Han nakadto hi Jesus ha Jerusalem para han Paskua han 30 C.E., naghimo hiya hin urusahon nga mga tigaman, o milagro. Salit damu an tinoo ha iya. Bumilib ha iya hi Nicodemo, usa nga Pariseo ngan membro han hitaas nga korte han mga Judio nga gintatawag nga Sanhedrin. Karuyag ni Nicodemo mahibaro hin dugang pa salit ginbisita niya hi Jesus ha gab-i, bangin tungod kay nahadlok hiya nga madaot an iya reputasyon ha iba nga Judio nga lider kon makit-an hiya.

Hi Nicodemo nagsiring: “Rabbi, maaram kami nga magturutdo ka nga tikang ha Dios, kay waray makakahimo hini nga mga milagro nga imo ginbubuhat kon diri hiya tagan han Dios hin gahum.” Ginsidngan hiya ni Jesus nga basi makasulod ha Ginhadian han Dios, an usa kinahanglan “ig-anak utro.”—Juan 3:2, 3.

Pero paonan-o an usa ig-aanak utro? Nagpakiana hi Nicodemo: “Makakasulod ba hiya ha tiyan han iya nanay basi ig-anak utro?”—Juan 3:4.

Diri ito an iginpapasabot han pagin igin-anak utro. Hi Jesus nagsaysay: “An usa nga tawo diri makakasulod ha Ginhadian han Dios kon diri hiya ig-anak utro pinaagi ha pagpabawtismo ha tubig ngan pagkarawat han baraan nga espiritu.” (Juan 3:5) Han ginbawtismohan hi Jesus ngan an baraan nga espiritu linusad ngada ha iya, igin-anak hiya pinaagi ‘ha tubig ngan han baraan nga espiritu.’ Hito nga takna, may tingog ha langit nga nagsiring: “Ini an akon Anak nga hinigugma, nga akon nalilipayan.” (Mateo 3:16, 17) Hini nga paagi, iginpahayag han Dios nga hi Jesus nagin espirituwal nga anak nga may paglaom nga makasulod ha Ginhadian han langit. Ha urhi, ha Pentekostes 33 C.E., an baraan nga espiritu igbububo ha iba nga nabawtismohan, ngan salit ig-aanak utro sugad nga espirituwal nga mga anak han Dios.—Buhat 2:1-4.

Makuri para kan Nicodemo nga masabtan an igintututdo ni Jesus mahitungod han Ginhadian. Salit naghatag hi Jesus hin dugang nga impormasyon may kalabotan han iya espesyal nga bahin sugad nga tawhanon nga Anak han Dios. Hi Jesus nagsiring: “Sugad la nga ginbitay ni Moises an halas didto ha kamingawan, kinahanglan bitayon liwat an Anak han tawo, basi an bisan hin-o nga natoo ha iya magkaada kinabuhi nga waray kataposan.”—Juan 3:14, 15.

Hadto, an mga Israelita nga gintukob han malara nga mga halas kinahanglan magkita ha tumbaga nga halas basi matalwas. (Numeros 21:9) Ha pariho nga paagi, an ngatanan nga tawo kinahanglan magpakita hin pagtoo ha Anak han Dios basi matalwas ha kamatayon ngan magkaada kinabuhi nga waray kataposan. Basi pabug-atan an pagin mahigugmaon ni Jehova, nagsiring hi Jesus kan Nicodemo: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Salit han nakadto hi Jesus ha Jerusalem mga unom ka bulan katapos niya tikangan an iya ministeryo, iginpatin-aw niya nga hiya an gagamiton basi matalwas an katawohan.

Hi Jesus nagsiring kan Nicodemo: “Ginsugo han Dios an iya Anak nganhi ha kalibotan, diri basi hukman an kalibotan.” Nagpapasabot ini nga waray hiya kumanhi basi hukman hin maraot an kalibotan, o sirotan hin kabungkagan an ngatanan nga tawo. Lugod, sugad han iya ginsiring, ginpakanhi hiya “basi matalwas an kalibotan pinaagi ha iya.”—Juan 3:17.

Tungod kay nahahadlok hi Nicodemo nga may makakita ha iya, kinadto hiya kan Jesus ha gab-i. Salit makapainteres nga gintapos ni Jesus an ira pag-istorya ha pagsiring: “Ini an basihan han paghukom, nga an kalamrag [nga amo hi Jesus pinaagi han iya kinabuhi ngan katutdoan] kinanhi ha kalibotan kondi hinigugma han mga tawo an kasisidman imbes nga an kalamrag, kay maraot an ira mga buhat. Kay an nagbubuhat hin magraot nasisina ha kalamrag ngan diri nahirani ha kalamrag, basi diri sawayon an iya mga buhat. Kondi an nagbubuhat hin maopay nahirani ha kalamrag basi makita an iya mga buhat nga uyon ha kaburut-on han Dios.”—Juan 3:19-21.

Nadepende na kan Nicodemo nga Pariseo ngan magturutdo ha Israel kon papamalandungon niya an iya hinbatian pa la mahitungod ha papel ni Jesus ha katuyoan han Dios.