Ikatlo na nga adlaw halin sang nangin isa sa una nga mga disipulo ni Jesus si Natanael. Si Jesus kag ang iban niya nga disipulo nagpaaminhan sa distrito sang Galilea, sa ila lugar. Pakadto sila sa banwa sang Cana, ang lugar ni Natanael. Ang Cana nahamtang sa mga pukatod sa aminhan sang Nazaret nga gindak-an ni Jesus. Imbitado sila sa punsion sa kasal sa Cana.

Nagkadto man sa kasal ang iloy ni Jesus. Bangod abyan sang pamilya sang kalaslon si Maria, mahimo nagabulig sia sa pag-atipan sa madamo nga bisita. Gani nakita niya dayon nga may kulang, kag ginsugid niya ini kay Jesus: “Wala na sila sing alak.”—Juan 2:3.

Daw gusto ni Maria nga may himuon si Jesus sa sini nga problema sa alak. Nagagamit sing ekspresyon nga nagapakita sang iya pagpamatok, si Jesus nagsabat: “Ngaa mabalaka kita sa sina?” (Juan 2:4) Subong gintangdo sang Dios nga Hari, dapat ang iya langitnon nga Amay ang magatuytoy sa iya mga hilikuton, indi ang iya pamilya ukon mga abyan. Maalamon nga ginpabay-an ni Maria kon ano ang himuon sang iya anak kag nagsiling na lang sia sa mga alagad: “Himua ninyo ang bisan ano nga isiling niya sa inyo.”—Juan 2:5.

May anom ka tadyaw nga bato nga ang kada isa nagaunod sing 40 ka litro. Ginsilingan ni Jesus ang mga alagad: “Pun-a ninyo sing tubig ang mga tadyaw.” Dayon nagsiling si Jesus: “Magsandok kamo kag dalha ini sa manugdumala sang punsion.”—Juan 2:7, 8.

Nagdayaw ang manugdumala sa kanamit sang alak pero wala sia makahibalo nga ginhimo ini paagi sa milagro. Ginsilingan niya ang nobyo: “Una nga ginaserbe sang kalabanan nga tawo ang maayo nga alak, kag kon hubog na ang mga tawo, ginaserbe nila ang mapigaw nga alak. Apang ginserbe mo ang maayo nga alak tubtob karon.”—Juan 2:10.

Amo ini ang una nga milagro ni Jesus. Sang nakita ini sang bag-o nga mga disipulo, nagbakod ang ila pagtuo sa iya. Dayon si Jesus, ang iya iloy, kag ang iya mga utod sa iloy naglakbay pakadto sa siudad sang Capernaum sa aminhan-katundan nga baybayon sang Dagat sang Galilea.