Akxni Jesús wi kJerusalén xlakata natlawa Pascua kkata 30, tlawa milagros nema kaks malakawaninan. Wa xlakata lhuwa tiku tsukukgo kanajlanikgo. Nicodemo, chatum fariseo tiku makgtapakgsi kSanedrín, kaks lilakawan. Xlakata tlakg katsiputun tiku Jesús, an lakgapaxialhnan katsisni, max xlakata pekuan pi amakgapitsi xpulalinanin judíos naʼakxilhkgo chu nitlan nalichuwinankan.

Nicodemo wani: «Rabí, kkatsiyaw pi wix wa malakgachanitan Dios chuna la chatum makgalhtawakgena, xlakata ni tiku tlan tlawa milagros nema wix tlawaya komo ni wa Dios maxkima litliwakga». Jesús wani pi xlakata tlan natanukan kxTamapakgsin Dios, talakaskin nalakachimparakan (Juan 3:2, 3).

Nicodemo kgalhskininan: «¿La tlan nalakachin chatum chixku akxni lina kata? Nila natanupara xlimakgtiy kxpan xtse, chu nalakachin amakgtum, ¿ni xlikana?» (Juan 3:4).

Ni. Uma ni wa tuku wamputun nalakachimparaya. Jesús wani tuku kilhchanima: «Komo wi tiku ni nalakachin kchuchut chu kʼespíritu, nila katitanulh kxTamapakgsin Dios» (Juan 3:5). Jesús lakachilh kchuchut chu kʼespíritu akxni tamunulh chu taktalh espíritu santo kxakpun. Chu takgaxmatli tachuwin kʼakgapun: «Uma kinKgawasa, tiku lu kpaxki, chu lu tlan kimamakgkatsini» (Mateo 3:16, 17). Akxni Dios chuna wa, makatsininalh pi uma kilhtamaku, Jesús xlitaxtunit xkgawasa Dios nema tlan xlatamapa kʼakgapun chu tlan xtanulh kTamapakgsin xalak akgapun. Alistalh, kPentecostés kkata 33, Dios nakalilaksaka xʼespíritu santo makgapitsi kstalaninanin Cristo. Chuna, amakgtum nalakachimparakgo, uma wamputun, xkamanan Dios nalitaxtukgo tiku tlan nalatamakgo kʼakgapun (Hechos 2:1-4).

Nicodemo nila akgatekgsa tuku Jesús masiyanima xlakata Tamapakgsin. Wa xlakata Jesús tlakg litachuwinan taskujut nema minit makgantaxti kKatiyatni xlakata wa xKgawasa Dios. Wani: «Chuna la Moisés mawakalh luwa kkgantum kiwi kxakaskakni tiyat, nachuna latamanin namawakakgo xKgawasa chixku, xlakata putum tiku nakanajlanikgo, tlan nakgalhikgo latamat nema ni kgalhi xlisputni» (Juan 3:14, 15).

Makgasa, akxni luwa kaxkalh makgapitsi israelitas, xtalakaskin pi xʼakxilhkgolh luwa xacobre nema xtlawanit Moisés xlakata ni xnikgolh (Números 21:9). Nachuna putum tiku lakgtaxtuniputunkgo talakgalhin chu linin chu latamaputunkgo putum kilhtamaku xlikanajlanitkan xKgawasa Dios. Alistalh, Jesús wani Nicodemo tuku tlawanit Jehová xpalakata uma: «Dios lu kapaxkilh kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16). Wa xlakata, unu kJerusalén, akxni max akgchaxan papaʼ titaxtunit lata Jesús matsukilh xtaskujut, Jesús liwana masiya pi wa tiji xla lakgtaxtut.

Alistalh, wanipara Nicodemo: «Dios ni malakgachalh xKgawasa kkakilhtamaku xlakata nalakputsanani». Uma wamputun pi Jesús ni malakgachaka xlakata nakawani latamanin pi nanikgo, wata chuna la xla wan, malakgachaka «latamanin xalak kakilhtamaku nalakgtaxtukgo xpalakata» (Juan 3:17).

Nicodemo lakganit Jesús katsisni xlakata pekuan tuku max nawankgo amakgapitsin. Wa xlakata kaks malakawaninan pi xaʼawatiya Jesús wani: «Xlikana, makgskgot [kilhchanima Jesús, xlakata la lilh xlatamat chu tuku masiyalh] minit kkakilhtamaku, pero latamanin ni paxkikgonit makgskgot,  paxkikgonit tuku kapukswa, xlakata tlawakgo tuku nitlan, wa uma tuku xlakata nakalilakputsananikan. Xlakata putum tiku tlawa tuku nitlan, ni akxilhputun makgskgot chu ni min niku wi makgskgot, xlakata ni natakatsi tuku tlawama. Pero putum tiku tlawa tuku xaxlikana lakgmin makgskgot, xlakata natasiya pi tuku tlawa chuna tlawama la lakaskin Dios» (Juan 3:19-21).

La uku Nicodemo, tiku fariseo chu makgalhtawakgena, lakgchan nalilakpuwan tuku aku kgaxmatli xlakata tuku Jesús namakgantaxti kxtalakaskin Jehová.