Dung sae perayaan Paska taon 30 M, laho ma Jesus dohot angka siseanna sian Jerusalem. Ndang pintor tu Galilea nasida, alai laho ma nasida tu Judea. Godang do halak tardidi dibahen nasida disi. Ra di tingki i, di Sunge Jordan do si Johannes Pandidi. Nunga hira-hira sataon ibana marbarita jala rap dope ibana dohot siseanna.

Mangajari do Jesus dohot si Johannes Pandidi tu halak Jahudi asa muba nasida. Alai ndang hea Jesus mandidi halak. Angka siseanna do na mandidi marhite tudu-tuduna. Jala, pandidion i patuduhon molo nasida nunga muba jala mangoloi parjanjian ni nasida taringot tu Patik ni Debata.​—Ulaon ni Apostel 19:4.

Alai mangiburu do angka sisean ni si Johannes tu Jesus. Ninna ma, “Halak na rap dohot ho di bariba ni Sunge Jordan i, . . . mandidihon do ibana nuaeng. Jala sude do halak ro mandapothon ibana.” (Johannes 3:26) Alai ndang mangiburu si Johannes. Las do rohana godang halak manangihon Jesus. Jala lomo do rohana asa dohot siseanna marlas ni roha. Didok si Johannes ma, “Nunga dibege hamu tingki hudok, ‘Ndang ahu Kristus i, alai disuru Debata do ahu asa parjolo sian ibana.’” Dipaboa ma sada tudosan tu nasida, “Pangoli i do nampuna pengantin borua i. Alai dongan ni pangoli i, na jongjong di lambungna jala na manangihon ibana, mansai las do rohana mambege soara ni pangoli i. Alani i, nunga gok be saonari las ni rohangki.”​—Johannes 3:28, 29.

Dipatudos do si Johannes songon dongan ni pangoli i. Las do rohana patandahon Jesus tu angka siseanna. Adong do sian nasida na mangihuthon Jesus, jala dipillit ma nasida marhite tondi parbadia. Lomo do roha ni si Johannes asa diihuthon angka siseanna i Jesus. Ai laho paradehon dalan tu ulaon ni Kristus do ibana. Ninna do, “Lam tu balgana ma ulaonna, alai lam tu metmetna ma ulaonku.”​—Johannes 3:30.

Si Johannes na sada nai, i ma sisean ni Jesus na parjolo i, manurat taringot tu haroro ni Jesus dohot ulaonna na parohon haluaon. Ninna do, “Na ro sian ginjang i do na umbalga sian sasude. . . . Dihaholongi Ama i do Anak i jala dilehon do tu ibana huaso laho mangarajai sudena. Manang ise na patuduhon haporseaon tu Anak i, dapotna do hangoluan na saleleng ni lelengna. Manang ise na so mangoloi Anak i, ndang dapotna hangoluan alai tongtong ma marrimas Debata tu ibana.” (Johannes 3:31, 35, 36) Mansai ringkot do hasintongan on botoon ni jolma!

Ndang sadia leleng dung dipaboa si Johannes Pandidi na lam tu metmetna ulaonna i, ditangkup si Herodes ma ibana. Tingki i, dibuat si Herodes do tunggane boru ni abangna si Pilippus, i ma si Herodias. Ala dipaboa si Johannes do tu angka halak naung mangalangkup si Herodes, dipenjarahon ma ibana. Tingki dibege Jesus naung ditangkup si Johannes, ditadingkon Jesus ma Judea jala laho ma ibana dohot angka siseanna tu Galilea.​—Mateus 4:12; Markus 1:14.