KAPITLU 15
Iwettaq l-ewwel miraklu tiegħu
-
IT-TIEĠ F’KANA
-
ĠESÙ JBIDDEL L-ILMA FI NBID
Issa għaddew tlett ijiem minn mindu Natanjel sar wieħed mill-ewwel dixxipli taʼ Ġesù. Ġesù u minn tal-inqas ftit minn dawn l-ewwel dixxipli jimxu lejn it-Tramuntana sad-distrett tal-Galilija, l-inħawi fejn joqogħdu. Id-destinazzjoni tagħhom hi l-belt taʼ Kana, il-belt fejn jgħix Natanjel. Kana qiegħda fl-għoljiet lejn it-Tramuntana taʼ Nazaret, fejn trabba Ġesù nnifsu. Huma ġew mistidnin għal festa tat-tieġ f’Kana.
Omm Ġesù wkoll qiegħda t-tieġ. Bħala ħabiba tal-familja taʼ dawk li se jiżżewġu, Marija donnha kienet involuta f’li tgħin biex tieħu ħsieb il-ħafna mistidnin. Allura hi ma ddumx ma tinduna li hemm xi ħaġa nieqsa, u għalhekk tmur tgħid lil Ġesù: “M’għandhomx inbid.”—Ġwanni 2:3.
Marija fil-fatt qed tissuġġerixxi lil Ġesù biex jagħmel xi ħaġa dwar in-nuqqas taʼ nbid. Billi juża kliem figurattiv biex juri li qed joġġezzjona, Ġesù jwieġeb: “X’għandi x’naqsam miegħek, mara?” (Ġwanni 2:4) Bħala s-Sultan maħtur t’Alla, huwa Missieru tas-sema li jistaʼ jgħidlu x’għandu jagħmel u mhux familtu jew sħabu. Marija b’mod għaqli tħalli l-biċċa f’idejn binha, u lil dawk li qed iservu sempliċement tgħidilhom: “Agħmlu kulma jgħidilkom.”—Ġwanni 2:5.
Hemm sitt ġarar tal-ġebel għall-ilma, u kull waħda tistaʼ tesaʼ iktar minn 40 litru. Ġesù jgħid lil dawk li qed iservu: “Imlew il-ġarar bl-ilma.” Imbagħad Ġesù jgħid: “Issa ħudu ftit minnu u agħtuh lill-kap tal-festa.”—Ġwanni 2:7, 8.
Il-kap jibqaʼ impressjonat bil-kwalità mill-aqwa tal-inbid imma ma jafx li dan ġie b’miraklu. Hu jsejjaħ lill-għarus u jgħidlu: “Kulħadd joħroġ l-ewwel l-aħjar inbid, u meta n-nies ikunu xurbana, imbagħad joħroġ l-inferjuri. Int żammejt l-aħjar inbid s’issa.”—Ġwanni 2:10.
Dan hu l-ewwel miraklu li jwettaq Ġesù. Meta d-dixxipli l-ġodda tiegħu jaraw dan il-miraklu, il-fidi tagħhom fih tissaħħaħ. Wara, Ġesù, ommu, u ħutu min-naħa t’ommu jivvjaġġaw lejn il-belt taʼ Kafarnahum max-xatt tal-Majjistral tal-Baħar tal-Galilija.