Ler Zezi i Zerizalenm pour Lapak lannen 30, i fer bann siny oubyen mirak ki ekstraordiner. Sa i fer ki bokou dimoun i annan lafwa dan li. Nikodenm i en Farizyen e en manm Sannedren, setadir lakour siprenm Zwif. Zezi i enpresyonn li e Nikodenm i anvi aprann plis, alor i al vwar Zezi ler fernwanr in fer. Petet i fer sa akoz i per ki si lezot sef relizye i vwar li, sa pou gat son repitasyon.

Nikodenm i dir: “Ansenyan, nou konnen ou en ansenyan ki sorti kot Bondye parski personn pa kapab fer sa bann mirak ki ou fer amwen ki Bondye i avek li.” Zezi i dir Nikodenm ki pour en dimoun antre dan Rwayonm Bondye i bezwen “ne ankor.”​—Zan 3:2, 3.

Me ki mannyer en dimoun i kapab ne ankor? Nikodenm i demann Zezi: “I pa kapab antre dan vant son manman en dezyenm fwa pour li ne, non?”​—Zan 3:4.

Non, ne ankor pa vedir sa. Zezi i eksplike: “Si en dimoun pa’n ne par delo ek lespri sen, i pa kapab antre dan Rwayonm Bondye.” (Zan 3:5) Ler Zezi ti batize e lespri sen ti desann lo li, i ti ne “par delo ek lespri sen.” An menm tan, en lavwa dan lesyel ti dir: “Sa i mon Garson ki mon kontan ki mon’n aprouve.” (Matye 3:16, 17) Dan sa fason, Bondye ti anonse ki aprezan Zezi ti’n vin en garson spirityel ki annan sa lespwar pour antre dan Rwayonm lesyel. Pli tar zour Lapannkot lannen 33, lezot dimoun ki’n batize ti pou ganny lespri sen e alor zot ti pou ne ankor konman bann garson spirityel Bondye.​—Akt 2:1-4.

I difisil pour Nikodenm konpran sa ki Zezi pe ansenny li konsernan Rwayonm. Alor Zezi i donn li plis lenformasyon konsernan son rol konman Garson Bondye ler i lo later. Zezi i dir: “Parey Moiz ti met en serpan anpandan dan dezer, Garson zonm osi i devret ganny met anpandan lo poto, pour ki tou sa ki krwar dan li i a kapab ganny lavi eternel.”​—Zan 3:14, 15.

Zezi ti pe refer avek sa letan kot bann Izraelit ki ti ganny morde avek serpan ti bezwen get en serpan an kwiv pour ganny sove. (Nonm 21:9) Pareyman, tou bann imen i bezwen demontre zot lafwa dan Garson Bondye pour zot ganny libere anba kondannasyon lanmor e ganny lavi eternel. “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Alor, lanmenm la, Zerizalenm, zis sis mwan apre ki Zezi in konmans son minister, i fer kler ki se li menm li sa mwayen pour sov limanite.

Zezi i dir Nikodenm: “Bondye pa ti anvoy son Garson dan lemonn pour ziz lemonn.” Sa i vedir ki i pa’n ganny anvoye pour ziz tou dimoun avek lentansyon pour kondann zot tou amor. O kontrer, Zezi i dir ki i’n ganny anvoye “pour ki lemonn i ganny sove atraver li.”​—Zan 3:17.

Nikodenm in vin kot Zezi aswar dan kasyet akoz i per. Alor i enteresan ki Zezi i termin son konversasyon avek li par dir li: “Sa lalimyer [setadir Zezi par son fason viv ek lansennyman] in vin dan lemonn, me bann imen in pli kontan fernwanr ki lalimyer akoz sa ki zot fer i move e pour sa rezon zot pou ganny zize. Parski sa ki pratik sa ki mal i ay lalimyer  e i pa vin kot lalimyer pour ki son bann aksyon pa ganny devwale. Me sa ki fer sa ki byen i vin kot lalimyer pour montre ki sa ki i’n fer i an armoni avek lavolonte Bondye.”​—Zan 3:19-21.

Aprezan Nikodenm, sa Farizyen ek ansenyan Izrael i bezwen reflesir lo sa ki i fek tande konsernan rol Zezi dan plan Bondye.