E karaoi kanikina aika kamimi ao kakai Iesu ni menana i Ierutarem ibukin te Toa ae te Riao n 30 C.E. Ngaia are a a bati aomata ake a onimakinna. E anaaki naba nanon Nikotemo ae te Baritaio ao kaain te Tanirim are aia tabo ni kaboowi ae rietata I-Iutaia, ao e kan reiakina ae bati riki ao e kawara Iesu ngke e a roo. E bae ni karaoa aei ngke e a bong bwa e maaka uruanakin reitakina ma mataniwin te Aro n Iutaia ake tabemwaang ngkana e noraki.

E taku Nikotemo: “Rabi, ti ataiko bwa te tia reirei ngkoe ae ko nako mairoun te Atua, bwa akea ae e kona ni karaoi mwakuri aika kamimi aika ko karaoi aikai, ma tii ngkana iai te Atua irouna.” Ni kaekaana iroun Iesu, e tuanga Nikotemo bwa e riai ni “manga bungiaki” te aomata ngkana e na rin n ana Tautaeka n Uea te Atua.​—Ioane 3:2, 3.

Ma e na kangaa ni manga bungiaki te aomata? E titiraki Nikotemo ni kangai: “E a aki kona ni manga rin i nanoni biroton tinana bwa e na manga bungiaki, tiaki ngaia?”​—Ioane 3:4.

Bon tiaki anne ae nanonaki n te manga bungiaki. E kabwarabwaraa Iesu ni kangai: “Ngkana e aki bungiaki n te ran ao n te taamnei, ao e bon aki kona n rin n ana Tautaeka n Uea te Atua.” (Ioane 3:5) Ngke e bwabetitoaki Iesu ao n ruonaki n te taamnei ae raoiroi, e a bungiaki ngkanne iai “n te ran ao n te taamnei.” N te tai anne ao iai te bwaana mai karawa ae kangai: “Bon Natiu ae I tangiria teuaei, ae I kakatonga irouna.” (Mataio 3:16, 17) N te aro aei e a katanoataa te Atua ni kaota iai Iesu bwa natina n taamnei are e a karekea kantaningaan rinna n te Tautaeka n Uea i karawa. Imwina riki ni Bentekota 33 C.E., e na kabwaroaki te taamnei ae raoiroi i aoia ake a bwabetitoaki, ngaia are a na manga bungiaki ao n riki bwa natin te Atua n taamnei.​—Mwakuri 2:1-4.

E kangaanga otan Nikotemo n te baere e reireinaki iroun Iesu ibukin te Tautaeka n Uea. Ngaia are e a kamataataa riki Iesu ni kaineti ma mwiokoana ae okoro ngkai Natin te Atua ngaia ae te aomata. E taku Iesu: “N aroni Mote ae taura te naeta n te rereua, ao ai aron naba Natin te aomata bwa e riai n tauraki, bwa e aonga n reke te maiu are aki toki irouia aomata nako ake a kakoauaa.”​—Ioane 3:14, 15.

N taai ake ngkoa a riai tibun Iteraera ake a tenaaki n naeta aika boitin n taraa te naeta ae te buraati bwa a aonga ni kamaiuaki. (Warekaia Iteraera 21:9) N aron anne, a riai aomata nako n onimakina Natin te Atua bwa a aonga ni kamaiuaki man aroia ae te mate ao ni karekea te maiu are aki toki. E katuruturua Iesu ana babaire ae tatangira Iehova ngke e tuanga Nikotemo ni kangai: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane e onimakinna, ma e na reke irouna te maiu are aki toki.” (Ioane 3:16) Ngaia are onoua tabun te namwakaina imwini moanakin ana mwakuri ni minita Iesu i Ierutarem, ao e a kamataataa bwa boni ngaia are e mwiokoia Iehova ibukini kamaiuaia aomata.

E taku nakon Nikotemo: “E aki kanakomaia Natina te Atua nako buakoia aomata bwa e na kabuakakaia.” E nanonaki n aei bwa e aki kanakomaiakaki bwa e na motiki taekaia aomata nako bwa a na kamaunaaki. Ma n aron are e taekinna Iesu, e kanakomaiakaki bwa ‘a aonga ni kamaiuaki kaain te aonnaba rinanona.’​—Ioane 3:17.

E maaku Nikotemo ao e karabaa ni kawara Iesu ngke e a rotongitong. E kakaongora bwa e motika ana maroro Iesu nakoina ni kangai: “Aei bukin  te kabuakaka: bwa e a roko te oota [are e kaotiotia Iesu ni maiuna ao n ana reirei] i buakoia kaain te aonnaba, ma a tangira riki te rotongitong aomata nakon te oota, bwa a bubuaka aia mwakuri. Bwa ane e kakaraoi baika rangi ni buakaka, ao e ribaa te oota ao e aki nakon te oota, bwa e kaawa ni kaotaraeaki ae a bubuaka ana mwakuri. Ma e nakon te oota ane e kakaraoa ae raoiroi, bwa e aonga ni kaotaki bwa a karaoaki ana mwakuri n te aro ae boraoi ma nanon te Atua.”​—Ioane 3:19-21.

Ai ngaia are e a bon nakon te Baritaio ao te tia reirei ae te I-Iteraera ae Nikotemo kaotiotani baike e a tibwa ongo ni mwiokoan Iesu n ana kantaninga te Atua.