To whenue Jesu tin to Jelusalẹm na Juwayi owhe 30 W.M. tọn, e basi ohia kavi azọ́njiawu susu he jẹna ayidego. Taidi kọdetọn de, mẹsusu tindo yise to ewọ mẹ. Awú sọ ji Nikodẹmi, yèdọ Falesi de he yin dopo to hagbẹ whẹdatẹn daho Juvi lẹ tọn he nọ yin yiylọdọ Sanhedlin mẹ. Na e jlo na plọn nususu dogọ wutu, e dla Jesu pọ́n to zánmẹ, vlavo na e to budi na nuhe ogán Juvi lẹ tọn he pò lẹ na dọ gando ewọ go eyin yé mọ ẹn wutu.

Nikodẹmi dọmọ: “Labi, mí yọnẹn dọ hiẹ, taidi mẹplọntọ de, wá sọn Jiwheyẹwhe dè; na mẹde ma sọgan basi ohia ehelẹ he hiẹ ko basi adavo Jiwheyẹwhe tin hẹ ẹ.” To gblọndo Jesu tọn mẹ, e dọna Nikodẹmi dọ eyin mẹde ma “yin vivọji,” e ma sọgan biọ Ahọluduta Jiwheyẹwhe tọn mẹ.—Johanu 3:2, 3.

Ṣigba, nawẹ mẹde sọgan yin vivọji gbọn? Nikodẹmi kanse e dọmọ: “E ma sọgan biọ ohò onọ̀ etọn tọn mẹ whla awetọ bosọ vọ́ yin jiji gba, kavi e sọgan wàmọ wẹ?”—Johanu 3:4.

Lala, e ma yin nuhe yinyin vivọji zẹẹmẹdo niyẹn gba. Jesu basi zẹẹmẹ dọmọ: “Adavo mẹde yin jiji gbọn osin po gbigbọ po dali, e ma sọgan biọ Ahọluduta Jiwheyẹwhe tọn mẹ.” (Johanu 3:5) To whenue Jesu yí baptẹm bọ gbigbọ wiwe jẹ do e ji, e gbọnmọ dali yin jiji “gbọn osin po gbigbọ po dali.” To ojlẹ enẹ mẹ, nulila de yin bibasi sọn olọn mẹ dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi.” (Matiu 3:16, 17) Jiwheyẹwhe gbọnmọ dali dohia dọ Jesu ko lẹzun visunnu gbigbọmẹ tọn de todin bo tindo todido nado biọ Ahọluduta olọn tọn mẹ. To nukọn mẹ, to Pẹntikọsti 33 W.M., gbigbọ wiwe na yin kinkọ̀n do mẹdevo he yí baptẹm lẹ ji, bọ yé na gbọnmọ dali yin vivọji taidi ovi gbigbọmẹ tọn Jiwheyẹwhe tọn lẹ.—Owalọ lẹ 2:1-4.

E vẹawuna Nikodẹmi nado mọnukunnujẹ nuhe Jesu to pinplọn ẹn gando Ahọluduta lọ go mẹ. Enẹwutu, Jesu na ẹn nudọnamẹ lẹ dogọ gando azọngban titengbe he e tindo taidi Visunnu Jiwheyẹwhe tọn he yin gbẹtọvi de go. Jesu dọmọ: “Kẹdẹdile Mose ze odàn lọ daga to danfafa ji do, mọ wẹ Visunnu gbẹtọ tọn dona yin zizedaga do, na mẹdepope he yise to ewọ mẹ nido sọgan tindo ogbẹ̀ madopodo.”—Johanu 3:14, 15.

To hohowhenu, Islaelivi he odàn adínọ lẹ dù lẹ dona pọ́n odàn gànvẹẹ tọn lọ hlan nado gán. (Osọha lẹ 21:9) Mọdopolọ, gbẹtọ lẹpo dona tindo yise to Visunnu Jiwheyẹwhe tọn mẹ nado yin whinwhlẹngán sọn ninọmẹ okú tọn yetọn mẹ, podọ nado mọ ogbẹ̀ madopodo yí. To nuhe Jesu dọna Nikodẹmi bọdego mẹ, e zinnudo lehe Jehovah do owanyi etọn hia to whẹho ehe mẹ do ji dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) Gbọnmọ dali, nudi osun ṣidopo to whenue Jesu bẹ lizọnyizọn etọn jẹeji godo, e hẹn ẹn họnwun to Jelusalẹm dọ ewọ wẹ aliho whlẹngán tọn lọ na gbẹtọvi lẹ.

Jesu dọna Nikodẹmi dọmọ: “Jiwheyẹwhe do Visunnu etọn hlan aihọn mẹ, e ma yin na ewọ nido dawhẹna aihọn gba.” Ehe zẹẹmẹdo dọ ewọ ma yin didohlan nado gblewhẹdo aihọn lọ, bo dawhẹ vasudo tọn na gbẹtọvi lẹ gba. Kakatimọ, dile Jesu dọ do, e yin didohlan “na aihọn nido yin whinwhlẹngán gbọn ewọ gblamẹ.”—Johanu 3:17.

Nikodẹmi wá Jesu dè to zánmẹ na e to budi wutu. Enẹwutu, nado dotana hodọdopọ yetọn,  e jẹna ayidego dọ Jesu dọmọ: “Todin, dodonu whẹdida lọ tọn die, dọ hinhọ́n lọ [he Jesu yin gbọn gbẹzan po nuplọnmẹ etọn lẹ po dali] wá aihọn mẹ; ṣigba gbẹtọ lẹ yiwanna zinvlu kakati nido yin hinhọ́n, na azọ́n yetọn lẹ yin ylankan wutu. Na ewọ he nọ wà onú ylankan lẹ nọ gbẹwanna hinhọ́n bo ma nọ wá hinhọ́n nù, na azọ́n etọn lẹ nikaa yin didegbà. Ṣigba, ewọ he nọ wà nuhe yin nugbo nọ wá hinhọ́n nù, na azọ́n etọn lẹ nido sọgan yin hinhẹn sọawuhia, dọ yé ko yin bibasi to kọndopọ mẹ hẹ ojlo Jiwheyẹwhe tọn.”—Johanu 3:19-21.

Todin, e pò to Nikodẹmi, yèdọ Falesi podọ mẹplọntọ Islaeli tọn enẹ si nado lẹnnupọndo nuhe e ṣẹṣẹ sè gando azọngban Jesu tọn to lẹndai Jiwheyẹwhe tọn mẹ go ji.