Mai tua o te fakaipoipoga i Kana, ne fanatu a Iesu ki Kapanaumi. A te mātua o Iesu mo ana āfa taina—ko Iakopo, Iosefa, Simona mo Iuta—ne faima‵laga atu mo ia.

Kae kaia ne fanatu ei a Iesu ki Kapanaumi? E tai lauiloa a te fa‵kai tenei i lō Nasaleta mo Kana ona ko te koga e tu ei, kae kāti e tai lasi atu foki te fa‵kai tenā. E tokouke foki a soko ‵fou o Iesu e ‵nofo atu i ei io me i koga kolā e tai pili atu ki Kapanaumi. Tela la, ne mafai o akoako atu ei latou ne Iesu i olotou fale.

I tena nofoga i Kapanaumi, ne fai foki ne Iesu a galuega fakaofoofogia. Kae e tokouke foki a tino o te fa‵kai mo fa‵kai ‵pili ne lagona ne latou a mea ne fai ne ia i konā. Kae ko pili o olo atu a Iesu mo ana taugasoa, kolā ne tāgata ‵lotu Iutaia, ki Ielusalema o ‵kau atu ki te Paseka i te 30 T.A.

I te taimi ne ‵nofo atu ei latou i te faletapu i Ielusalema, ne matea atu ne soko o Iesu se mea e uiga ki a ia, telā ne fakaofoofogia kae ‵kese ‵ki mai i mea ne matea muamua ne latou.

Ne fakatonu atu i te Tulafono a te Atua ke fai ne tino Isalaelu a taulaga o manu i te faletapu, kae e manakogina ne tino asiasi atu a mea‵kai i te taimi e ‵nofo atu ei latou i konā. Tela la, ne talia i te Tulafono ke avatu ne tino mai i koga ‵mao kolā e faima‵laga atu ki Ielusalema a tupe ke ‵togi ki ei a “kano o pulumakau, ne kano o mamoe” mo nisi mea kolā e aoga ki te lotou ‵nofo atu i te fa‵kai. (Teutelonome 14:24-26) Ne ‵togi atu ei ne tino fai pisinisi a manu io me ko manu eva i loto i te koga ateatea lasi o te faletapu. Kae ko nisi o latou ne fakatogafiti ne latou a tino me ko tō ‵togi ‵mafa olotou manu.

Ona ko tena kaitaua, ne ‵ligi ei ne Iesu ki tua a tupe a te kau ‵fuli tupe, ‵tule olotou taipola, kae afuli ne ia a tāgata ki tua. Ne fai atu ei a Iesu: “Ave keatea a mea konei mai konei! Sa fai ne koutou a te fale o toku Tamana mo fai se fale e fakatau ei a koloa!”—Ioane 2:16.

I te laveaga ne soko o Iesu a te mea tenei, ne masaua ei ne latou a te valoaga e uiga ki te Tama a te Atua: “Ka ‵fonu eiloa au i te loto finafinau mō tou fale.” Kae ne fesili atu a te kau Iutaia penei: “Se a te fakailoga e mafai o fakaasi mai ne koe ki a matou, ona ko mea konei e fai ne koe?” Ne tali atu a Iesu penei: “Lepe ki lalo te faletapu tenei, kae ka toe fakatu aka ne au i aso e tolu.”—Ioane 2:17-19; Salamo 69:9.

Ne ma‵natu aka te kau Iutaia me ne fakauiga a Iesu ki te faletapu tenā i Ielusalema, kae ne fesili atu latou: “A te faletapu tenei ne fakatu i tausaga e 46, kae e mafai ne koe o fakatu aka i aso e tolu?” (Ioane 2:20) Kae ne fakasino atu eiloa a Iesu ki tena foitino e pelā me se faletapu. I te tolu tausaga mai tua ifo, ne masaua ei ne ana soko a pati konei i te taimi ne toe fakatu aka ei a ia mai te mate.