Benɛ a ye jeha 30 Hetsɔmi ɔ ta a, Yesu kɛ e kaseli ɔmɛ a je Yerusalem. Se a yɛ Galilea, mohu ɔ, a pue nɔ kɛ ho Yudea ya nɛ a ya baptisi nihi fuu ngɛ lejɛ ɔ. Yohane Nɔ Baptisilɔ ɔ tsu ní tsumi nɛ ɔ maa pee jeha kake, nɛ loloolo ɔ, e kaseli ɔmɛ ekomɛ ngɛ e ngɔ ngɛ dɔgba nɛ ngɛ Yordan Pa a he ɔ mi.

Yesu nitsɛ baptisii we nihi, mohu ɔ, e kaseli ɔmɛ nɛ a baptisi nihi ngɛ e blɔ tsɔɔmi sisi. Jamɛ a be ɔ mi ɔ, Yesu kɛ Yohane tsuo a ngɛ Yuda bi nɛ a tsake a tsui ngɛ a yayamihi a he ɔ ní tsɔɔe.​​—Bɔfo Ɔmɛ A Ní Tsumi 19:4.

Se Yohane kaseli ɔmɛ a je Yesu he hunga nɛ a de Yohane ke: ‘Tsɔɔlɔ, nyumu ɔ [Yesu] nɛ e kɛ mo hi Yordan pa a beleku je nɛ o tu e he munyu ɔ, nihi babauu ngɛ e ngɔ yae, nɛ e ngɛ mɛ baptisie.’ (Yohane 3:26) Se nɔ́ nɛ ɔ dɔɛ Yohane. Mohu ɔ, e bua jɔ kaa Yesu ngɛ nɔ yae, nɛ e suɔ nɛ e kaseli ɔmɛ hu a bua nɛ jɔ kaa Yesu ngɛ nɔ yae. Yohane kai mɛ ke: “Nyɛ nitsɛmɛ nyɛ nu nɛ i de paa ke, ‘Pi imi ji Kristo ɔ, se mohu a tsɔ mi kɛ sɛ e hlami.’” E pee enɛ ɔ he nɔ́ hetomi nɔ́ konɛ mɛ tsuo a nu sisi: “Ayɛflo huno ɔ, e nɔ́ ji ayɛflo ɔ. Se kɛ̃ ɔ, ayɛflo huno ɔ huɛ nɛ daa si ngɛ e kasa nya a, ke e nu ayɛflo huno ɔ gbi kɛkɛ e bua jɔ. Enɛ ɔ nɛ haa imi hu i náa bua jɔmi babauu.”​​—Yohane 3:28, 29.

Yohane ngɛ kaa ayɛflo huno ɔ huɛ, enɛ ɔ he ɔ, benɛ e ngɔ Yesu kɛ tsɔɔ e kaseli ɔmɛ nyɔhiɔ bɔɔ nɛ be ɔ, e bua jɔ wawɛɛ. E kaseli ɔmɛ ekomɛ nyɛɛ Yesu se. Pee se ɔ, a kɛ mumi klɔuklɔu ɔ maa pɔ mɛ nu. Yohane kaseli ɔmɛ ekomɛ lɛɛ a ya nyɛɛ we Yesu se, se Yohane suɔ nɛ mɛ hu a ya nyɛɛ e se. Ngɛ anɔkuale mi ɔ, Yohane yi mi tomi ji kaa e maa dla blɔ ɔ ngɔ to Kristo konɛ e fiɛɛmi ní tsumi ɔ nɛ ya nɔ. Yohane de ke: “E sa kaa e ya nɔ, konɛ imi lɛɛ ma ba si.”​​—Yohane 3:30.

Nɔ kpa ko nɛ a tsɛɛ lɛ Yohane, nɛ́ lɛ hu e ba nyɛɛ Yesu se ɔ ngma Yesu sisije, kɛ e ní tsumi titli ngɛ adesahi a yi wami hemi mi ɔ he sane ke: “Nɔ nɛ je hiɔwe kɛ ba a pe nihi tsuo. . . . Tsɛ ɔ suɔ e Bi ɔ, nɛ e tu nihi tsuo ngɔ wo e dɛ mi. Nɔ nɛ heɔ Bi ɔ yeɔ ɔ, e nine su neneene wami ɔ nɔ; se nɔ tsuaa nɔ nɛ bui Bi ɔ tue ɔ, e be neneene wami nae. Mawu maa gbla e tue mohu.” (Yohane 3:31, 35, 36) Enɛ ɔ ji anɔkuale nɛ e sa kaa adesahi tsuo nɛ a le!

Benɛ Yohane Nɔ Baptisilɔ ɔ de kaa e sa nɛ e ní tsumi ɔ nɛ ba si ɔ, e kɛ we kulaa nɛ Matsɛ Herode ha nɛ a nu lɛ wo tsu mi. Herode ngɔ e nyɛmi Filipo yo Herodia kɛ pee e yo. Benɛ Yohane tu munyu kɛ si lɛ kaa e puɛ gba a, Herode ha nɛ a wo lɛ tsu. Benɛ Yesu nu kaa a nu Yohane ɔ, e kɛ e kaseli ɔmɛ a “pue nɔ kɛ ho Galilea ya.”​​—Mateo 4:12; Marko 1:14.