 30) Namphila Suau omukulu ku Sesusi, mahi utyii okuti Sesusi oe watetekela okuya kouye, ankho oandyu keulu.

Palamba onosimanu mbehehi, etyi Sesusi eile kwe opo ambatisalwe iya Suau ankho ketyii nawa okuti Sesusi o Mesiya. Suau wetyipopia etyi ati: “Na ame ankho himwii, mahi ndyikahi nokumbatisala nomaande opo anoñgonokwe mo Isilayeli.” — Suau 1:31.

Suau atualako okupopila ovateheleli vae ovipuka viamonekele etyi ankho ekahi nokumbatisala Sesusi, ati: Ame “namona ononkhono mba Huku mbulauka keulu ngopomba, ambukala kwe. Na ame ankho himwii, mahi Ou wanthuma okumbatisala nomaande, wamphopila okuti: ‘Ou wamamono walaukilwa nononkhono mba Huku ambukala kwe, oo umbatisala nononkhono mba Huku.’ Iya ame netyimona, naava oumbangi wokuti ou Omona wa Huku.” — Suau 1:32-34.

Monthiki yalandula-ko, Suau ankho ukahi kumwe novalongwa vae vevali, etyi Sesusi eya vali kuvo. Suau evepopila okuti: “Talei Ondyona ya Huku!” (Suau 1:36) Ngotyo, ovalongwa ovo vevali va Suau Batisita, avalandula Sesusi. Umwe puvo, utiwa o Andelee. Tyipondola mukuavo utiwa o Suau, oe wahoneka ehipululo eli. Mokutala, Suau ankho velikuai na Sesusi mokonda omona wa Salomee. Salomee tyafuile velilandula na Maliya iya omulume wae o Sembendeu.

Etyi Sesusi aleuka, amono Andelee na Suau vekahi nokumulandula, evepulu okuti: “Oityi mukahi nokuovola?”

Ngwe, avati: “Rabbi, ove ukala-pi?”

Sesusi eveihana, ati: “Endyuei, mukatale-po.” — Suau 1:37-39.

Tyafuile, ankho oola 16 komakumbi iya Andelee na Suau avakala na Sesusi onthiki aiho. Andelee ankho wahambukwa unene etyi avasa Simau velikwai nae, tupu wiihanwa okuti o Petulu iya emupopila okuti: “Tuavasa Mesiya.” (Suau 1:41) Andelee atuala Petulu ku Sesusi. Ovipuka viamoneka konyima, vialekesa okuti Suau tupu nae wavasile Tiaku, ankho velikwai nae, emutuala ku Sesusi; mahi Suau otyo ketyipopile mehipululo liae.

Onthiki yalandula-ko, Sesusi wavasa Filipe, ukala ko Betesaita. Otyilongo otyo ankho tyikala kokulio kuekumbi popepi Nelunga lyo Ngalileya, epunda-umbo mukala Andelee na Petulu. Sesusi akongo Filipe, ati: “Kala omulanduli wange.” — Suau 1:43.

Konyima Filipe avasi Natanaele, tupu wiihanwa okuti o Batolomeu, emupopila okuti: “Onthue tuavasa una wahonekwa Movitumino vya Moisesi, no movihonekwa Viovauli, Sesusi omona wa Suse wo ko Nasalee.” Tyihena onthumbi, Natanaele apulu Filipe okuti: “Ko Nasalee kupondola okutunda otyipuka otyiwa?”

Filipe apopi okuti: “Endyu ukatale.” Sesusi amono okuti Natanaele ankho ukahi nokuya, ati: “Tala omu Isilayeli wotyotyili, uhena omatutu.”

Natanaele emupulu okuti: “Oñgeni ove undyi?”

Sesusi emukumbulula, ati: “Etyi nkhele Filipe ehenekuihane, ame nekumona etyi upumphi mombuelo yomukuyu.”

Natanaele, akumbulula nokuahuva okuti: “Mulongesi, ove Umona wa Huku, ove Hamba yo Isilayeli.”

Sesusi emupulu okuti: “Wetavela, mokonda nekupopila okuti nekumonena mombuelo yomukuyu? Momono ovipuka ovinene tyipona ovio.” Konyima, Sesusi emulae okuti: “Ame tyili-tyili ndyimupopila okuti: Mamumono eulu liaikuka no noandyu mba Huku mbuti ambulondo, ambulaukila Komona womulume.” — Suau 1:45-51.

Konyima yotyo, Sesusi kumwe novalongwa vae ovape, avatundu Kevota lyo Solondau, avaende no ko Ngalileya.