Afuɛ 30 nun’n, Zezi ɔli Delɛ cɛn’n i dilɛ Zerizalɛmun lɔ. Ɔ yoli abonuan sa kpanngban kpa lɔ. I sɔ’n ti’n, sran kaka be lafili i su. Be nun kun yɛle Nikodɛmun. Ɔ ti Farizifuɛ. Yɛ ɔ ti Zuifu’m be jɔlɛ difuɛ dandan mɔ be flɛ be akpasua’n kɛ Sanedrɛn’n, be nun sran kun. Ɔ kunndɛli kɛ ɔ́ sí Zezi i su sa wie mun ekun. Ɔ maan ɔ ko wunnin i wun kɔnguɛ. Kɔlɛ i wiengu Zuifu kpɛnngbɛn’m be wun srɛ ti yɛ ɔ yoli sɔ-ɔ. Afin ɔ seli i wun kɛ sɛ be wun i’n, bé sáci i dunman.

Ɔ seli Zezi kɛ: “Rabi, e si kɛ a ti like klefuɛ naan Ɲanmiɛn yɛ ɔ sunmannin wɔ-ɔ. Afin sran nga Ɲanmiɛn nunmɛn i sin’n, ɔ kwlá yoman abonuan sa nga a yo be’n.” Zezi tɛli i su kɛ sɛ “b’a wuman sran kun ekun’n,” ɔ kwlá wluman Ɲanmiɛn i Famiɛn diwlɛ’n nun.​—Zan 3:2, 3.

?Sanngɛ wafa sɛ yɛ sran kun mɔ b’a dun mmua b’a wu i’n, be kwla wu i ekun-ɔn? Nikodɛmun usɛli i kɛ: “?[Sran kun] kwla sɛ i sin i nin ku sɛ’n nun naan b’a wu i ekun?”​—Zan 3:4.

Nikodɛmun i ndɛ sɔ’n kle kɛ w’a wunman Zezi i ndɛ’n i wlɛ. Zezi yiyili nun kleli i kpa. Ɔ seli i kɛ: “Sɛ sran kun i awuliɛ’n finman nzue nin Ɲanmiɛn wawɛ’n, ɔ kwlá wluman Ɲanmiɛn i Famiɛn diwlɛ’n nun.” (Zan 3:5) Kɛ be yoli Zezi i batɛmun’n, Ɲanmiɛn wawɛ’n jrɛli i su. Ɔ maan ɔ ti kɛ b’a fa “nzue nin Ɲanmiɛn wawɛ’n” b’a wu i ekun sa. Asa kusu’n, nɛn kun tɛli ɲanmiɛn su lɔ. Ɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn.” (Matie 3:16, 17) I lɛ’n nun’n, Ɲanmiɛn kleli kɛ w’a wu i Wa’n ekun. Afin ɔ fɛli i wawɛ’n mɛnnin i. I sɔ’n ti’n, cɛn wie lele’n ba sɔ’n sɛ́ i sin ɲanmiɛn su lɔ Famiɛn diwlɛ’n nun. Afuɛ 33 nun’n, Pantekɔtu nun’n, Ɲanmiɛn wá fɛ́ i wawɛ’n mán sran wie mɔ b’a yo be batɛmun’n. Be kusu bé wú be ekun, kpɛkun bé káci Ɲanmiɛn i wa wie.​—Sa Nga Be Yoli’n 2:1-4.

Ɲanmiɛn i Famiɛn diwlɛ’n i su like nga Zezi kleli Nikodɛmun lɛ’n, ɔ ti kekle mɛn i. Ɔ maan w’a wunmɛn i wlɛ. I sɔ’n ti’n, Zezi yiyili junman nga i m’ɔ ti Ɲanmiɛn i Wa’n ɔ su wa di i asiɛ’n su wa’n nun. Ɔ seli kɛ: “Wafa kunngba nga aawlɛ flɛnnɛn’n nun lɔ’n, Moizi sieli wuo’n i nglo’n, i wafa kunngba’n ɔ fata kɛ be sie Sran wa’n i nglo wie. Ɔ maan be kwlaa nga be lafi i su’n, bé ɲán nguan m’ɔ leman awieliɛ’n.”​—Zan 3:14, 15.

Moizi blɛ su’n, ɔ fata kɛ Izraɛlifuɛ nga wuo kali be’n, be nian aaba wuo’n naan b’a fite nun. (Kalɛ 21:9) I kunngba’n, ɔ fata kɛ sran’m be kwlaa be lafi Ɲanmiɛn i Wa’n su naan b’a ɲan be ti sa tɛ’n nin wie’n be sa nun, naan b’a ɲan nguan m’ɔ leman awieliɛ’n. I sin’n, Zezi kan guali su kɛ klolɛ mɔ Ɲanmiɛn klo sran mun’n, i ti yɛ i sɔ’n kwla yo ye-ɔ. Ɔ seli Nikodɛmun kɛ: “Ɲanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ kle kɛ ɔ lafi i su’n w’a mlinman, sanngɛ ɔ ɲan nguan m’ɔ leman awieliɛ’n.” (Zan 3:16) Kɛ Zezi kán ndɛ sɔ’n, nn ɔ o Zerizalɛmun lɛ, yɛ w’a bo Ɲanmiɛn junman dilɛ bo w’a di anglo nsiɛn. Ɔ maan lɛ yɛ ɔ yiyili nun weiin kɛ i bɔbɔ Zezi yɛ Ɲanmiɛn fɛ́ i dé sran mun-ɔn.

Zezi seli Nikodɛmun kɛ: “Ɲanmiɛn w’a sunmɛnmɛn i Wa’n mɛn’n nun naan ɔ wa di mɛn’n i jɔlɛ.” Ndɛ sɔ’n i bo’n yɛle kɛ Ɲanmiɛn w’a sunmanman Zezi kɛ ɔ wa bu sran’m be fɔ naan be nunnun be. Sanngɛ ɔ sunmɛnnin i “naan i dunman nun’n, mɛn’n nunfuɛ’m be ɲan be ti.”​—Zan 3:17.

Sran’m be wun srɛ ti yɛ Nikodɛmun ko wunnin Zezi wun kɔnguɛ-ɔ. Ɔ maan kɛ Zezi gúɛ i ndɛ’n i bo’n, ɔ seli kɛ: “Like nga bé jrán su bé dí sran’m be jɔlɛ’n yɛ: Kannin’n [mɔ yɛle wafa nga Zezi nantili’n nin like ng’ɔ kleli sran mun’n] bali mɛn’n nun,  sanngɛ sran’m be yacili i lɛ be kloli aosin’n, afin be ayeliɛ’n ti tɛ. Sran ng’ɔ yo sa tɛtɛ’n, ɔ kpɔ kannin’n yɛ ɔ fiteman weiin nun, kɛ ɔ ko yo naan b’a yiman sa tɛ ng’ɔ yo’n i nglo’n ti. Sanngɛ sran ng’ɔ yo sa kpa’n, ɔ fite weiin nun naan be yi sa ng’ɔ yoli’n i nglo naan be wun kɛ sa sɔ’n ɔ ti Ɲanmiɛn i klun su.”​—Zan 3:19-21.

Nikodɛmun ti Farizifuɛ nin Izraɛli lɔ like klefuɛ kun. Ɔ maan siɛn’n, ɔ fata kɛ i bɔbɔ bu ndɛ nga Zezi kan kleli i’n i su akunndan. Kpɛkun ɔ wun junman nga Zezi di naan Ɲanmiɛn i klun sa’n w’a kpɛn su’n, i wlɛ.