Bayat ti kaaddana idiay Jerusalem tapno selebraranna ti Paskua ti 30 C.E., nagaramid ni Jesus kadagiti nakaskasdaaw a pagilasinan, wenno milagro. Gapuna, adu ti namati kenkuana. Ni Nicodemo, a maysa a Fariseo ken kameng ti nangato a korte dagiti Judio a maawagan Sanhedrin, ket nasdaaw kenkuana. Gapu ta kayatna nga ad-adu pay ti maammuanna, napan ken Jesus iti rabii, nalabit gapu ta mabuteng a madadael ti reputasionna kadagiti lider dagiti Judio no adda makakita kenkuana.

“Rabbi,” kinuna ni Nicodemo, “ammomi a maysaka a mannursuro nga imbaon ti Dios, ta awan ti makaaramid kadagiti milagro nga ar-aramidem malaksid no tulongan ti Dios.” Kinuna ni Jesus ken Nicodemo a tapno makastrek ti maysa iti Pagarian ti Dios, masapul a “mayanak manen.”​—Juan 3:2, 3.

Kasano ngarud a mayanak manen ti maysa a tao? “Makastrek kadi iti aanakan ni inana sa mayanak manen?” insaludsod ni Nicodemo.​—Juan 3:4.

Saan a dayta ti kayat a sawen ti mayanak manen. Inlawlawag ni Jesus: “Awan ti makastrek iti Pagarian ti Dios malaksid no mayanak iti danum ken espiritu.” (Juan 3:5) Idi nabautisaran ken bimmaba kenkuana ti nasantuan nga espiritu, nayanak ni Jesus “iti danum ken espiritu.” Iti dayta met la a tiempo, adda timek a naggapu idiay langit a kunana: “Daytoy ti Anakko a dungdungnguek, a pakaragsakak.” (Mateo 3:16, 17) Iti dayta a pamay-an, impakaammo ti Dios a pinarsuana ni Jesus kas maysa nga espiritu nga anak a mabalin a sumrek iti Pagarian ti Dios idiay langit. Idi Pentecostes 33 C.E., naiparukpok ti nasantuan nga espiritu iti dadduma pay a nabautisaran, ket nayanakda manen kas annak ti Dios babaen ti espiritu.​—Aramid 2:1-4.

Narigat a maawatan ni Nicodemo ti isursuro ni Jesus kenkuana maipapan iti Pagarian. Gapuna, nangted ni Jesus iti kanayonan nga impormasion maipapan iti naisangsangayan nga akemna kas tao nga Anak ti Dios. Kinuna ni Jesus: “No kasano a nangibitin ni Moises iti uleg iti poste idiay let-ang, masapul met a maibitin ti Anak ti tao, tapno maaddaan iti biag nga agnanayon ti asinoman a mamati kenkuana.”​—Juan 3:14, 15.

Idi un-unana, dagiti Israelita a nakagat iti nagita nga uleg masapul a kitaenda ti uleg a naaramid iti gambang tapno saanda a matay. (Numeros 21:9) Kasta met, masapul nga agtignay amin a tao maitunos iti pammatida iti Anak ti Dios tapno maisalakanda ken maaddaanda iti agnanayon a biag. Impaganetgetna nga inaramid ni Jehova dayta gapu iti ayat. Kinuna ni Jesus ken Nicodemo: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Gapuna, innem a bulan kalpasan ti panangrugi ti ministeriona, impakita ni Jesus idiay Jerusalem nga isu ti dalan nga agturong iti pannakaisalakan ti sangatauan.

Kinuna ni Jesus ken Nicodemo: “Saan nga imbaon ti Dios ti Anakna ditoy lubong tapno mangukom.” Kayatna a sawen a saan a naibaon ni Jesus a mangukom iti amin a tattao tapno madadaelda. Imbes ketdi, kinuna ni Jesus a naibaon “tapno maisalakan ti lubong babaen kenkuana.”​—Juan 3:17.

Mabutbuteng a napan ni Nicodemo ken Jesus iti rabii. Gapuna, makapainteres ta inngudo ni Jesus ti saritaanda babaen kadagitoy a sasao: “Kinapudnona, immay ti lawag [nga isu ni Jesus babaen ti biag ken pannursurona] ditoy lubong  ngem inayat dagiti tattao ti sipnget imbes a ti lawag, ta dakes dagiti aramidda, isu a maukomdanto. Ta asinoman nga agar-aramid iti dakes kagurana ti lawag ket saan a mapan iti lawag, tapno saan a maipakita dagiti aramidna. Ngem asinoman nga agaramid iti umiso mapan iti lawag, tapno maipakita dagiti aramidna a maitunos iti pagayatan ti Dios.”​—Juan 3:19-21.

Ngarud, makaammon ni Nicodemo, a maysa a Fariseo ken mannursuro iti Israel, a mangutob iti kangkangngegna maipapan iti akem ni Jesus iti panggep ti Dios.