Ko oti atu a aso e 40 i te koga lavaki kae koi tuai o foki atu ki Kalilaia, ne toe foki atu a Iesu ki a Ioane, telā ne papatiso ne ia a ia. I te taimi ne fanatu ei a Iesu, ne tusi atu ne Ioane tena lima ki a ia kae fai atu ki tino i konā: “Kiloke, te Tamā Mamoe a te Atua telā ka ave ne ia keatea a agasala a te lalolagi! Tenei eiloa te tino ne fai atu ei au: ‘E vau mai oku tua te tagata telā ko leva ne mua atu i a au, me ne ola muamua a ia i a au.’” (Ioane 1:29, 30) E tiga eiloa ne matua malie a Ioane i a Iesu, ne iloa ne ia me ne ola muamua a Iesu i a ia e pelā me se tino faka-te-agaga i te lagi.

I nai vaiaso mai mua atu i ei, i te taimi ne fanatu ei a Iesu ke papatiso a ia, ne seki iloa tonu ne Ioane me i a Iesu ka fai mo fai te Mesia. Ne taku ‵tonu mai a Ioane: “Ne seki iloa foki ne au a ia, kae ko te pogai ne vau ei au o papatiso ki te vai ko te mea ke mafai o iloa a ia ne tino Isalaelu.”—Ioane 1:31.

Ne toe fakamatala atu ne Ioane ki ana tino fakalogo‵logo a mea kolā ne ‵tupu i te taimi ne papatiso ei ne ia a Iesu: “Ne lavea ne au te agaga e fanaifo e pelā me se lupe mai te lagi, kae ne nofo eiloa i luga i a ia. Ne seki iloa foki ne au a ia, kae ko te Tino eiloa telā ne uga mai ne ia au ke papatiso ki te vai ne fai mai ki a au, ‘Ko te tino telā e lavea ne koe e fanaifo te agaga kae nofo i luga i ei, tenei te tino ka fai ne ia te papatisoga ki te agaga tapu.’ Kae ko oti ne lavea ne au a ia, kae ko oti foki ne molimau atu au me i te Tino tenei ko te Tama a te Atua.”—Ioane 1:32-34.

I te suā aso ne ‵tu fakatasi mai a Ioane mo ana soko e tokolua i te ‵toe fanatuga a Iesu. Muna a Ioane: “Kiloke, te Tamā Mamoe a te Atua!” (Ioane 1:36) I konā loa ne tau‵tali atu te avā soko konei o Ioane te Papatiso ki a Iesu. E tokotasi mai i a lāua ko Anitelea. Kāti a te suā tino ko te tino eiloa telā ne tusi ne ia a te tala tenei ki lalo, telā ne fakaigoa foki ko Ioane. E foliga mai me i te Ioane tenei, ko te fakataina o Iesu, ko te tama a Salome. Kāti tou fafine ko te taina o Malia, kae ko tena avaga ko Sepetaio.

Ne ‵fuli atu a Iesu kae matea atu ne ia a Anitelea mo Ioane ne tau‵tali atu ki a ia, telā ne fesili atu ei a ia: “Se a te mea e ‵sala koulua ki ei?”

“Te Lapi,” ne fesili atu lāua ki a ia, “tefea te koga e nofo koe i ei?”

“‵Mai, ke lavea ne koulua,” ko te tali a Iesu.—Ioane 1:37-39.

Kāti ko te itula e fa i te afiafi i te taimi tenā, ne ‵nofo fakatasi atu ei a Anitelea mo Ioane mo Iesu i te ‵toega tenā o te aso. Ne fiafia malosi a Anitelea i te taimi ne maua ei ne ia tena taina ko Simona, telā e fakaigoa foki ki a Petelu, kae fai atu ki a ia: “Ko oti ne maua ne māua te Mesia.” (Ioane 1:41) Kae ne ave ne Anitelea a Petelu ki a Iesu. E fakaasi mai i mea ne ‵tupu fakamuli me ne maua foki ne Ioane tena taina ko Iakopo kae avatu ne ia ki a Iesu; kae ne seki aofia ne Ioane a te fakamatalaga totino tenei i ana tala e uiga ki mea ne ‵tupu.

I te suā aso, ne maua ne Iesu a Filipo, se tino mai Petesaita. E pili ki te matafaga i te feitu ki matū o te Tai o Kalilaia kae ko te fa‵kai foki o Anitelea mo Petelu. Ne ‵kami ne Iesu a Filipo: “Tautali mai i a au.”—Ioane 1:43.

 Ne maua ne Filipo a Natanielu, telā e fakaigoa foki ko Patolomaio, kae fai atu: “Ko oti ne maua ne matou a te tino telā ne tusi mai ei a Mose i te Tulafono mo tusi a te kau Pelofeta, ko Iesu te tama a Iosefa mai Nasaleta.” Ne fakalotolotolua a Natanielu kae fai atu ki a Filipo: “E a, e mafai o maua se mea ‵lei mai Nasaleta?” ko tena fesili.

Ne fakamalosi atu a Filipo: “Vau o onoono.” Ne lavea ne Iesu a Natanielu i te taimi ne fanatu ei kae fai atu: “Kiloke, tenei eiloa te tino Isalaelu telā e seai se uiga fakaloiloi i a ia.”

“Ne iloa pefea ne koe au?” ko te fesili a Natanielu.

Ne tali atu Iesu: “A koi tuai o kalaga atu a Filipo ki a koe i lalo i te lakau ko te mati, kae ko leva ne lavea ne au a koe.”

Ne tali atu mo te ofo a Natanielu: “Te Faiakoga, a koe ko te Tama a te Atua, a koe ko te Tupu o Isalaelu.”

“E a, ko talitonu koe ona ko au ne fai atu me ne lavea ne au a koe i lalo o te lakau ko te mati?” ko te fesili a Iesu. “Ka lavea eiloa ne koe a mea e sili fakafia atu i te ‵lasi i lō mea konei.” Kae ne folafola atu a Iesu: “Au e fai ‵tonu atu ki a koutou, ka lavea ne koutou a te lagi e matala mo agelu a te Atua e olo aka kae olo ifo ki te Tama a te tagata.”—Ioane 1:45-51.

Mai tua o te mea tenei ne tupu, ne tiakina ne Iesu, fakatasi mo ana soko ‵fou, a te vanu o te Iolitana, kae faima‵laga atu latou ki Kalilaia.