Taim Jisas i stap long Jerusalem long Pasova bilong yia 30 C.E., em i wokim sampela bikpela mirakel. Olsem na planti man i bilip long em. Nikodemus, em wanpela Farisi na memba bilong nambawan kot bilong ol Juda em ol i kolim Sanhedrin, em tu i kirap nogut long ol samting Jisas i mekim. Em i laik kisim sampela save moa, olsem na em i go lukim Jisas long nait, ating em i pret nogut ol man i lukim em na dispela bai bagarapim gutnem bilong en na ol narapela hetman bilong Juda.

Nikodemus i tok: “Rabai, mipela i save olsem yu wanpela tisa na God i bin salim yu i kam. I no gat wanpela man inap wokim ol dispela mirakel yu save wokim sapos God i no stap wantaim em.” Na Jisas i tokim Nikodemus olsem, bilong i go insait long Kingdom Bilong God, man i mas “bon gen.”—Jon 3:2, 3.

Tasol olsem wanem man inap bon gen? Nikodimas i tok: “Em i no inap go insait long bel bilong mama na mama i karim em gen, a?”—Jon 3:4.

Jisas i tok, dispela tok bon gen i no makim olsem, nogat. Em i tok: “Sapos man i no bon long rot bilong wara na holi spirit, em i no inap i go insait long kingdom bilong God.” (Jon 3:5) Taim Jisas i kisim baptais na holi spirit i kam daun long em, em i bon “long rot bilong wara na holi spirit.” Long dispela taim, wanpela nek long skai i tokaut olsem: “Dispela em i Pikinini bilong mi, mi laikim em tumas na mi amamas long em.” (Matyu 3:16, 17) Long dispela rot, God i tokaut olsem em i makim Jisas olsem pikinini spirit bilong em na em inap i go insait long Kingdom bilong heven. Bihain, long Pentikos long yia 33 C.E., holi spirit i kapsait antap long ol narapela man husat i baptais pinis, na ol tu i bon gen olsem ol pikinini bilong God long spirit.—Aposel 2:1-4.

Nikodemus i hatwok long kliagut long ol tok bilong Kingdom em Jisas i skulim em long en. Olsem na Jisas i kamapim sampela tok moa long bikpela wok em bai mekim taim em i stap olsem Pikinini bilong God long graun. Jisas i tok: “Moses i bin hangamapim snek long ples nating, na long wankain pasin ol bai hangamapim Pikinini bilong man. Long dispela rot olgeta man i bilip long em ol i ken kisim laip oltaim.”—Jon 3:14, 15.

Long bipo ol Israel em posin snek i kaikaim ol, ol i mas lukluk i go long snek bras na bai ol i ken kamap orait gen. (Namba 21:9) Olsem tasol, olgeta man i mas bilip long Pikinini Bilong God na bai ol i ken abrusim dai na kisim laip i stap oltaim. Jisas i kamapim klia pasin laikim bilong Jehova, na em i tokim Nikodemus: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Olsem na 6-pela mun bihain long Jisas i kirap mekim wok God i givim long en, em i tokaut klia olsem long rot bilong em God bai kisim bek ol man.

Jisas i tokim Nikodemus: “God i no salim Pikinini bilong en i go namel long ol manmeri bilong stap olsem jas, nogat.” Dispela tok bilong em i makim olsem em i no kam olsem jas bilong skelim pasin nogut bilong ol na tok olsem ol i mas bagarap. Tasol olsem Jisas i tok, God i salim em i go “bilong kisim bek ol manmeri long rot bilong em.”—Jon 3:17.

Nikodemus i pret, olsem na em i kam lukim Jisas long nait. Olsem na bilong pinisim tok, Jisas i tokim em: “As bilong kot i olsem, lait [em laip bilong Jisas na ol tok em i skulim ol man long en] i kam pinis long ol manmeri, tasol ol man i laikim  tudak na ol i no laikim lait, long wanem, pasin bilong ol i nogut. Man i save mekim ol stingpela samting, em i heitim lait na em i no save go long lait. Em i no laik bai ol pasin bilong em i kamap ples klia. Tasol man i save mekim ol stretpela pasin, em i save go long lait, bai ol pasin bilong em i ken soim ples klia olsem ol samting em i mekim i stret wantaim laik bilong God.”—Jon 3:19-21.

Nau Nikodemus em dispela Farisi na tisa bilong Israel, em yet i mas skelim ol tok em i harim long wok bilong Jisas long ol samting God i tingting pinis long mekim.