I mbus le ba mal séé ngand Pasa i nwii 30 N.Y., Yésu ni banigil bé ba nyodi Yérusalem. Ndi ba ntémb bé ngélé yada i mandap map i Galiléa. Ba nke i nkoñ Yudéa, het ba nsôble ngandak bôt. Yôhanes Nsôble a mboñ nlélém nson hala a yé ngim nwii nano, ndék banigil bé ba ngi yii ni nye, bebek i pes nsôsôgô i Lom Yordan.

Yésu nyemede a nsôble bé mut, banigil bé bon ba mboñ hala ni kunde yé. Ha likala li nson wé, Yésu bo Yôhanes ba niiga bôt ba Lôk Yuda ba ba nhiel miñem nwap inoñnaga ni Mbén Môsé.​—Minson mi baôma 19:4.

Ndi banigil ba Yôhanes ba nke njôñ, ba ntjelene nye inyu Yésu. Ba nkal le: “I mut a bak lôñni we . . . a yé i sôble bôt, yak limut jolisôna li nke i nyeni.” (Yôhanes 3:26) Ndi Yôhanes a nke bé njôñ. A nkon maséé ni mahol ma Yésu, a gwéhék ki le banigil bé ba nôgda nlélém. Yôhanes a nhôñlaha bo le: “Bébomede ni yé me mbôñ le me bi kal le: ‘Me ta bé Kristô, ndi ba bi ep me le me bôk nye i bisu.’” A nti hihéga hi hi ntibil nôgha bo i jam li. A nkal le: “Mbiimuda nyen a gwé muda. Ndi ngéda liwanda jé li ntelep, li nok nye a mpot, li nkon maséé ngandak inyule li nok kiñ i mbiimuda. Jon maséé mem ma mal yon.”​—Yôhanes 3:28, 29.

Kiki liwanda li mbii, hala a yé ndék sôñ nano le Yôhanes a bi kon maséé i unda Yésu banigil bé. Bahogi ikété yap ba noñ Yésu, i mbus ngéda, ba ga yila minhook ni njel mbuu mpubi. Yôhanes a nsômbôl le banigil ba ba ngi yii ni nye ba noñ Yésu. I pot maliga, nson u Yôhanes u yé i kôôba mam inyu nson u Kristô. Yôhanes a ntoñol le: “Nson wé u nlama kônde keñep, ndi wem u nlama kônde sôs.”​—Yôhanes 3:30.

Inyu pôdôl bibôdle bi Yésu, ni ngaba i tôbôtôbô a gwé mu tohi i bôt ba binam, Yôhanes numpe, nu a bi bôdôl noñ Yésu, a nsôk tila le: “Nu a nlôl i ngii a nloo bôt bobasôna. . . . Isañ a ngwés Man, a bi bii ki mam momasôna i moo mé. Nu a ñunda le a nhémle Man a gwé niñ boga; nu a ndogbene Man a’ tehe bé niñ boga, ndi hiun hi Nyambe hi kéhi i ngii yé.” (Yôhanes 3:31, 35, 36) Hala a yé maliga ma tôbôtôbô ma bôt bobasôna ba nlama yi!

Ndék ngéda i mbus le Yôhanes Nsôble a ntoñol le nson wé u nlama sôs, Kiñe Hérôdé a ngwel nye. Hérôdé a bi yoñ Hérôdia, nwaa maasañ Filipô, a bii nye. Ngéda Yôhanes a nyelel mahindi ma ndéñg ma i mbamba, Hérôdé a nha nye i mok. I ngéda Yésu a nok le ba ngwel Yôhanes, nye ni banigil bé ba nyodi Yudéa inyu ‘ke i Galiléa.’​—Matéô 4:12; Markô 1:14.