Akxni xtitaxtunita la tamakgaxtokgka kCaná, Jesús kata’an kCapernaúm xtse chu xtunatalan: Santiago, José, Simón chu Judas.

Pero ¿tuku xlakata an kCapernaúm? Uma kachikin tlakg tlan niku wi nixawa Nazaret o Caná chu tlakg lanka. Nachuna, lhuwa kstalaninanin anta lamakgo o lakatsu wilakgo. Chuna tlakg tlan nakamasiyani niku xlakan lamakgo.

Jesús na tlawa lhuwa milagros kCapernaúm. Lhuwa latamanin xalak uma kachikin chu tiku lakatsu wilakgo katsikgo tuku xla tlawa. Pero ni makgas titaxtu, Jesús chu kstalaninanin ankgo kJerusalén, chuna la tlawakgo putum judíos tiku ni makgxtakgkgo Dios, xlakata natlawakgo Pascua kkata 30.

Akxni wilakgo kxtemplo Jerusalén, kstalaninanin Jesús akxilhkgo pulaktum xtayat Jesús nema ni xlakgapaskgo chu uma kaks kamalakawani.

Xlimapakgsin Dios wan pi israelitas xlimakamastatkan animales ktemplo, kJerusalén. Pero tiku makgat minkgonitancha talakaskin natamawakgo tuku nawakgo putum kilhtamaku nema natamakgxtakgkgo kkachikin. Limapakgsin masta talakaskin pi tiku makgat minkgoyacha tlan natamawakgo wakax, borregos, cabras chu atanu tuku namaklakaskinkgo akxni nachinkgo (Deuteronomio 14:24-26). Wa xlakata tiku stanankgo kJerusalén stakgo laktsu tsiktsi chu atanu animales lanka kxkilhtin templo. Nachuna, makgapitsi stananin kaʼakgskgawimakglhtikgo xtuminkan latamanin akxni lu tapalaxla listanankgo.

Akxni Jesús akxilha tuku lama xla lu sitsi. Wa xlakata kamakgani xtuminkan tiku lakgpalikgo tumin, kamakgpuspitni xmesajkan chu katlakgaxtu ktemplo. Alistalh kawani: «¡Kamapanutit putum umakgolh! ¡Nialh kalimaxtutit xchik kinTlat akgtum pustan!» (Juan 2:16).

Akxni kstalaninanin Jesús akxilhkgo tuku lanit, lakapastakkgo uma tuku xlichuwinankanit xlakata xKgawasa Dios: «La akgtum lhkuyat nema lakgpasama kkinaku chuna kpaxki minchik». Pero makgapitsi judíos kgalhskinkgo Jesús: «Kakilamasiyaniw tuku nalitasiya pi lakgchanan natlawaya uma». Xla kakgalhti: «Kalaktilhtit uma templo, chu akgtutu kilhtamaku naklitlawapara» (Juan 2:17-19; Salmo 69:9).

Xlakata judíos lakpuwankgo pi Jesús wa lichuwinama templo xalak Jerusalén, wanikgo: «Uma templo tipuxamachaxan kata litlawaka, ¿chu wix akgtutu kilhtamaku nalitlawaparaya?» (Juan 2:20). Pero akxni Jesús lichuwinama templo, kilhchanima xmakni. Akgtutu kata alistalh, akxni malakastakwanikan, kstalaninanin lakapastakkgo uma tachuwin.