Okenọ Jesu o kpobọ Jerusalẹm kẹ ehaa Ọnyavrẹ ọrọ ukpe 30 C.E. na, o ru iruo igbunu sa-sa. Onana u ru nọ ahwo buobu a ro fi ẹrọwọ họ iẹe. Iruo igbunu na i duobọte Nikodimọs udu gaga, ọnọ ọ rrọ omọvo otu Farisi jẹ rrọ omọvo ogbẹgwae Sanhẹdrin na. Fikinọ ọ gwọlọ gbe wuhrẹ haro, ọ tẹ nya bru Jesu evaọ aso. Ẹsejọhọ oware nọ o lẹliẹ e riẹ nya evaọ aso na họ, fiki ozọ inọ otẹrọnọ isu ahwo Ju efa a ruẹ e riẹ, a ti rri rie vo.

Nikodimọs ọ tẹ ta nọ: “Owuhrẹ, ma riẹ nọ whẹ yọ owuhrẹ nọ o no obọ Ọghẹnẹ ze; keme ohwo ọvo ọ rẹ sai ru iruo igbunu nana nọ who bi ru na ha ajokpanọ Ọghẹnẹ ọ rrọ kugbei.” Jesu ọ tẹ ta kẹe nọ a rẹ “wariẹ ohwo yẹ” hrọ re ọ sae ruọ Uvie Ọghẹnẹ.—Jọn 3:2, 3.

Kọ ẹvẹ a rẹ wariẹ ohwo yẹ? Nikodimọs ọ nọ riẹ nọ: “Kọ ọ rẹ sae ruọ edhede oni riẹ a vẹ wariẹ yẹe?”—Jọn 3:4.

Ijo, orọnikọ ere a rẹ rọ wariẹ ohwo yẹ hẹ. Jesu o ru ẹme na vẹ kẹe nọ: “Ajokpanọ a rẹ rọ ame gbe ẹzi yẹ ohwo, o gbẹ rrọ ere he ọ rẹ sae ruọ Uvie Ọghẹnẹ hẹ.” (Jọn 3:5) Nọ Jesu ọ họ-ame no nọ a je ku ẹzi ọfuafo ku ei, ẹsiẹe a rọ rehọ “ame gbe ẹzi” ro yẹi. Evaọ oke yena, urru jọ u no obọ odhiwu ze nọ o ta nọ: “Ọnana họ Ọmọ mẹ, oyoyou mẹ na, ọnọ mẹ jẹrehọ.” (Matiu 3:16, 17) Enẹ Ọghẹnẹ o ro whowho inọ Jesu yọ ọmọ riẹ nọ ọ rọ ẹzi ọfuafo wholo no, ọnọ ọ te ruọ Uvie odhiwu. Uwhremu na, evaọ Pẹntikọst ọrọ 33 C.E., a tẹ jẹ rọ ẹzi ọfuafo wholo amọfa nọ a họ-ame no, yọ onana u dhesẹ nọ a wariẹ e rai yẹ no re wọhọ emọ Ọghẹnẹ.—Iruẹru Ikọ 2:1-4.

O rrọ bẹbẹ kẹ Nikodimọs re o wo otoriẹ oware nọ Jesu o bi wuhrẹ iẹe kpahe Uvie na. Fikiere Jesu ọ tẹ ta eware efa kẹe kpahe obọdẹ uvẹ-ọghọ nọ ọyomariẹ o wo nọ ọ rọ rrọ Ọmọ Ọghẹnẹ evaọ obọ otọakpọ obonẹ. Jesu ọ ta nọ: “Wọhọ epanọ Mosis ọ kpare araomuomu na kpehru evaọ udhude na, ere ọvona a rẹ te kpare Ọmọ ohwo kpehru hrọ, re ohwo kpobi nọ ọ rọwo e riẹ ọ sai wo uzuazọ ebẹdẹ bẹdẹ.”—Jọn 3:14, 15.

Evaọ ikpe buobu nọ i kpemu, nọ eraomuomu e jẹ rowo emọ Izrẹl, a ta kẹ ae nọ a rri araomuomu nọ a rọ ẹroo ru re a sae zọ. (Ikelakele 21:9) Epọvo na re, o gwọlọ nọ ahwo a re fi ẹrọwọ họ Ọmọ Ọghẹnẹ re a sai siwi ai no uwhu, re a je wo uzuazọ ebẹdẹ bẹdẹ. Re o fiobọhọ kẹ Nikodimọs riẹ epanọ uyoyou Jihova o rro te evaọ onana, ọ ta kẹe nọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Enẹ Jesu o ro ru ei vẹ okenọ ọ jọ obọ Jerusalẹm, oware wọhọ emerae ezeza nọ o mu iruo odibọgba riẹ họ no, inọ ẹkwoma riẹ ahwo-akpọ a ti ro wo esiwo.

Jesu ọ ta kẹ Nikodimọs nọ: “Orọnikọ Ọghẹnẹ o vi Ọmọ riẹ ziọ akpọ na re o gu akpọ na ẹdhọ họ.” Onana u dhesẹ nọ orọnikọ ọ nyaze ti bruoziẹ kpe ahwo-akpọ họ re a raha ae kufiẹ. Ukpoye, Jesu ọ ta nọ a vi rie ze “re akpọ na ọ rọ ẹkwoma riẹ wo esiwo.”—Jọn 3:17.

Aso Nikodimọs ọ rọ nya bru Jesu fiki ozọ. Agbẹta nọ Jesu o ro ku ẹmeọta riẹ họ kugbei inọ: “Fiki onana a ti ro gu ahwo ẹdhọ: inọ elo na [onọ Jesu ọ rọ iwuhrẹ gbe uzuazọ riẹ ro dhesẹ via] ọ ziọ akpọ na, rekọ ahwo a you  ebi viukpọ elo na, keme iruo rai e rrọ muomu. Keme ohwo kpobi nọ o bi ru eware iyoma o mukpahe elo na, ọ rẹ ziọ elo na ha, re a siọ iruo riẹ ba ebrukpe. Rekọ ohwo kpobi nọ o bi ru oware nọ o gba ọ rẹ nyaze elo na, re iruo riẹ e ruẹsi dhesẹ oma via inọ e rọwokugbe oreva Ọghẹnẹ.”—Jọn 3:19-21.

Obọnana, obọ Nikodimọs o rrọ sọ o ti roro kpahe eware nọ Jesu o wuhrẹ i rie evaọ ẹdẹ yena kpahe epanọ ohwo ọ sai ro wo esiwo.